بۇل تالاپ تەك ا ق ش دوللارىنا ەمەس، ەۋرو، فۋنت، يۋان جانە باسقا دا شەتەل ۆاليۋتالارىنا قولدانىلادى. قولما-قول اقشانىڭ جالپى سوماسى قازاقستان ۇلتتىق بانكىنىڭ ەلدەن شىعاتىن كۇنگە بەلگىلەگەن رەسمي باعامى بويىنشا ەسەپتەلەدى.
مىسالى، جولاۋشى بىرنەشە شەتەل ۆاليۋتاسىن بىرگە الىپ شىقسا، ولاردىڭ بارلىعى ا ق ش دوللارىنا شاقتالىپ، جالپى سوماسى ەسەپتەلەدى.
ۆاليۋتا باعامىن الدىن الا تەكسەرۋ قاجەت
قولما-قول اقشا ساپاردان بىرنەشە كۇن نەمەسە اپتا بۇرىن دايىندالۋى مۇمكىن. الايدا وسى ارالىقتا ۆاليۋتا باعامى وزگەرسە، جولاۋشىنىڭ اقشاسى 10 مىڭ دوللار بالاماسىنان اسىپ كەتۋى ىقتيمال. سوندىقتان ساپارعا شىعار الدىندا ۇلتتىق بانكتىڭ سول كۇنگە ارنالعان رەسمي باعامىن تەكسەرگەن ءجون.
قازاقستاننان 10 مىڭ ا ق ش دوللارى بالاماسىنان اساتىن قولما-قول شەتەل ۆاليۋتاسىن اكەتۋگە پرەزيدەنتتىڭ «قازاقستان رەسپۋبليكاسىنىڭ قارجىلىق تۇراقتىلىعىن قامتاماسىز ەتۋ شارالارى تۋرالى» 830-جارلىعىمەن تىيىم سالىنعان.
ماڭىزدىسى - ليميتتەن اسقان اقشانى كەدەندىك دەكلاراتسيادا كورسەتۋدىڭ ءوزى ونى ەلدەن الىپ شىعۋعا رۇقسات بەرمەيدى. قولدانىستاعى شەكتەۋ بويىنشا 10 مىڭ دوللاردان اساتىن قولما-قول شەتەل ۆاليۋتاسىن دەكلاراتسيا نەمەسە اقشانىڭ شىعۋ تەگىن راستايتىن قۇجاتتار بولعان كۇننىڭ وزىندە اكەتۋگە بولمايدى.
شەكتەۋ ءار ادامعا جەكە ەسەپتەلە مە؟
10 مىڭ ا ق ش دوللارى كولەمىندەگى شەك ءاربىر جەكە تۇلعاعا، سونىڭ ىشىندە كامەلەتكە تولماعان بالالارعا دا قولدانىلادى.
وتباسى بىرگە ساپارعا شىققان جاعدايدا ونىڭ ءار مۇشەسىنە 10 مىڭ دوللار بالاماسىنان اسپايتىن قولما-قول شەتەل ۆاليۋتاسىن الىپ شىعۋعا رۇقسات ەتىلەدى. ال 16 جاسقا تولماعان بالانىڭ اقشاسى ونىمەن بىرگە جۇرگەن ەرەسەك ادامنىڭ جولاۋشىلار كەدەندىك دەكلاراتسياسىندا كورسەتىلەدى.
اقشانى قول جۇگىنە سالۋ كەرەك پە؟
قازاقستان زاڭناماسىندا قولما-قول اقشانى تەك قول جۇگىندە نەمەسە مىندەتتى تۇردە تىركەلگەن باگاجدا تاسىمالداۋ جونىندە جەكە تالاپ قاراستىرىلماعان. بۇل رەتتە جولاۋشى اۋە كومپانياسىنىڭ باگاج تاسىمالداۋ ەرەجەلەرىن باسشىلىققا الۋى قاجەت. دەگەنمەن اقشانىڭ قاي جەردە تۇرعانىنا قاراماستان، ءبىر ادامعا بەلگىلەنگەن 10 مىڭ ا ق ش دوللارى كولەمىندەگى شەكتەۋ وزگەرمەيدى.
قاۋىپسىزدىك تۇرعىسىنان ءىرى كولەمدەگى قولما-قول اقشانى تىركەلگەن باگاجعا سالماعان دۇرىس. باگاج جوعالسا نەمەسە بۇلىنسە، اقشانى قايتارۋ قيىن بولۋى مۇمكىن.
ليميتتەن اسىپ كەتسە نە بولادى؟
جولاۋشى بەلگىلەنگەن شەكتەن ارتىق قولما-قول شەتەل ۆاليۋتاسىن الىپ شىعۋعا ارەكەتتەنسە، وعان قاتىستى اكىمشىلىك ءىس قوزعالۋى مۇمكىن.
مەملەكەتتىك كىرىستەر ورگاندارىنىڭ تۇسىندىرۋىنشە، مىندەتتى دەكلاراتسيالاۋعا جاتاتىن اقشانى دەكلاراتسيالاماعانى نەمەسە دۇرىس كورسەتپەگەنى ءۇشىن دەكلاراتسيالانباعان سومانىڭ 25 پايىزى كولەمىندە ايىپپۇل جانە اقشانى تاركىلەۋ كوزدەلگەن. ءىس بويىنشا تۇپكىلىكتى شەشىمدى سوت قابىلدايدى.
Tengri Travel سايتى جاريالاعان اقپاراتتا زاڭگەر دانيار بايعاباتوۆ تاجىريبەدە تۋريستىك اگەنتتىڭ شەتەلدەگى قوناق ءۇي اقىسىن تولەۋ ءۇشىن بەلگىلەنگەن ليميتتەن ارتىق قولما-قول اقشا الىپ شىقپاق بولعان جاعداي كەزدەسكەنىن ايتتى.
«سوت ونى جاۋاپقا تارتتى، ءبىراق اقشاسىن تاركىلەمەدى. ايتا كەتەيىك، تۋريستىك اگەنت سول كۇنى شەتەلگە شىققان جوق»، - دەدى زاڭگەر.
دەمەك، اقشانىڭ قوناق ءۇي، ەمدەلۋ نەمەسە باسقا شىعىنداردى تولەۋگە ارنالعانى جاۋاپكەرشىلىكتەن اۆتوماتتى تۇردە بوساتپايدى.
نەنى ەستە ۇستاۋ كەرەك؟
شەتەلگە شىعار الدىندا:
قولما-قول ۆاليۋتانىڭ جالپى سوماسىن ەسەپتەۋ؛
ۇلتتىق بانكتىڭ ساپار كۇنىندەگى رەسمي باعامىن تەكسەرۋ؛
بارلىق ۆاليۋتانى ا ق ش دوللارىنا شاقتاۋ؛
ءبىر ادامعا بەلگىلەنگەن 10 مىڭ دوللارلىق شەكتەن اسپاۋ؛
باراتىن ەلدىڭ ۆاليۋتالىق جانە كەدەندىك تالاپتارىن الدىن الا ءبىلۋ قاجەت.
ەرەجەلەر ساپار باعىتى مەن شەكارادان ءوتۋ تارتىبىنە قاراي ەرەكشەلەنۋى مۇمكىن. سوندىقتان جولعا شىعار الدىندا مەملەكەتتىك كىرىستەر كوميتەتىنىڭ رەسمي تۇسىندىرمەلەرىن جانە باراتىن ەلدىڭ كەدەن تالاپتارىن تەكسەرگەن ءجون.