پلاتفورمادا 57 جاتتىعۋ سيفرلانعان. جۇيە بالانىڭ قوزعالىسىن، رەاكسياسى مەن جاتتىعۋ تەحنيكاسىن تالدايدى. سونىڭ نەگىزىندە لايىقتى سپورت ءتۇرىن ۇسىنادى. ال ناتيجەسى سپورت فەدەراتسيالارىنا جىبەرىلەدى.
بۇل اسىرەسە اۋىلداعى بالالاردىڭ قابىلەتىن ەرتە بايقاۋعا مۇمكىندىك بەرەدى. قازىر پلاتفورمانى 3 مىڭعا جۋىق ادام پايدالانىپ ءجۇر.
- ءبىر بالا كۇش جاتتىعۋلارىن جاقسى ورىنداۋى مۇمكىن. ەكىنشىسىنىڭ رەاكسياسى مەن كوورديناتسياسى جوعارى بولادى. پلاتفورما وسى كورسەتكىشتەردى جيناپ، تالداۋ ارقىلى بالانىڭ قاي سپورت باعىتىنا بەيىمى جوعارى ەكەنىن انىقتاۋعا كومەكتەسەدى. ناتيجەسىندە ءتيىستى اقپارات سپورت فەدەراتسيالارىنا ۇسىنىلادى. بۇل دەرەكتەر جاتتىقتىرۋشىنىڭ جەكە كابينەتىندە دە كورىنەدى، - دەدى Ai Sport پلاتفورماسىنىڭ ديرەكتورى عابيت سالتابايەۆ.
AI Sport پلاتفورماسى ءتورت اي بۇرىن ىسكە قوسىلعان. الايدا جوبا اۆتورلارى وعان دەيىن ەكى-ءۇش جىل بويى سپورت پەن تەحنولوگيانى ۇشتاستىرۋ باعىتىندا زەرتتەۋ جۇرگىزگەن.
-ءوزىم باسكەتبولدان سپورت شەبەرىمىن. سپورت سالاسىندا 20 جىلدان استام ۋاقىت جۇمىس ىستەپ كەلەمىن. تەحنولوگيا باعىتىنا ءۇش جىل بۇرىن كەلدىم. Ai Sport - وسى باعىتتاعى ءۇشىنشى جوبامىز. الدىڭعى جوبالاردىڭ تاجىريبەسىنە سۇيەنىپ ازىرلەدىك، - دەدى عابيت سالتابايەۆ.
پلاتفورمادا جالپى جاتتىعۋلاردان بولەك، سپورتتىڭ التى باعىتىن سيفرلاندىرۋ جۇمىسى ءجۇرىپ جاتىر. ولاردىڭ قاتارىندا باسكەتبول، ۇستەل تەننيسى، فۋتبول، بوكس جانە دزيۋدو بار.
مىسالى، ۇستەل تەننيسىندە جۇيە سپورتشىنىڭ قوزعالىسىن، سوققى تەحنيكاسىن جانە جىلدامدىعىن تالداي الادى. وڭ جانە سول جاقتان جاسالعان سوققىلاردى باعالاپ، سپورتشىنىڭ قاتەلەرىن كورسەتۋگە مۇمكىندىك بەرەدى.
جوبا اۆتورلارىنىڭ ايتۋىنشا، جاساندى ينتەللەكت جاتتىقتىرۋشىنى الماستىرمايدى. كەرىسىنشە، ماماننىڭ جۇمىسىن جەڭىلدەتىپ، سپورتشىنىڭ ناتيجەسىن جۇيەلى باقىلاۋعا كومەكتەسەدى.
-ءبىزدىڭ ماقساتىمىز - جاتتىقتىرۋشىنى الماستىرۋ ەمەس. وعان قوسىمشا قۇرال ۇسىنۋ. سپورتشىنىڭ كۇندەلىكتى جاتتىعۋى تۋرالى دەرەكتەر جيناقتالسا، مامان ونىڭ پروگرەسىن باقىلاپ، جاتتىعۋ پروتسەسىن ءتيىمدى جوسپارلاي الادى، - دەدى ول.
بۇگىنگى جيىن بارىسىندا قازاق ۇلتتىق سپورت ۋنيۆەرسيتەتىمەن ىنتىماقتاستىق تۋرالى مەموراندۋمعا قول قويدى. ەندى ۋنيۆەرسيتەتتىڭ عىلىمي ورتالىعى بازاسىندا سپورت، تەحنولوگيا جانە جاساندى ينتەللەكت باعىتتارىن ۇشتاستىراتىن زەرتتەۋلەر جۇرگىزىلەدى.
ءارى، بۇل پلاتفورمادا وقىتۋشىلار مەن ستۋدەنتتەرگە ارنالعان جەكە كابينەتتەر دە بار. وقىتۋشىلار ستۋدەنتتەرگە ءۇي تاپسىرماسىن بەرىپ، ولاردىڭ جاتتىعۋ ناتيجەسىن دە باقىلاي الادى.
Ai Sport ازىرلەۋشىلەرى پلاتفورمانى الداعى ۋاقىتتا شەتەل نارىعىنا شىعارۋدى دا جوسپارلاپ وتىر.
- جۇيە بۇقارالىق سپورتتى قولجەتىمدى ەتۋگە باعىتتالعان. پايدالانۋشىلار ءۇشىن نەگىزگى مۇمكىندىكتەر مەن چەللەندجدەر تەگىن ۇسىنىلادى، ال كورپوراتيۆتىك كومپانيالارعا ارنالعان قىزمەتتەر جازىلىم نەگىزىندە كورسەتىلەدى، - دەدى ول.
ايتا كەتەيىك، جاساندى ينتەللەكتىگە نەگىزدەلگەن وتاندىق ستارتاپ توكيوداعى فورۋمدا تانىستىرىلماق.