جاڭا كەشەن الاتاۋ قالاسىندا قالىپتاسىپ جاتقان ىسكەرلىك ورتالىقتىڭ نەگىزگى نىساندارىنىڭ بىرىنە اينالادى. ينۆەستيتسيا كولەمى $800 ميلليوننان اساتىن جوبا اياسىندا بيىكتىگى 272 جانە 78 مەتر بولاتىن ەكى مۇنارا سالىنادى. مۇندا كەڭسەلەر، تۇرعىن ءۇي، قوناقۇي، ساۋدا ورىندارى مەن قوعامدىق كەڭىستىكتەر ورنالاسادى.
سالتاناتتى راسىمدە ءسوز سويلەگەن قانات بوزىمبايەۆ الاتاۋ قالاسىنىڭ دامۋى پرەزيدەنت قاسىم-جومارت توقايەۆتىڭ تۇراقتى باقىلاۋىندا ەكەنىن اتاپ ءوتتى. مەملەكەت باسشىسىنىڭ باستاماسىمەن قالادا ينۆەستورلارعا قولايلى جاعداي جاساۋعا جانە زاماناۋي باسقارۋ جۇيەسىن قالىپتاستىرۋعا باعىتتالعان ارنايى قۇقىقتىق رەجيم كەزەڭ-كەزەڭىمەن ەنگىزىلىپ وتىر.
قابىلدانىپ جاتقان شارالار ينۆەستيتسيالىق بەلسەندىلىكتىڭ ارتۋىنا ىقپال ەتەدى. 2026 -جىلدىڭ توعىز ايىندا الاتاۋ قالاسىنىڭ نەگىزگى كاپيتالىنا سالىنعان ينۆەستيتسيا كولەمى 1,6 ەسەگە ءوسىپ، 70,3 ميلليارد تەڭگەگە جەتتى. جالپى قالانىڭ ينۆەستيتسيالىق پورتفەلىندە قۇنى شامامەن $6,9 ميللياردتى قۇرايتىن 67 جوبا بار. ولاردى جۇزەگە اسىرۋ ناتيجەسىندە 55 مىڭعا جۋىق جۇمىس ورنىن اشۋ كوزدەلگەن.
ينۆەستيتسيالىق جوبالاردى جۇزەگە اسىرۋمەن قاتار قالانىڭ ينفراقۇرىلىمى دا دامىپ كەلەدى. قازىرگى ۋاقىتتا رەزەرۆتەن 35,3 ميلليارد تەڭگە بولىنگەن 28 جوبا بويىنشا جۇمىس جۇرگىزىلۋدە. اتاپ ايتقاندا، «كوكپا-1» قوسالقى ستانساسى قايتا جاڭعىرتىلدى، سۋمەن جابدىقتاۋ نىساندارى سالىنىپ، اۆتوموبيل جولدارى جوندەلۋدە. بۇل جاڭا كاسىپورىنداردى ىسكە قوسۋعا جانە قۇرىلىس جۇمىستارىن ودان ءارى جۇرگىزۋگە قاجەتتى جاعداي جاسايدى.
ۆيسە-پرەمەر Iconic Complex كەشەنىنىڭ قۇرىلىس ساپاسى مەن قاۋىپسىزدىگىنە ەرەكشە نازار اۋداردى. ول بەلگىلەنگەن مەرزىمدەردى، سەيسميكالىق قاۋىپسىزدىك پەن ەنەرگيا تيىمدىلىگى تالاپتارىن قاتاڭ ساقتاپ، سونداي-اق قازاقستاندىق كومپانيالار مەن مامانداردى تارتۋ قاجەتتىگىن اتاپ ءوتتى.
سونىمەن قاتار ارنايى قۇقىقتىق رەجيم اياسىندا حالىقارالىق ساراپشىلاردى تارتا وتىرىپ، جوبالاۋ قۇجاتتاماسىنا تاۋەلسىز تەحنيكالىق ساراپتاما جۇرگىزۋ تەتىگى ەنگىزىلدى. بۇل كۇردەلى قۇرىلىس جوبالارىن باعالاۋ كەزىندە وزىق حالىقارالىق تاجىريبەنى قولدانۋعا مۇمكىندىك بەرەدى.
- Iconic Complex جوبالاۋ مەن قۇرىلىس ساپاسىنىڭ جاڭا ستاندارتىن قالىپتاستىرىپ، الاتاۋدىڭ زاماناۋي قالا رەتىندە دامۋىنا ۇلەس قوسادى دەپ سەنەمىز. جوبا بەلگىلەنگەن مەرزىمدە، ساپا مەن قاۋىپسىزدىكتىڭ جوعارى تالاپتارىن ساقتاي وتىرىپ جۇزەگە اسىرىلۋى ءتيىس، — دەدى قانات بوزىمبايەۆ.
Iconic Complex جوباسىنىڭ باس مەردىگەرى — China State Construction Engineering Corporation (CSCEC) كومپانياسى. كەشەننىڭ ساۋلەتتىك تۇجىرىمداماسىن امەريكالىق Skidmore, Owings &Merrill (SOM) ساۋلەت بيۋروسى ازىرلەدى. قۇرىلىستى 2029 -جىلدىڭ سوڭىنا دەيىن اياقتاۋ جوسپارلانعان.
ايتا كەتەيىك، بۇعان دەيىن قانات بوزىمبايەۆ الاتاۋعا بىلىكتى كادرلاردى تارتۋ جوسپارىن ايتقان بولاتىن.