بۇل ناتيجەگە انا مەن بالا دەنساۋلىعىن قورعاۋ جۇيەسىن جەتىلدىرۋ، اۋرۋلاردى ەرتە انىقتاۋ جانە مەديتسينالىق كومەكتىڭ قولجەتىمدىلىگىن ارتتىرۋ باعىتىنداعى شارالار ىقپال ەتتى.
ق ر دەنساۋلىق ساقتاۋ مينيسترلىگى باسپا ءسوز قىزمەتىنىڭ حابارلاۋىنشا، ەلىمىزدە رەپرودۋكتيۆتىك جاستاعى ايەلدەردىڭ دەنساۋلىعىن باقىلاۋعا ارنالعان «انالار ساۋلىعى» باعدارلاماسى جۇزەگە اسىرىلىپ جاتىر. ونىڭ نەگىزگى ماقساتى - قاۋىپ فاكتورلارىن ەرتە انىقتاۋ، ايەلدەردى ۋاقتىلى تەكسەرۋدەن وتكىزۋ جانە ىقتيمال اسقىنۋلاردىڭ الدىن الۋ.
باعدارلاما اياسىندا بالا تۋۋ جاسىنداعى ايەلدەر سالاۋاتتى جۇكتىلىككە دايىندالۋ ءۇشىن ءوز ەمحاناسىندا مەديتسينالىق تەكسەرۋدىڭ 12 تۇرىنەن وتە الادى.
سونىمەن قاتار 37 ەمحانا مەن 23 پەريناتالدىق ورتالىقتا ايەلدەر كونسۋلتاتسيالارىنىڭ جۇمىسى قايتا جانداندى. ولاردىڭ قىزمەتىمەن 1 ميلليوننان استام ايەل قامتىلدى.
- جۇكتىلىكتىڭ 10 اپتاسىنا دەيىن مەديتسينالىق ەسەپكە تۇرعان ايەلدەردىڭ ۇلەسى 18 پايىزدىق تارماققا ارتىپ، 71 پايىزعا جەتتى. ۇرىقتىڭ تۋا بىتكەن دامۋ اقاۋلارىن ەرتە انىقتاۋ ءۇشىن بارلىق وڭىردەگى پەريناتالدىق ورتالىقتاردىڭ جانىنان 19 «ءبىر كۇندىك كلينيكا» اشىلدى. قازىر 100 مىڭنان استام جۇكتى ايەل دياگنوستيكالىق تەكسەرۋدەن ءوتتى. پرەناتالدىق سكرينينگپەن قامتۋ دەڭگەيى 8 پايىزعا ارتتى، - دەلىنگەن حابارلامادا.
سونداي-اق وندا نارەستە دۇنيەگە كەلگەننەن كەيىن دە مەديتسينالىق باقىلاۋ جالعاساتىنى ايتىلعان.
بۇل كەزەڭدە پاتروناج، پروفيلاكتيكالىق تەكسەرۋلەر، ۆاكسيناتسيا جانە بالانىڭ دەنساۋلىعىن تۇراقتى باقىلاۋ شارالارى جۇرگىزىلەدى.
وسىعان دەيىن دەنساۋلىق ساقتاۋ ءمينيسترى اقمارال ءالنازاروۆا جۇكتى ايەلدەرگە، جاڭا تۋعان نارەستەلەرگە جانە بەس جاسقا دەيىنگى بالالارعا مەديتسينالىق باقىلاۋ مەن كومەك كورسەتۋدى كۇشەيتۋدى تاپسىرعان بولاتىن.