ەڭبەك جانە حالىقتى الەۋمەتتىك قورعاۋ مينيسترلىگى وكىلدەرى بۇل جۇيەنى كىمدەر پايدالانا الاتىنىن، ول ءۇشىن قانداي شارتتار ورىندالۋى كەرەك ەكەنىن ءتۇسىندىردى.
50 جاستان باستاپ كىمدەر زەينەتاقى تولەمىن الا الادى؟
بۇل تۇستا زەينەتاقى اننۋيتەتى تۋرالى ءسوز بولىپ وتىر. زەينەتاقى اننۋيتەتى بويىنشا ازامات ءوزىنىڭ زەينەتاقى جيناعىن ءومىردى ساقتاندىرۋ كومپانياسىنا اۋدارادى. ال كومپانيا وعان ءومىر بويى تۇراقتى تولەم جاساپ وتىرۋعا مىندەتتەمە الادى. دەمەك، تولەم ادامعا ءومىر بويى بەرىلەدى.
2026-جىلى مۇنداي تولەمدەردى مىنا ادامدار الا باستايدى:
ەر ادامدار - 55 جاستان باستاپ؛
ايەلدەر - 53 جاستان باستاپ؛
كەمىندە 60 اي بويى مىندەتتى كاسىپتىك زەينەتاقى جارناسى تولەنگەن ازاماتتار - 50 جاستان باستاپ.
سوڭعى شارت زيان ەڭبەك جاعدايىنا بايلانىستى جۇمىس بەرۋشىلەرى ارنايى زەينەتاقى جارناسىن اۋدارعان قىزمەتكەرلەرگە قاتىستى.
دەگەنمەن وسى جاستا بولۋ عانا جەتكىلىكسىز. زەينەتاقى اننۋيتەتى بويىنشا زەينەتاقى جيناعىندا جەتكىلىكتى قاراجات بولۋى كەرەك. قاجەت سوما ءار ادامعا جەكە ەسەپتەلەدى. بۇل رەتتە ازاماتتىڭ جاسى مەن بولاشاق تولەمدەردىڭ مولشەرى دە ەسكەرىلەدى.
تولەمدى بۇدان دا ەرتە راسىمدەۋگە بولا ما؟
سونىمەن قاتار، قازاقستاندا كەيىنگە قالدىرىلعان زەينەتاقى اننۋيتەتى جۇمىس ىستەيدى. مۇنداي كەلىسىمشارت ارقىلى بولاشاق تولەمدەردىڭ شارتتارىن الدىن الا بەلگىلەۋگە بولادى.
مۇنداي كەلىسىمشارتتى مىنا جاعدايلاردا راسىمدەۋگە بولادى:
45 جاستان باستاپ - زەينەتاقى جيناعى جەتكىلىكتى بولعان جاعدايدا؛
40 جاستان باستاپ - كەمىندە 60 اي بويى مىندەتتى كاسىپتىك زەينەتاقى جارناسى تولەنگەن بولسا.
بۇل رەتتە 40 نەمەسە 45 جاستا كەلىسىمشارت جاساۋ تولەم بىردەن باستالادى دەگەندى بىلدىرمەيدى. ول كەيىن، بەلگىلەنگەن جاسقا تولعاندا عانا تاعايىندالادى.
زەينەتاقى جيناعى تاۋسىلىپ قالسا نە بولادى؟
زەينەتاقى اننۋيتەتىنىڭ باستى ەرەكشەلىگى سول - تولەمگە ءومىر بويىنا كەپىلدىك بەرىلەدى. ءتىپتى تولەمنىڭ جالپى سوماسى باستاپقىدا اۋدارىلعان قاراجاتتان اسىپ كەتسە دە، تولەم جالعاسا بەرەدى.
سونىمەن قاتار، تولەم مولشەرى جىل سايىن ارتىپ وتىرۋعا ءتيىس. بەلگىلەنگەن يندەكساتسيا مولشەرلەمەسى كەمىندە 8 پايىز بولادى. ناقتى شارتتار ساقتاندىرۋ كومپانياسىمەن ارادا جاسالاتىن كەلىسىمشارتتا كورسەتىلەدى.
مينيسترلىك مالىمەتىنشە، بيىل العاشقى سەگىز ايدا زەينەتاقى اننۋيتەتى بويىنشا ساقتاندىرۋ تولەمى 81,5 ميلليارد تەڭگە بولعان. ساقتاندىرۋ جارنالارىنىڭ كولەمى 624,7 ميلليارد تەڭگەگە جەتكەن.