كولىكتى تىركەۋ ءۇشىن قانداي قۇجاتتار قاجەت؟
كولىكتى العاش رەت تىركەۋ كەزىندە ۇسىنىلاتىن قۇجاتتار ءتىزىمى كەڭەيتىلمەك. اتاپ ايتقاندا، كادەگە جاراتۋ تولەمى تولەنگەنىن راستايتىن سەرتيفيكات، كولىك قۇرالىنىڭ نەمەسە شاسسيىنىڭ ەلەكتروندىق پاسپورتى جانە كەدەندىك راسىمدەۋگە قاتىستى قۇجاتتار تالاپ ەتىلەدى. ال كولىك كونسترۋكسياسىنا وزگەرىس ەنگىزىلگەن جاعدايدا ك و ت ر 018/2011 تەحنيكالىق رەگلامەنتىنە سايكەستىك تۋرالى كۋالىك قاجەت بولادى.
ديپلوماتيالىق وكىلدىكتەر، ولاردىڭ قىزمەتكەرلەرى مەن وتباسى مۇشەلەرى كادەگە جاراتۋ سەرتيفيكاتى مەن ەلەكتروندىق پاسپورت ۇسىنۋدان بوساتىلادى. ال قارۋلى كۇشتەر مەن ارناۋلى مەملەكەتتىك ورگاندارعا ەلەكتروندىق پاسپورتقا قاتىستى تالاپ قولدانىلمايدى. كولىكتى مىندەتتى تۇردە تەكسەرۋ تالابى دا كەڭەيتىلەدى. ەندى تەك العاشقى تىركەۋ كەزىندە عانا ەمەس، كۋزوۆ، شاسسي نەمەسە راما اۋىستىرىلعاندا، كولىكتىڭ ءتۇسى وزگەرگەندە، سونداي-اق ماركاسى، مودەلى، VIN- كودى، شىعارىلعان جىلى، قوزعالتقىشىنىڭ كولەمى مەن قۋاتى جانە ورىن سانى تۋرالى دەرەكتەردەگى قاتەلەر تۇزەتىلگەندە دە تەكسەرۋ جۇرگىزىلەدى.
بۇل تالاپ وتاندىق وندىرىستەگى جاڭا كولىكتەرگە جانە رەسمي ديلەرلەر ارقىلى اكەلىنگەن جاڭا اۆتوموبيلدەرگە قولدانىلمايدى. ءوز قولىمەن قۇراستىرىلعان تىركەمەلەردى تىركەۋدىڭ جەكە ءتارتىبى ەنگىزىلەدى. ول ءۇشىن اككرەديتتەلگەن زەرتحانانىڭ سىناق حاتتاماسى، اكىمشىلىك پوليتسيا كوميتەتى بەرەتىن سايكەستەندىرۋ ءنومىرى تۋرالى قۇجات جانە كونسترۋكتسيا قاۋىپسىزدىگى تۋرالى كۋالىك قاجەت بولادى.
جۇرگىزۋشى كۋالىگىنە ەمتيحان تاپسىرۋ ءتارتىبى وزگەرەدى
جاڭا تۇزەتۋلەر بويىنشا تەوريالىق نەمەسە پراكتيكالىق ەمتيحاننان وتە الماعان ۇمىتكەر كەلەسى جۇمىس كۇنى قايتا تاپسىرا الادى. ەكى رەت ءساتسىز ناتيجە العان جاعدايدا كەلەسى مۇمكىندىك كەمىندە 10 كۇنتىزبەلىك كۇننەن كەيىن بەرىلەدى. ەمتيحاننان ءۇش رەت وتە الماعان ازاماتتار كەيىنگى تالپىنىستارى ءۇشىن «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ تاريفتەرى بويىنشا اقى تولەيدى. قايتا تاپسىرۋ ارالىعى بۇل جاعدايدا دا كەمىندە 10 كۇن بولادى. ال جەرگىلىكتى اسكەري باسقارۋ ورگاندارىنىڭ جولداماسىمەن وقىعان ازاماتتار ەمتيحاندى جەتى كۇننەن كەيىن قايتا تاپسىرا الادى.
تەوريالىق ەمتيحاننىڭ ناتيجەسى مەن دۇرىس جاۋاپتار تەست اياقتالعاننان كەيىن عانا كورسەتىلەدى. ناتيجەمەن كەلىسپەگەن ۇمىتكەر اپەللياتسيا بەرە الادى. ونى كەمىندە ءۇش ادامنان تۇراتىن كوميسسيا قارايدى. ونىڭ قۇرامىنا ۋاكىلەتتى ورگاننىڭ، مەملەكەتتىك كورپوراتسيانىڭ جانە وقۋ ۇيىمىنىڭ وكىلدەرى كىرەدى. ەمتيحان كەزىندە كوشىرىپ الۋ، ماتەريالدارمەن الماسۋ نەمەسە ەلەكتروندىق قۇرىلعىلاردى پايدالانۋ انىقتالسا، سىناق توقتاتىلىپ، ۇمىتكەرگە «وتپەدى» دەگەن باعا قويىلادى. مۇنداي جاعدايدا ەمتيحاندى قايتا تاپسىرۋعا تەك 12 ايدان كەيىن رۇقسات ەتىلەدى.
پراكتيكالىق ەمتيحاندا ەسەپتەلگەن ايىپپۇل ۇپايلارىنا دا شاعىمدانۋعا بولادى. اۆتودروم نەمەسە كولىك بولماعان جاعدايدا، سونداي-اق جەرگىلىكتى اسكەري باسقارۋ ورگاندارىنىڭ جولداماسىمەن «C» ،«D» ،«C1» جانە «D1» ساناتتارى بويىنشا ەمتيحان قابىلداۋ ءۇشىن ارنايى كوميسسيا قۇرىلادى. بۇدان بولەك، وقۋ اۆتوموبيلدەرىنىڭ سالونى 360 گرادۋستىق بەينەباقىلاۋ جۇيەسىمەن جابدىقتالادى. بەينەجازبالار كەمىندە التى اي ساقتالۋعا ءتيىس.
جۇرگىزۋشى كۋالىگىن اۋىستىرۋعا قاتىستى تالاپتار
شەتەلدىك جۇرگىزۋشى كۋالىگىن قازاقستاندىق كۋالىككە اۋىستىرۋ ءتارتىبى ناقتىلانادى. ول ءۇشىن ازامات تەوريالىق ەمتيحاندى ءساتتى تاپسىرىپ، شەتەلدىك قۇجاتتىڭ ءتۇپنۇسقالىعىن سول ەلدىڭ قۇزىرەتتى ورگانى ارقىلى راستاۋى كەرەك. كولىك جۇرگىزۋ قۇقىعىنان ايىرىلعان ازاماتتاردىڭ كۋالىكتەرى الىنىپ، ءبىر جۇمىس كۇنى ىشىندە ولاردىڭ كۇشىن جويۋ جانە جويۋ راسىمدەرىن جۇرگىزۋ ءۇشىن ۋاكىلەتتى ورگانعا جىبەرىلەدى. ال شەتەلدىك جۇرگىزۋشى كۋالىكتەرى جويىلمايدى، ولار الىنعان جەردە ساقتالادى.
كولىك جۇرگىزۋ قۇقىعىنان ءومىر بويىنا ايىرىلعان ادامدارعا جۇرگىزۋشى كۋالىگىن بەرۋگە اقپاراتتىق جۇيە ارقىلى شەكتەۋ قويىلادى. سونداي-اق بۇيرىققا قازاقستاننىڭ جول قوزعالىسى ەرەجەلەرى بويىنشا ءبىلىمدى تەكسەرۋگە ارنالعان جاڭا ءبولىم ەنگىزىلەدى. تەكسەرۋگە «ح ق ك و» موبيلدى قوسىمشاسى ارقىلى كەمىندە ءبىر جۇمىس كۇنى بۇرىن جازىلۋعا بولادى. ەگەر ازامات سىناقتان وتە الماسا، ونى كەلەسى جۇمىس كۇنى قايتا تاپسىرا الادى. ەكى رەت ءساتسىز ناتيجە العان جاعدايدا كەلەسى ەمتيحان 10 كۇننەن كەيىن وتكىزىلەدى. تەكسەرۋ ناتيجەلەرى سەرۆەردە 12 اي بويى ساقتالادى.
شەتەلدىكتەردىڭ كولىك نومىرلەرىنە قاتىستى وزگەرىستەر
قۇجاتتا قازاقستان اۋماعىندا جۇرگەن شەتەلدىك ازاماتتار مەن ۇيىمدارعا ارنالعان مەملەكەتتىك تىركەۋ نومىرلەرىنىڭ سەريالارى دا ەگجەي-تەگجەيلى كورسەتىلگەن.
اتاپ ايتقاندا:
D - ديپلوماتيالىق وكىلدىكتەر؛
T - اكىمشىلىك-تەحنيكالىق پەرسونال؛
HC - قۇرمەتتى كونسۋلدار؛
M - شەتەلدىك زاڭدى تۇلعالاردىڭ فيليالدارى؛
N ،C ،L ،P ،J ،K ،S ،Y - شەتەلدىك قاتىسۋى بار زاڭدى تۇلعالار؛
F ،T ،A ،G، I، N R - شەتەل ازاماتتارى مەن ازاماتتىعى جوق ادامدار.
D ،T جانە HC سەريالى نومىرلەر ءۇشىن ديپلوماتيالىق كورپۋس ماسەلەلەرىمەن اينالىساتىن ۇيىم بەرەتىن ارنايى جاپسىرما مىندەتتى بولادى. مۇنداي نومىرلەردىڭ جارامدىلىق مەرزىمى جاپسىرمانىڭ قولدانىلۋ مەرزىمىنە بايلانىستى بەلگىلەنەدى.
كولىكتى ونلاين تىركەۋ جانە سيفرلىق كەزەك
جاڭا تارتىپتە مەملەكەتتىك قىزمەت كورسەتۋ كەزەڭدەرىنە ناقتى ۋاقىت شەكتەرى بەلگىلەنەدى. قۇجاتتاردى قابىلداۋ جانە تەكسەرۋگە - 20 مينۋت، انىقتالعان كەمشىلىكتەردى تۇزەتۋگە - 60 مينۋت، قىزمەت كورسەتۋشىنىڭ شەشىم قابىلداۋىنا - 15 مينۋت، كولىك قۇرالىن تىركەۋ تۋرالى كۋالىكتى باسىپ شىعارۋعا - 5 مينۋت، ال ونى بەرۋگە 10 مينۋت قاراستىرىلعان. قۇجاتتار تولىق بولماسا نەمەسە قاتەلەر انىقتالسا، ءوتىنىش «تسيفرلىق كۇتۋ پاراعى» ارقىلى قابىلدانادى.
كولىكتى ونلاين تىركەۋ كەزىندە قىزمەت كورسەتۋشى الدىن الا شەشىم شىعارىپ، ازاماتتىڭ جەكە كابينەتىنە حابارلاما جىبەرەدى. وسىدان كەيىن كولىك يەسى ءاۆتوموبيلدى تەكسەرۋدەن وتكىزۋ ءۇشىن «ازاماتتارعا ارنالعان ۇكىمەت» مەملەكەتتىك كورپوراتسياسىنا ۇسىنۋى كەرەك. اۆتوكولىكتى ەسەپتەن شىعارۋ جانە ونى جاڭا يەسىنىڭ اتىنا تىركەۋ ءبىر ءوتىنىش ارقىلى راسىمدەلەدى. ءراسىم جەكە كابينەتتە راستالادى.
تاپسىرىسپەن جاسالاتىن مەملەكەتتىك نومىرلەر ءىرى قالالاردا ءۇش جۇمىس كۇنى ىشىندە، ال باسقا وڭىرلەردە 10 كۇندە دايىندالادى. دايىن بولعانى تۋرالى حابارلاما 1414 نومىرىنەن جىبەرىلەدى. بۇيرىق العاشقى رەسمي جاريالانعان كۇننەن كەيىن كۇشىنە ەنەدى. ىشكى ىستەر مينيسترلىگىنىڭ اكىمشىلىك پوليتسيا كوميتەتى قۇجاتتى ادىلەت مينيسترلىگىندە تىركەپ، ۆەدومستۆونىڭ ينتەرنەت-رەسۋرسىندا جاريالاۋدى قامتاماسىز ەتۋى كەرەك.