ەلىمىزدە ايەلدەرگە مەديتسينالىق كومەكتىڭ تۇتاس كەشەنى مەملەكەت ەسەبىنەن كورسەتىلەدى. بۇل قىزمەتتەر رەپرودۋكتيۆتىك دەنساۋلىقتىڭ بارلىق ماڭىزدى كەزەڭىن - وتباسىن جوسپارلاۋدان باستاپ بوسانعاننان كەيىنگى قالپىنا كەلۋگە دەيىنگى ارالىقتى قامتيدى.
425 مەديتسينالىق-سانيتاريالىق العاشقى كومەك ۇيىمى مەن 24 وبلىستىق پەريناتالدىق ورتالىقتىڭ بازاسىندا ايەلدەر كونسۋلتاتسيالارى اشىلعان. ولاردا جەكە تىركەۋ بولىمدەرى، ەمشارا كابينەتتەرى جانە وتباسىن جوسپارلاۋ ورتالىقتارى ۇيىمداستىرىلعان.
- 1 ميلليوننان استام ايەل ايەلدەر كونسۋلتاتسيالارىنىڭ قىزمەتتەرىن الدى. ال جۇكتىلىكتىڭ 10 اپتاسىنا دەيىن ەسەپكە تۇرعان جۇكتى ايەلدەردىڭ ۇلەسى 18 پايىزعا ارتىپ، 71 پايىزدى قۇرادى، - دەلىنگەن مينيسترلىك مالىمەتىندە.
ۇرىقتىڭ تۋا بىتكەن دامۋ كەمىستىكتەرىن ەرتە انىقتاۋ ءۇشىن بارلىق وڭىردەگى پەريناتالدىق ورتالىقتار بازاسىندا «ءبىر كۇندىك كلينيكالار» ۇيىمداستىرىلدى. مۇندا جۇكتى ايەلدەر كەپىلدىك بەرىلگەن مەديتسينالىق كومەك شەڭبەرىندە 5 ءتۇرلى زەرتتەۋدەن ءوتىپ، ناتيجەسىن كەلەسى كۇنى الادى.
2026-جىلى دياگنوستيكالىق زەرتتەۋلەرمەن 100 مىڭنان استام جۇكتى ايەل قامتىلىپ، 500 مىڭنان استام قىزمەت كورسەتىلگەن. ناتيجەسىندە ۇرىق كەمىستىكتەرىن انىقتاۋ كورسەتكىشى 13 پايىزعا ارتسا، نارەستە ءولىمىنىڭ كورسەتكىشى 15 پايىزعا تومەندەدى.
2025-جىلدان باستاپ قازاقستاندا ايەلدەردى سالاۋاتتى جۇكتىلىككە دايىنداۋعا باعىتتالعان «انالار ساۋلىعى» باعدارلاماسى ىسكە اسىرىلىپ كەلەدى. باعدارلاما اياسىندا ايەلدەرگە 12 ءتۇرلى مەديتسينالىق تەكسەرۋدەن تەگىن ءوتۋ مۇمكىندىگى قاراستىرىلعان.
جىل سايىن رەسپۋبليكادا 300 مىڭنان استام بوسانۋ قابىلدانادى. مەملەكەت انا مەن بالا دەنساۋلىعىن ساقتاۋعا جانە ءاربىر ايەلگە تۇرعىلىقتى جەرىنە نەمەسە قارجىلىق مۇمكىندىگىنە قاراماستان مەديتسينالىق كومەكتىڭ قولجەتىمدىلىگىن قامتاماسىز ەتۋگە باعىتتالعان جۇمىستاردى جالعاستىرىپ كەلەدى.
ايتا كەتەيىك، ەندى جۇكتىلىك پەن بوسانۋعا بايلانىستى تولەمدى ءموبيلدى قوسىمشا ارقىلى راسىمدەۋگە بولادى.