جاندىككە قازاقستاندىق تاريحشى، اكادەميك ماناش قوزىبايەۆتىڭ ەسىمى بەرىلدى. وسىلايشا، عالىمنىڭ اتى حالىقارالىق زوولوگيالىق نومەنكلاتۋرادا ماڭگىلىككە ساقتالماق.
بۇل جاڭالىق اكادەميكتىڭ تۋعانىنا 95 جىل تولۋىنا وراي قوزىبايەۆ ۋنيۆەرسيتەتىندە ءوتىپ جاتقان سالتاناتتى كەزدەسۋدە جاريالاندى. عالىمنىڭ مەرەيتويى 16-قاراشادا اتالىپ وتەدى.
Kozybayev University باسپا ءسوز قىزمەتىنىڭ مالىمەتىنشە، كوبەلەكتىڭ جاڭا ءتۇرى Scythobrya kozybayevi دەپ اتالدى. ونىڭ عىلىمي سيپاتتاماسى 12-قاراشادا حالىقارالىق Entomological Studies جۋرنالىندا جاريالانعان. جاڭا ءتۇردى قازاقستان مەن ۇلى بريتانيا ەنتومولوگتارى بىرلەسىپ زەرتتەگەن. عىلىمي جۇمىستىڭ اۆتورلارى - سەرگەي تيتوۆ پەن انتون ۆولىنكين.
زەرتتەۋشىلەردىڭ مالىمەتىنشە، بۋناق دەنەلى ءتۇن كوبەلەكتەرى تۇقىمداسىنا جاتاتىن Noctuidae توبىنىڭ Bryophilinae تارماعىنا كىرەدى.
- كوبەلەكتىڭ جاڭا تۇرىنە ماناش قوزىبايەۆتىڭ ەسىمىن بەرۋ ارقىلى ونىڭ عىلىمعا سىڭىرگەن ەڭبەگىنە قۇرمەت كورسەتۋدى ماقسات ەتتىك. ول عىلىمي وبەكتيۆتىلىك پەن تاريحي شىندىق قاعيداتتارىن ۇنەمى بەرىك ۇستاندى. عالىمنىڭ ەڭبەكتەرى ەلىمىزدىڭ زياتكەرلىك مۇراسىنىڭ اجىراماس بولىگىنە اينالىپ، بۇگىنگى جانە كەلەشەك زەرتتەۋشىلەر ءۇشىن باعىت-باعدار بولىپ كەلەدى، - دەيدى عالىمدار.
بۇل جاڭالىق قوزىبايەۆ ۋنيۆەرسيتەتى ءۇشىن دە ايرىقشا مانگە يە. سولتۇستىك قازاقستان ۋنيۆەرسيتەتىنە 2003 -جىلى اكادەميكتىڭ ەسىمى بەرىلگەن. سودان بەرى وقۋ ورنى عالىمنىڭ عىلىمي مۇراسىن دارىپتەپ، ونىڭ عىلىم مەن بىلىمگە قىزمەت ەتۋ ءداستۇرىن جالعاستىرىپ كەلەدى.