جاڭا ەرەجەگە سايكەس، شەتەلدىك ديپلومدى تانۋ ءۇشىن ءوتىنىش پەن قاجەتتى قۇجاتتاردى حالىققا قىزمەت كورسەتۋ ورتالىعى نەمەسە ەلەكتروندى پورتال ارقىلى تاپسىرۋعا بولادى. وتىنىشكە ءبىلىم تۋرالى ديپلوم جانە وعان قوسىمشا قوسا بەرىلەدى. ەگەر قۇجات شەتەل تىلىندە بەرىلسە، ونىڭ قازاق نەمەسە ورىس تىلىندەگى نوتاريالدى كۋالاندىرىلعان اۋدارماسى قاجەت. حالىقارالىق كەلىسىمدەرگە سايكەس اپوستيل قويۋ نەمەسە زاڭداستىرۋ تالاپ ەتىلمەيتىن ەلدەر ءۇشىن بۇل راسىمدەر جۇرگىزىلمەيدى.
مەديسينالىق جانە فارماسيەۆتيكالىق ماماندىقتار بويىنشا شەتەلدە الىنعان ديپلومداردى، ونىڭ ىشىندە ينتەرناتۋرا تۋرالى قۇجاتتاردى تانۋدىڭ جەكە ءتارتىبى ەنگىزىلەدى. مۇنداي قۇجاتتاردىڭ ءتۇپنۇسقالىعى تەكسەرىلىپ، ديپلوم بەرگەن ۇيىمنىڭ ءتيىستى ءبىلىم بەرۋ قىزمەتىن جۇزەگە اسىرۋعا قۇقىعى بولعان-بولماعانى انىقتالادى. سونىمەن قاتار ءبىلىم دەڭگەيى دەنساۋلىق ساقتاۋ سالاسىنداعى ۋاكىلەتتى ورگان ۇسىنعان ساراپشىلاردىڭ قاتىسۋىمەن باعالانادى.
مەديسينالىق، فارماسيەۆتيكالىق جانە پەداگوگيكالىق باعىتتار بويىنشا حالىقارالىق كەلىسىم بولماعان جاعدايدا قۇجاتتار قازاقستان زاڭناماسىنىڭ تالاپتارىنا سايكەستىگى تۇرعىسىنان ساراپتامالىق باعالاۋدان وتەدى. قۇجاتتاردى حالىقارالىق كەلىسىمدەر نەگىزىندە تانۋ ءراسىمى 8 جۇمىس كۇنى ىشىندە جۇرگىزىلەدى. ەگەر شەتەلدىك ديپلوم تۋرالى مالىمەت ءتيىستى دەرەكقوردان تابىلماسا، قۇجات بەرىلگەن ەلدىڭ ۋاكىلەتتى ورگانىنا رەسمي سۇراۋ جىبەرىلەدى. ەگەر وعان 20 جۇمىس كۇنى ىشىندە جاۋاپ كەلمەسە، كەيىنگى ەكى جۇمىس كۇنى ىشىندە مەملەكەتتىك قىزمەت كورسەتۋدەن باس تارتۋ تۋرالى ءۋاجدى شەشىم شىعارىلادى. قاجەتتى جاۋاپ الىنعان جاعدايدا ديپلومدى تانۋ تۋرالى شەشىم نەمەسە باس تارتۋ تۋرالى قۇجات 2 جۇمىس كۇنى ىشىندە راسىمدەلەدى. شەتەلدە الىنعان عىلىمي دارەجە تۋرالى قۇجاتتاردى تانۋ ءتارتىبى دە ناقتىلاندى. بۇل ءراسىم ەكى كەزەڭ بويىنشا جۇرگىزىلەدى. جاڭا ەرەجەلەر 2026 -جىلعى 30 -تامىزدان باستاپ كۇشىنە ەنەدى.
24.kz