ءتيىستى شارالار ەلدىڭ بىلىكتى ماماندار، ينۆەستورلار مەن كاسىپكەرلەر ءۇشىن اشىقتىعىن ارتتىرۋعا باعىتتالعان قازاقستان رەسپۋبليكاسى پرەزيدەنتىنىڭ جارلىعى اياسىندا جۇزەگە اسىرىلادى.
— ەڭبەك جانە حالىقتى الەۋمەتتىك قورعاۋ مينيسترلىگى كوشى-قون زاڭناماسىن كەشەندى جاڭارتۋدى كوزدەيتىن زاڭ جوباسىن ازىرلەدى. قۇجات ەڭبەك نارىعىنىڭ ناقتى قاجەتتىلىكتەرىن ەسكەرە وتىرىپ، سۇرانىسقا يە مامانداردى ماقساتتى تۇردە تارتۋ تەتىگىن ەنگىزەدى. نەگىزگى جاڭاشىلدىقتاردىڭ ءبىرى - ۇكىمەت بەكىتەتىن باسىم ماماندىقتار تىزبەسىن قالىپتاستىرۋ. وعان قازىرگى ۋاقىتتا كادر تاپشىلىعى ايقىن بايقالاتىن اقپاراتتىق تەحنولوگيالار، دەنساۋلىق ساقتاۋ، ءبىلىم بەرۋ جانە مادەنيەت سالالارىنداعى ماماندار ەنگىزىلەدى دەپ كۇتىلەدى، — دەلىنگەن حابارلامادا.
زاڭ جوباسى سونداي-اق جۇمىس بەرۋشىلەردىڭ شاقىرۋى بويىنشا شەتەلدىك مامانداردى تارتۋدىڭ اشىق ءارى تۇسىنىكتى شارتتارىن ايقىندايدى.
بۇدان بولەك، قازاقستاندا جۇمىس ىستەۋ جانە ءومىر ءسۇرۋ ءۇشىن باسەكەگە قابىلەتتى جاعدايلار قالىپتاستىرۋعا ەرەكشە نازار اۋدارىلعان. اتاپ ايتقاندا، «التىن Visa» باعدارلاماسىنىڭ مۇمكىندىكتەرى كەڭەيتىلەدى. شەتەلدىك ماماندار بەلگىلەنگەن ەڭبەك وتىلىنەن كەيىن ۇزاق مەرزىمدى رەزيدەنت مارتەبەسىن (Resident ID) الۋعا ۇمىتكەر بولا الادى.
بۇل مارتەبە ءبىرقاتار ماڭىزدى ارتىقشىلىققا جول اشادى. ولاردىڭ قاتارىندا سالىقتىق جەڭىلدىكتەر، قارجىلىق قىزمەتتەرگە قول جەتكىزۋ، دەنساۋلىق ساقتاۋ مەن ءبىلىم بەرۋ سالالارىنداعى كەڭەيتىلگەن مۇمكىندىكتەر، سونداي- اق كۆوتالىق شەكتەۋلەرسىز جۇمىس ىستەۋ قۇقىعى بار.
اتالعان نورمالاردى ىسكە اسىرۋ، ەڭ الدىمەن، شەتەلدىك مامانداردى تارتۋ ارقىلى قازاقستاندىق كادرلارعا ءبىلىم مەن تاجىريبە بەرۋدى قامتاماسىز ەتەدى. سونىمەن قاتار بۇل شارالار كادر تاپشىلىعىن ازايتۋعا، تەحنولوگيالىق دامۋدى جەدەلدەتۋگە، ەڭبەك ونىمدىلىگىن ارتتىرۋعا جانە جالپى ەكونوميكالىق وسىمگە وڭ اسەر ەتۋگە مۇمكىندىك بەرەدى.
ۇزاق مەرزىمدى پەرسپەكتيۆادا مۇنداي قادامدار قازاقستاننىڭ بىلىكتى ماماندار مەن وزىق تەحنولوگيالاردى تارتاتىن وڭىرلىك ورتالىققا اينالۋىنا ىقپال ەتۋى مۇمكىن.
- قازىر زاڭ جوباسى مەملەكەتتىك ورگاندار اراسىندا كەلىسۋ راسىمىنەن ءوتىپ جاتىر. سونىمەن قاتار ەڭبەك جانە حالىقتى الەۋمەتتىك قورعاۋ مينيسترلىگى سۇرانىسقا يە ماماندىقتار تىزبەسىن 51-دەن 174-كە دەيىن كەڭەيتۋ باعىتىندا جۇمىس جۇرگىزەدى. اتالعان تىزبە قازاقستان رەسپۋبليكاسى ۇكىمەتىنىڭ قاۋلىسىمەن بەكىتىلەتىن بولادى. تىزىمگە اتوم ونەركاسىبى، ەنەرگەتيكا، بيوتەحنولوگيا جانە گەنومدىق مەديتسينا، دەنساۋلىق ساقتاۋ، يادرولىق ەنەرگەتيكا، سۋ رەسۋرستارى مەن يرريگاتسيا سياقتى سالالارداعى ماماندىقتار ەنگىزىلەدى، - دەلىنگەن حابارلامادا.
قابىلداناتىن شارالار قازاقستاننىڭ جاھاندىق دەڭگەيدە بىلىكتى ءۇشىن باسەكەدەگى پوزيتسياسىن نىعايتىپ، ەكونوميكانىڭ نەگىزگى سالالارىنا بىلىكتى ماماندار اعىنىن قامتاماسىز ەتەدى دەپ كۇتىلەدى.
وسىدان بۇرىن ەڭبەك مينيسترلىگى بيىل ينكليۋزيۆتى جۇمىسپەن قامتۋ مۇمكىندىگى كەڭەيتىلەتىنىن العا تارتتى.