بايقاۋدىڭ شارتتارى مەن اندەرگە قويىلاتىن تالاپتار باسپا ءسوز ءماسليحاتىندا تانىستىرىلدى.
بايقاۋ وتانعا، تۋعان جەرگە دەگەن سۇيىسپەنشىلىكتى دارىپتەيتىن جاڭا اندەردى جارىققا شىعارۋعا باعىتتالعان. ۇيىمداستىرۋشىلار اسىرەسە جاستاردىڭ تالعامىنا ساي، زاماناۋي باعىتتاعى پاتريوتتىق شىعارمالاردىڭ جازىلۋىنا ءمان بەرىپ وتىر.
تاپسىرىسپەن جازىلعان ءان حالىقتىڭ جۇرەگىنەن ورىن الا ما؟
باسپا ءسوز ماسليحاتىندا اقىن، ساراپشىلار كەڭەسىنىڭ مۇشەسى قالقامان سارين ارنايى بايقاۋ ارقىلى پاتريوتتىق ءان جازدىرۋ ماسەلەسىنە قاتىستى پىكىر ءبىلدىردى. ول شىعارماشىلىققا تاپسىرىس بەرۋ ونەردىڭ تابيعاتىنا قايشى كەلمەيتىنىن ايتىپ، تاريحتان مىسال كەلتىردى.
ونەرگە تاپسىرىس بەرۋ قانشالىقتى دۇرىس؟ ءان بايقاۋ ارقىلى دۇنيەگە كەلە مە؟ اسىرەسە پاتريوتتىق اندەر ادامنىڭ جان دۇنيەسىنەن، سەزىمىنەن تۋماي ما دەگەن سۇراقتاردىڭ بولۋى زاڭدى. ءبىراق تاپسىرىس بەرۋ دەگەنىمىز - ونەردى شەكتەۋ نەمەسە نۇسقاۋلىق بەرۋ ەمەس. بۇل - قوعامعا قاجەتتى تاقىرىپتارعا نازار اۋدارتۋ. ادەبيەت پەن ونەر تاريحىندا ءتۇرلى شىعارماشىلىق تاپسىرىستار مەن بايقاۋلاردىڭ ناتيجەسىندە دۇنيەگە كەلگەن جاقسى تۋىندىلار بار، - دەدى قالقامان سارين.
اقىن ەسكەندىر حاسانعاليەۆتىڭ «اتامەكەن» ءانىن مىسالعا كەلتىردى. ونىڭ ايتۋىنشا، بۇل تۋىندىنىڭ 1970-جىلى قازاقستاننىڭ 50 جىلدىعىنا ارنالىپ جازىلعانى تۋرالى دەرەكتەر بار. قالقامان سارين قوعامدىق سۇرانىس پەن شىنايى شىعارماشىلىق ۇشتاسسا، حالىقتىڭ جادىندا ۇزاق ساقتالاتىن اندەر دۇنيەگە كەلۋى مۇمكىن دەپ ەسەپتەيدى.
بايقاۋعا قانداي اندەر قابىلدانادى؟
كونكۋرسقا بۇرىن ەش جەردە جاريالانباعان جانە ورىندالماعان جاڭا شىعارمالار عانا قابىلدانادى.
قاتىسۋشىلار اندەرىن ءۇش باعىت بويىنشا ۇسىنا الادى:
مارش ىرعاعىنداعى ەكپىندى، جىگەرلى اندەر؛
وتانعا دەگەن سۇيىسپەنشىلىكتى جەتكىزەتىن باياۋ، ليريكالىق اندەر؛
جاستاردىڭ تالعامىنا ساي زاماناۋي پاتريوتتىق اندەر.
ءبىر اۆتور بىرنەشە باعىت بويىنشا باق سىناي الادى.
بايقاۋ ەرەجەسىنە سايكەس، وعان قازاقستان اۋماعىندا تۇراتىن ازاماتتاردىڭ بارلىعى قاتىسۋعا قۇقىلى. ال شەتەلدەگى قانداستاردىڭ قاتىسۋىنا قاتىستى ماسەلە ازىرگە قاراستىرىلماعان. دەگەنمەن ۇيىمداستىرۋشىلار مۇنداي ۇسىنىستار تۇسسە، ونى ساراپشىلار كەڭەسىنىڭ تالقىلاۋىنا شىعارۋى مۇمكىن.
جاساندى ينتەللەكت ارقىلى ءان جازۋعا بولا ما؟
ساراپشىلار كەڭەسىنىڭ مۇشەسى، كومپوزيتور رەنات گايسين بايقاۋدا شىعارمانىڭ اۋەنى مەن ماتىنىنە ەرەكشە ءمان بەرىلەتىنىن ايتتى. ونىڭ سوزىنشە، ءاننىڭ ەستە ساقتالۋى، ءماتىنىنىڭ تەرەڭدىگى جانە تىڭدارمانعا اسەرى نەگىزگى باعالاۋ تالاپتارىنىڭ قاتارىندا.
سونداي-اق ول قاتىسۋشىلاردىڭ جاساندى ينتەللەكت مۇمكىندىكتەرىن پايدالانۋىنا قاتىستى تالاپتاردى ءتۇسىندىردى.
قازىر كوپتەگەن ءان Suno نەمەسە باسقا باعدارلامالاردىڭ كومەگىمەن جاسالىپ جاتىر. ءبىز جاساندى ينتەللەكتتى تەك ارانجيروۆكا جاساۋ ءۇشىن قولدانۋعا رۇقسات بەرەمىز. ءاندى MP3 نەمەسە WAV فورماتىندا ۇسىنۋعا بولادى. دومبىرامەن ورىنداساڭىز دا، گيتارامەن ورىنداساڭىز دا، ءتىپتى ءبىر اسپاپتىڭ سۇيەمەلدەۋىمەن جازساڭىز دا قابىلدايمىز. ەڭ ماڭىزدىسى - اۋەن مەن ءماتىن، - دەدى رەنات گايسين.
كومپوزيتوردىڭ ايتۋىنشا، بايقاۋدا زاماناۋي مۋزىكالىق باعىتتاعى شىعارمالارعا دا كوڭىل بولىنەدى. سەبەبى پاتريوتتىق اندەر بۇگىنگى جاستاردىڭ مۋزىكالىق تالعامىنا ساي بولۋى كەرەك.
جۇلدە قورى - 30 ميلليون تەڭگە
بايقاۋدا بارلىعى 10 جۇلدەلى ورىن قاراستىرىلعان. باس جۇلدە يەگەرى 6 ميلليون تەڭگە الادى.
ءبىرىنشى ورىن ءۇش قاتىسۋشىعا بەرىلەدى. ولاردىڭ ءارقايسىسىنا 4 ميلليون تەڭگەدەن تابىستالادى. ەكىنشى ورىن العان ءۇش اۆتور 3 ميلليون تەڭگەدەن، ءۇشىنشى ورىن يەگەرلەرى 1 ميلليون تەڭگەدەن الادى. جۇلدە قورى دەمەۋشىلەر ەسەبىنەن قاراستىرىلعان.
قاتىسۋشىلاردىڭ شىعارمالارىن كومپوزيتورلار، اقىندار جانە كاسىبي مۋزىكا ماماندارىنان قۇرالعان ساراپشىلار كەڭەسى باعالايدى. ءاننىڭ كوركەمدىك ساپاسى، اۆتورلىق يدەياسىنىڭ ەرەكشەلىگى، ءماتىن مەن اۋەننىڭ ۇيلەسىمى جانە كەڭ اۋديتورياعا تارالۋ مۇمكىندىگى ەسكەرىلەدى.
وتىنىمدەر قاشانعا دەيىن قابىلدانادى؟
بايقاۋعا قاتىسۋ ءۇشىن جاڭا شىعارمالاردى 2026-جىلعى 5-جەلتوقسانعا دەيىن khabar.kz/konkurs سايتى ارقىلى جولداۋ قاجەت.
جەڭىمپازداردىڭ ەسىمى 16-جەلتوقسان - تاۋەلسىزدىك كۇنى قارساڭىندا جاريالانادى.
جوبانىڭ باستى اقپاراتتىق سەرىكتەسى - «حابار» اگەنتتىگى.