ىشكى ىستەر مينيسترلىگى «زاڭ مەن ءتارتىپ» قاعيداتى اياسىندا قوعامدىق قاۋىپسىزدىك پەن قۇقىقتىق ءتارتىپتى قامتاماسىز ەتۋ جۇمىستارىن جالعاستىرىپ جاتىر. ۆەدومستۆو قۇقىق بۇزۋشىلىقتاردىڭ الدىن الۋ مەن ازاماتتاردىڭ قاۋىپسىزدىگىن قورعاۋدى پوليتسيا قىزمەتىنىڭ باسىم باعىتتارىنىڭ ءبىرى رەتىندە اتاپ ءوتتى.
5-قازان مەن 5-قاراشا ارالىعىندا رەسپۋبليكا بويىنشا «قاۋىپسىز ءۇي» جەدەل-پروفيلاكتيكالىق ءىس-شاراسى وتكىزىلدى.
شارا بارىسىندا پوليتسەيلەر 576 مىڭنان استام تۇرعىن ءۇي مەن وزگە دە نىساندى تەكسەرگەن. اسىرەسە جالعا بەرىلەتىن پاتەرلەرگە، ساياجاي ۇيلەرىنە، تۇرمىسى قولايسىز وتباسىلارعا جانە پروفيلاكتيكالىق ەسەپتە تۇرعان ازاماتتارعا ەرەكشە نازار اۋدارىلعان.
ناتيجەسىندە كوشى-قون زاڭناماسىن بۇزۋدىڭ 42 مىڭعا جۋىق دەرەگىنىڭ جولى كەسىلدى. 9 مىڭعا جۋىق شەتەلدىك جاۋاپكەرشىلىككە تارتىلىپ، پوليتسياعا تۇراقتى تۇرعىلىقتى جەرى جوق 3,5 مىڭنان استام ادام جەتكىزىلدى.
سونىمەن قاتار پوليتسيا قىزمەتكەرلەرى تۇرعىندارمەن 12 مىڭنان استام كەزدەسۋ وتكىزىپ، پروفيلاكتيكالىق مازمۇنداعى 398 مىڭعا جۋىق جادىناما تاراتقان.
ازاماتتاردان 4,5 مىڭنان استام ۇسىنىس پەن ءوتىنىش كەلىپ تۇسكەن. ولاردىڭ بارلىعى بويىنشا ءتيىستى شارالار قابىلدانعان.
ءىس-شارا اياسىندا 100 مىڭنان استام قارۋ يەسى دە تەكسەرىلدى. ناتيجەسىندە 1,5 مىڭنان استام قۇقىق بۇزۋشىلىقتىڭ جولى كەسىلىپ، تىركەلمەگەن 195 قارۋ تاركىلەندى.
جەتىسۋ وبلىسىندا پوليتسەيلەر الكوگولگە اۋەستىگى بار ازاماتقا ەمدەلۋگە جانە ءومىر سالتىن وزگەرتۋگە كومەكتەسكەن. قازىر ول جۇمىس ىستەپ ءجۇر. ال اناسى كورسەتىلگەن كومەك ءۇشىن ۋچاسكەلىك پوليتسيا ينسپەكتورىنا العىس بىلدىرگەن.
اباي وبلىسىندا اتا-انالىق مىندەتتەرىن تيىسىنشە ورىنداماعان وتباسىلار انىقتالدى. بالالارى بەيىمدەۋ ورتالىعىنا ورنالاستىرىلىپ، اتا-انالارىنا قاتىستى ءتيىستى شارالار قابىلداندى.
ءى ءى م جۇمىسىنىڭ تاعى ءبىر ماڭىزدى باعىتى - جانارمايدى ەل اۋماعىنان زاڭسىز اكەتۋ دەرەكتەرىنىڭ جولىن كەسۋ.
وسى ماقساتتا مەملەكەتتىك شەكاراداعى اۆتوكولىك وتكىزۋدىڭ 48 پۋنكتىنىڭ ماڭىندا تاۋلىك بويى جۇمىس ىستەيتىن پوليتسيا بەكەتتەرى قويىلعان.
جىل باسىنان بەرى رەسپۋبليكا بويىنشا قوسىمشا جانارماي باكتارىن زاڭسىز ورناتۋدىڭ 595 دەرەگى انىقتالدى. ولاردىڭ جالپى كولەمى 159,5 توننانى قۇرادى.
قۇقىق بۇزۋشىلىقتاردىڭ باسىم بولىگى جامبىل وبلىسىندا تىركەلگەن - 386 دەرەك. تۇركىستان وبلىسىندا 119, ال قوستاناي وبلىسىندا 80 دەرەك انىقتالعان.
زاڭ تالاپتارىن بۇزعان جۇرگىزۋشىلەر اكىمشىلىك قۇقىق بۇزۋشىلىق تۋرالى كودەكستىڭ 590-بابىنىڭ 7-بولىگى بويىنشا اكىمشىلىك جاۋاپكەرشىلىككە تارتىلىپ، ولارعا ايىپپۇل سالىندى. كولىكتەردەن زاڭسىز ورناتىلعان قوسىمشا باكتار الىنىپ تاستالدى.
ۆانداليزم مەن زاڭسىز گراففيتيلەرگە قارسى كۇرەس تە ۆەدومستۆو جۇمىسىنىڭ وزەكتى باعىتتارىنىڭ ءبىرى بولىپ وتىر.
1-قىركۇيەكتەن باستاپ ەلىمىزدە 26 مىڭنان استام زاڭسىز جازۋ وشىرىلگەن. 8 مىڭنان استام ادام اكىمشىلىك جاۋاپكەرشىلىككە تارتىلدى.
ۆانداليزم جانە ەسىرتكى جارنامالايتىن گراففيتيلەر ءۇشىن 7 سوتقا دەيىنگى تەرگەپ-تەكسەرۋ باستالدى.
پروفيلاكتيكالىق جۇمىستار اياسىندا ازاماتتارمەن 43 مىڭنان استام كەزدەسۋ ۇيىمداستىرىلىپ، 59 مىڭنان استام اقپاراتتىق بروشيۋرا تاراتىلعان.
ىشكى ىستەر مينيسترلىگى قورشاعان ورتانىڭ لاستانۋىنىڭ الدىن الۋعا باعىتتالعان كەشەندى ءىس-شارالاردى دا جۇزەگە اسىرىپ جاتىر.
جىل باسىنان بەرى رەسپۋبليكا بويىنشا 47 مىڭنان استام رەيد جۇرگىزىلگەن. ناتيجەسىندە 1724 زاڭسىز قوقىس ورنى انىقتالىپ، 351 مىڭنان استام اكىمشىلىك قۇقىق بۇزۋشىلىقتىڭ جولى كەسىلدى.
قابىلدانعان شارالاردىڭ ناتيجەسىندە 1435 زاڭسىز قوقىس ورنى جويىلدى.
- پوليتسيا قوعامدىق قاۋىپسىزدىك پەن قۇقىقتىق ءتارتىپتى قامتاماسىز ەتۋ باعىتىنداعى جۇمىستارىن جالعاستىرادى. زاڭ مەن ءتارتىپتى ساقتاڭىزدار! - دەپ مالىمدەدى ىشكى ىستەر مينيسترلىگى.
ايتا كەتەيىك، بۇعان دەيىن قازاقستاندا قوسىمشا جانارماي باكتارىن زاڭسىز ورناتقان 537 كولىك انىقتالعانى حابارلانعان بولاتىن. سول كەزدە زاڭسىز ورناتىلعان باكتاردىڭ جالپى سىيىمدىلىعى 150 توننادان اسقانى ايتىلعان.