Data Hub مالىمەتى بويىنشا، 2026 -جىلعى ساۋىردە جۇرگىزىلگەن دەنساۋلىق ساقتاۋ جانە الەۋمەتتىك قىزمەت كورسەتۋ كاسىپورىندارىن ىرىكتەمەلى زەرتتەۋ ناتيجەسىنە سايكەس، ەڭ جوعارى جالاقى جاق-بەت حيرۋرگتەرىنە تيەسىلى. ولاردىڭ ورتاشا ەسەپتەلگەن ايلىعى 2 ميلليون 384 مىڭ تەڭگە بولعان.
ەكىنشى ورىندا - پلاستيكالىق حيرۋرگتەر. ولاردىڭ ورتاشا جالاقىسى 2 ميلليون 146 مىڭ تەڭگەگە جەتكەن. بۇل - ورتاشا تابىسى 2 ميلليون تەڭگەدەن اساتىن جالعىز ەكى مەديتسينالىق ماماندىق.
ءۇشىنشى ورىنعا ورتاشا جالاقىسى 1 ميلليون 256 مىڭ تەڭگە بولاتىن سيتوپاتولوگ دارىگەرلەر جايعاسقان.
جالاقى مولشەرى بويىنشا كەلەسى ورىنداردا:
توتەنشە جاعدايلار مەن اپاتتار مەديتسيناسىنىڭ دارىگەرلەرى - 864 مىڭ تەڭگە؛
بالالار كومبۋستيولوگتەرى (كۇيىك جاراقاتتارىن ەمدەيتىن دارىگەرلەر) - 833 مىڭ تەڭگە؛
فۋنكتسيونالدىق دياگنوستيكا كارديولوگتارى - 821 مىڭ تەڭگە؛
رەنتگەنحيرۋرگتەر - 803 مىڭ تەڭگە؛
كارديوحيرۋرگتەر - 729- 758 مىڭ تەڭگە؛
ەرەسەكتەرگە قىزمەت كورسەتەتىن انگيوحيرۋرگتەر - 737 مىڭ تەڭگە.
زەرتتەۋ ناتيجەسى نەگە وزگەردى؟
زەرتتەۋ اۆتورلارى رەيتينگ ناتيجەلەرى ىرىكتەمەنىڭ قۇرىلىمىنا بايلانىستى وزگەرۋى مۇمكىن ەكەنىن ەسكەرتەدى. كاسىپورىن نەعۇرلىم ءىرى بولسا، زەرتتەۋگە ونىڭ قىزمەتكەرلەرىنىڭ سوعۇرلىم از بولىگى قامتىلادى. مىسالى، شامامەن 5 مىڭ ادام جۇمىس ىستەيتىن ۇيىمدا ءاربىر ءجۇزىنشى قىزمەتكەردىڭ جالاقىسى عانا ەسەپكە الىنۋى مۇمكىن.
بۇل جاعداي 2025 -جىلمەن سالىستىرعاندا رەيتينگتىڭ كۇرت وزگەرۋىنە ءىشىنارا اسەر ەتكەن. بىلتىر ەڭ جوعارى جالاقى الاتىن دارىگەرلەر قاتارىندا كارديوحيرۋرگتەر كوش باستاپ، ولاردىڭ ورتاشا ايلىعى شامامەن 1 ميلليون تەڭگە بولعان. ال پلاستيكالىق جانە جاق-بەت حيرۋرگتەرى ۇزدىك 100 ماماندىقتىڭ قاتارىنا دا كىرمەگەن. ولاردىڭ ورتاشا جالاقىسى 500 مىڭ تەڭگەدەن تومەن بولعان.
ايتا كەتەيىك، زەرتتەۋدە كورسەتىلگەن سومالار - سالىقتار مەن باسقا دا مىندەتتى تولەمدەر ۇستالماعانعا دەيىنگى ەسەپتەلگەن جالاقى مولشەرى. سوندىقتان دارىگەرلەردىڭ قولعا الاتىن ناقتى تابىسى بۇدان تومەن بولۋى مۇمكىن.