اۋىل شارۋاشىلىعى ءمينيسترى ايداربەك ساپاروۆتىڭ توراعالىعىمەن وتكەن كەڭەستە مال شارۋاشىلىعىن، ءونىمدى تەرەڭ وڭدەۋدى جانە اگروسالانى سيفرلاندىرۋدى دامىتۋ مىندەتتەرى تالقىلاندى. بۇل تۋرالى ا ش م ءمالىم ەتتى.
ايداربەك ساپاروۆ مەملەكەت باسشىسى قويعان مىندەتتەر ستراتەگيالىق باعدارلاردى ناقتى ەكونوميكالىق شەشىمدەرمەن ۇشتاستىرۋدى تالاپ ەتەتىنىن اتاپ ءوتتى. اگروونەركاسىپتىك كەشەن ءۇشىن بۇل ءوندىرىس كولەمىن ۇلعايتىپ قانا قويماي، سالانىڭ قۇرىلىمىن ساپالى وزگەرتۋ، اۋىل شارۋاشىلىعى ونىمدەرىن تەرەڭ وڭدەۋدى دامىتۋ، جاڭا ءوندىرىس ورىندارىن اشۋ، ەڭبەك ونىمدىلىگى مەن سالانىڭ تەحنولوگيالىق جاراقتاندىرىلۋ دەڭگەيىن ارتتىرۋ دەگەندى بىلدىرەدى.
- جولداۋ ەلىمىزدى ودان ءارى دامىتۋدىڭ ناقتى باعدارلارىن ايقىندايدى. ءبىزدىڭ مىندەتىمىز - قويىلعان ماقساتتاردى تالقىلاۋمەن شەكتەلمەي، ولاردىڭ ءىس جۇزىندە ورىندالۋىن قامتاماسىز ەتۋ. ءاربىر تاپسىرما ناقتى جوبالارمەن، ينۆەستيتسيالارمەن، ىسكە اسىرۋ مەرزىمدەرىمەن جانە ولشەنەتىن ناتيجەلەرمەن قامتاماسىز ەتىلۋى ءتيىس، - دەدى ايداربەك ساپاروۆ.
اۋىل شارۋاشىلىعى ۆيتسە-ءمينيسترى ازات سۇلتانوۆ ستراتەگيالىق قۇجاتتا كوزدەلگەن تاپسىرمالاردى ىسكە اسىرۋ تەتىكتەرىنە ەگجەي-تەگجەيلى توقتالدى.
اگرارلىق سەكتوردىڭ قولجەتىمدى قارجىلاندىرۋ كوزدەرىنە قول جەتكىزۋىن كەڭەيتۋ نەگىزگى باسىمدىقتاردىڭ ءبىرى بولادى. وسى ماقساتتا بيۋدجەت قاراجاتى مەن كوممەرتسيالىق قارجى رەسۋرستارىن ۇشتاستىرۋ ارقىلى ينۆەستيتسيا تارتۋ جۇمىستارى جالعاسادى. قارجى مال شارۋاشىلىعىن دامىتۋعا، اۋىل شارۋاشىلىعى ونىمدەرىن ساقتاۋ جانە وڭدەۋ نىساندارىن سالۋعا باعىتتالادى.
سونىمەن قاتار سالانى تەحنيكالىق قايتا جاراقتاندىرۋ جۇمىستارى جەدەلدەتىلەدى. «قازاگروقارجى» ا ق ارقىلى تراكتورلار مەن كومباينداردى جەڭىلدەتىلگەن ليزينگكە بەرۋ جالعاسادى. بۇدان بولەك، سەنىم بىلدىرىلگەن اگەنت ارقىلى اۋىل شارۋاشىلىعى جانۋارلارىن ساتىپ الۋعا جەڭىلدەتىلگەن نەسيە بەرۋ تەتىگى پىسىقتالۋدا. بۇل تەتىكتى سولتۇستىك قازاقستان وبلىسىنىڭ تاجىريبەسىن ەسكەرە وتىرىپ ىسكە قوسۋ جانە 2027-جىلى قوسىمشا قارجىلاندىرۋ قاراستىرۋ جوسپارلانىپ وتىر.
- مال شارۋاشىلىعىندا وندىرىستىك قۋاتتاردى كەڭەيتۋگە باسىمدىق بەرىلەدى. قازىرگى ۋاقىتتا وڭىرلەردە جىلىنا 462 مىڭ توننا ءسۇت وندىرۋگە ارنالعان 71 تاۋارلى-ءسۇت فەرماسىنىڭ قۇرىلىسى مەن ىسكە اسىرىلۋى بويىنشا جوبالار جۇزەگە اسىرىلۋدا. اعىمداعى جىلدىڭ سوڭىنا دەيىن پايدالانۋعا بەرىلگەن نىسانداردى جوبالىق قۋاتىنىڭ 70 پايىزىنا جەتكىزۋ، ال كەلەسى جىلى تولىق قۋاتىندا جۇمىس ىستەۋىن قامتاماسىز ەتۋ جوسپارلانعان. 2027-جىلعا جىلىنا 228 مىڭ توننا ءسۇت وندىرۋگە ارنالعان تاعى 21 تاۋارلى-ءسۇت فەرماسىن قامتيتىن جوبالار پۋلى قالىپتاستىرىلدى، - دەلىنگەن حابارلامادا.
سونىمەن قاتار ءوندىرىستىڭ تولىق تسيكلى قامتىلعان التى ەت كلاستەرىن قۇرۋ جۇمىستارى جۇرگىزىلۋدە. تۇركىستان وبلىسىندا العاشقى ءىرى مامانداندىرىلعان مال بيرجاسىن سالۋ جوسپارلانىپ وتىر.
اۋىل شارۋاشىلىعى ونىمدەرىن وڭدەۋدى دامىتۋعا جانە شيكىزات ەكسپورتىنان قوسىلعان قۇنى جوعارى دايىن ءونىم ەكسپورتتاۋعا كوشۋگە ەرەكشە نازار اۋدارىلدى. سوڭعى ءۇش جىلدا اۋىل شارۋاشىلىعى شيكىزاتىنىڭ نەگىزگى تۇرلەرىن وڭدەۋ ۇلەسى ارتتى. 2025-جىلى وڭدەلگەن ءونىم ەكسپورتى 35 پايىزعا ءوسىپ، 3,6 ميلليارد ا ق ش دوللارىنا جەتتى.
مينيسترلىكتىڭ مالىمەتىنشە، استىقتى تەرەڭ وڭدەۋ سالاسىندا 2029-جىلعا دەيىن جىلىنا 5,8 ميلليون توننا شيكىزات وڭدەۋگە قاۋقارلى التى ءىرى ينۆەستيتسيالىق جوبانى ىسكە اسىرۋ جوسپارلانعان. بۇل كاسىپورىندار كراحمال، گليۋتەن، بيوەتانول، امينقىشقىلدارى جانە تەرەڭ وڭدەۋ ناتيجەسىندە الىناتىن باسقا دا ونىمدەردى وندىرۋگە باعىتتالادى. تۇركىستان جانە جامبىل وبلىستارىنداعى ەكى زاۋىت پايدالانۋعا بەرىلدى.
ا و ك- ءتى سيفرلىق ترانسفورماتسيالاۋ اياسىندا 2027-جىلدىڭ سوڭىنا دەيىن جاساندى ينتەللەكت، دالمە-ءدال ەگىنشىلىك جانە «اقىلدى فەرمالار» تەحنولوگيالارىن ەنگىزۋ كوزدەلگەن. ال 2028-جىلدىڭ سوڭىنا دەيىن ءبىرىڭعاي سالالىق Digital Agro Platform سيفرلىق پلاتفورماسى مەن Smart Data Agro دەرەكتەر قورىن قۇرۋ جوسپارلانىپ وتىر.
بۇل جۇيەلەر سالانىڭ اقپاراتتىق جۇيەلەرىن بىرىكتىرۋگە، تالدامالىق دەرەكتەرگە قولجەتىمدىلىكتى كەڭەيتۋگە، اۋىل شارۋاشىلىعى داقىلدارىنىڭ ونىمدىلىگىن بولجاۋعا جانە باسقارۋشىلىق شەشىمدەردىڭ ساپاسىن ارتتىرۋعا مۇمكىندىك بەرەدى.
مەملەكەت باسشىسىنىڭ تاپسىرمالارىن ىسكە اسىرۋ اياسىندا قابىلدانىپ جاتقان شارالار مەن پەرسپەكتيۆالى باستامالار تۋرالى اقمولا جانە سولتۇستىك قازاقستان وبلىستارى اكىمدەرىنىڭ ورىنباسارلارى باياندادى.
كەڭەس قورىتىندىسى بويىنشا مينيستر وبلىس اكىمدىكتەرىنە اۋىل شارۋاشىلىعى ونىمدەرىن تەرەڭ وڭدەۋدى، مال شارۋاشىلىعىن، ساقتاۋ ينفراقۇرىلىمىن جانە ا و ك- ءتى سيفرلاندىرۋدى دامىتۋ جونىندەگى ناقتى ۇسىنىستاردى قىسقا مەرزىمدە اۋىل شارۋاشىلىعى مينيسترلىگىنە ەنگىزۋدى تاپسىردى.
ۇسىنىستاردا پەرسپەكتيۆالى ينۆەستيتسيالىق جوبالار، الەۋەتتى ينۆەستورلار، ينۆەستيتسيا كولەمى، قارجىلاندىرۋ كوزدەرى، ىسكە اسىرۋ مەرزىمدەرى جانە كۇتىلەتىن ەكونوميكالىق تيىمدىلىك كورسەتىلۋى ءتيىس.
ايداربەك ساپاروۆ ءاربىر باستاما ناقتى ينۆەستيتسيالىق ۇسىنىستارمەن جانە ەكونوميكالىق ەسەپتەۋلەرمەن نەگىزدەلىپ، ءىس جۇزىندە ناتيجە بەرۋى قاجەتتىگىن اتاپ ءوتتى.
- فورمالدى تاسىلگە جول بەرمەۋ ماڭىزدى. ءاربىر باستامانىڭ ارتىندا ناقتى ينۆەستورلار، ەكونوميكالىق ەسەپتەۋلەر، ايقىن مەرزىمدەر مەن جەكە جاۋاپكەرشىلىك تۇرۋى كەرەك. بىزگە ەسەپ ءۇشىن جاسالعان تىزىمدەر ەمەس، ناقتى ەكونوميكالىق ناتيجە بەرەتىن جوبالار قاجەت. مينيسترلىك بۇل جۇمىستى تۇراقتى باقىلاۋدا ۇستايدى. مەملەكەت باسشىسىنىڭ تاپسىرمالارى ساپالى ءارى بەلگىلەنگەن مەرزىمدە ورىندالۋى ءتيىس، - دەپ تۇيىندەدى مينيستر.
بەلگىلەنگەن باسىمدىقتاردى ىسكە اسىرۋ اگروونەركاسىپتىك كەشەندى قۇرىلىمدىق جاڭعىرتۋدى جەدەلدەتۋگە، ينۆەستيتسيالىق بەلسەندىلىكتى ارتتىرۋعا، قوسىلعان قۇنى جوعارى ءونىم ءوندىرىسىن ۇلعايتۋعا جانە قازاقستاننىڭ سىرتقى نارىقتارداعى ۇستانىمىن نىعايتۋعا مۇمكىندىك بەرەدى.