جاڭا تالاپتار 20-قاراشادان باستاپ كۇشىنە ەنەدى.
ىشكى ىستەر ءمينيسترىنىڭ 3-قاراشاداعى بۇيرىعىمەن جول قوزعالىسى قاعيدالارىنا ءبىرقاتار وزگەرىس ەنگىزىلدى. اتاپ ايتقاندا، ۆەلوسيپەد، موپەد، كولىك قۇرالى جانە شاعىن ەلەكتر كولىگى ۇعىمدارى ناقتىلاندى.
جاڭا قاعيدا بويىنشا، شاعىن ەلەكتر كولىگىنە گيروسكۋتەر، سيگۆەي، ەلەكترلى سكەيتبورد پەن مونودوڭگەلەك جاتادى. ال ەلەكترلى ساموكات پەن ەلەكتر قوزعالتقىشى بار ۆەلوسيپەد بۇل ساناتقا كىرمەيدى.
ەلدى مەكەندەردە جەڭىل كولىكتەر ساعاتىنا 60 شاقىرىمنان، اۆتوبۋستار مەن جۇك كولىكتەرى 50 شاقىرىمنان ارتىق جىلدامدىقپەن جۇرمەۋى كەرەك. تۇرعىن ايماقتار مەن اۋلالاردا ساعاتىنا 20 شاقىرىمنان اسىرۋعا بولمايدى. جول بەلگىسىندە وزگەشە شەكتەۋ كورسەتىلسە، سول تالاپ ساقتالادى. دەگەنمەن ەڭ جوعارى جىلدامدىق ساعاتىنا 90 شاقىرىمنان اسپاۋعا ءتيىس.
ەلەكترلى ساموكاتپەن ۆەلوسيپەد جولىمەن نەمەسە ارنايى جولاقپەن ءجۇرۋ قاجەت. ونداي جول بولماسا، جولدىڭ وڭ جاق شەتىمەن، قوعامدىق كولىك جولاعىمەن نەمەسە جول جيەگىمەن قوزعالۋعا رۇقسات ەتىلەدى.
شاعىن ەلەكتر كولىگىن تىزگىندەگەندەرگە دە ءبىرقاتار شەكتەۋ قويىلعان. اتاپ ايتقاندا، ءرولى بار كولىكتى كەمىندە ءبىر قولمەن ۇستاپ ءجۇرۋ كەرەك. جولاۋشى نەمەسە جۇك تاسۋعا، كولىك جۇرەتىن جولعا شىعۋعا، كولىكتى سۇيرەۋگە بولمايدى. جانىندا ۆەلوسيپەد جولى بولسا، تروتۋارمەن جۇرۋگە دە رۇقسات جوق. جاياۋ جۇرگىنشىلەر وتكەلىنەن كولىكتەن تۇسپەي وتۋگە بولمايدى.
جۇرگىزۋشىسىز كولىكتەر قايدا جۇرەدى؟
جاڭا ەرەجەدە جۇرگىزۋشىسىز كولىكتەرگە ارنالعان جەكە تاراۋ بار. وعان سايكەس، مۇنداي كولىكتەر تەك ارنايى بەلگىلەنگەن اۋماقتا قوزعالا الادى. ول اۋماقتىڭ شەكاراسى مەن كولىك جۇرەتىن باعىتى الدىن الا بەكىتىلەدى.
قوزعالىس باعىتىن جولعا جاۋاپتى مەكەمە نەمەسە جەرگىلىكتى اتقارۋشى ورگان ازىرلەپ، جول قاۋىپسىزدىگىنە جاۋاپتى ورگانمەن كەلىسەدى. وندا كولىكتىڭ قاي جولمەن جۇرەتىنى، قاي جەردەن كىرىپ-شىعاتىنى، قايدا توقتايتىنى جانە قانداي جىلدامدىقپەن قوزعالاتىنى كورسەتىلەدى. كولىك بۇزىلعان نەمەسە وپەراتورمەن بايلانىس ۇزىلگەن جاعدايدا قاۋىپسىز توقتايتىن ورىن دا الدىن الا بەلگىلەنەدى.
باعىتتى بەلگىلەۋ كەزىندە جولدىڭ جاي-كۇيى، كولىك قوزعالىسىنىڭ جيىلىگى، قيىلىستار مەن جاياۋ جۇرگىنشىلەر وتكەلدەرىنىڭ ورنالاسۋى ەسكەرىلەدى. سونداي-اق جول بەلگىلەرى مەن باعدارشامداردىڭ انىق كورىنۋى جانە وپەراتور مەن كولىك اراسىنداعى بايلانىستىڭ ۇزىلمەۋى ماڭىزدى.
جۇرگىزۋشىسىز كولىك بەلگىلەنگەن اۋماقتان شىعا المايدى. ەگەر باعىتى سول اۋماقتىڭ شەكاراسىنان اسىپ كەتسە، رۇقسات ەتىلگەن جەرگە توقتاۋى كەرەك.
كولىكتى قاشىقتان وپەراتور باسقارادى
جۇرگىزۋشىسىز كولىكتىڭ قوزعالىسىن قاشىقتان وپەراتور باقىلاپ وتىرادى. ول كولىكتىڭ بەلگىلەنگەن باعىتتان اۋىتقىماۋىن قاداعالايدى. قاۋىپ تونسە نەمەسە كولىكتە اقاۋ پايدا بولسا، باسقارۋدى ءوز قولىنا الىپ، ونى قاۋىپسىز توقتاتۋى كەرەك.
بايلانىس ۇزىلگەن نەمەسە جۇيە ىستەن شىققان جاعدايدا كولىك جىلدامدىعىن ازايتىپ، اپاتتىق شامدارىن قوسادى دا، قاۋىپسىز جەرگە توقتايدى. اقاۋ جويىلىپ، جول جۇرۋگە قاۋىپسىز بولعاندا عانا قوزعالىسىن جالعاستىرا الادى.
جۇرگىزۋشىسىز كولىك تە جولداعى وزگە كولىكتەر سياقتى باعدارشامعا، جول بەلگىلەرى مەن تاڭبالارىنا باعىنۋى كەرەك. قيىلىستان ءوتۋ، بۇرىلۋ، باسىپ وزۋ، توقتاۋ جانە تۇراققا قويۋ ءتارتىبىن دە ساقتاۋعا مىندەتتى. ارنايى جارىق جانە دىبىس دابىلىن قوسقان جەدەل قىزمەت كولىكتەرىنە جول بەرۋى ءتيىس.
پوليتسيا نەمەسە كولىكتىك باقىلاۋ قىزمەتكەرى توقتاۋدى تالاپ ەتسە، وپەراتور كولىكتى كورسەتىلگەن جەرگە توقتاتۋى كەرەك. ناقتى ورىن كورسەتىلمەسە، قاۋىپسىز ءارى توقتاۋعا رۇقسات ەتىلگەن جاقىن جەرگە توقتاتادى.
جول-كولىك وقيعاسى بولعان جاعدايدا كولىك توقتاپ، اپاتتىق شامدارىن قوسادى. وپەراتور بۇل تۋرالى ىشكى ىستەر ورگاندارىنا دەرەۋ حابارلاپ، وقيعا ورنىن ناقتى كورسەتۋى كەرەك. زارداپ شەككەندەر بولسا، جەدەل جاردەم شاقىرادى. پوليتسيا قىزمەتكەرلەرىنىڭ زاڭدى تالاپتارىن ورىنداۋعا مىندەتتى.
ايتا كەتەيىك، جاڭا تالاپتار 2026-جىلعى 20-قاراشادان باستاپ كۇشىنە ەنەدى.
بۇعان دەيىن استانا، الماتى جانە قوسشىدا جۇرگىزۋشىسىز جۇرەتىن كولىكتەر سىناقتان وتەتىنى تۋرالى جازعان ەدىك.