قازاقستاندا بىلتىر قوسىمشا 417 توننا التىن قورى انىقتالدى. ولاردىڭ قاتارىندا جاڭادان تابىلعان كەن ورىندارىنان بولەك، قايتا باعالانعان شاحتالار بار.
مارعۇلان بايباتىروۆ، ق ر ءو ق م گەولوگيا كوميتەتى ءتوراعاسىنىڭ ورىنباسارى:
- قاراشوقى مەن مايلىقارا سياقتى ءىرى كەن ورىندارى قايتا باعالاندى. تاعى 10 جاڭا نىساندى مەملەكەتتىك تىركەۋگە قويدىق. ولاردىڭ كوبى شاعىن. اراسىندا تاقىر-قالجىر كەن ورنى سياقتى ىرىلەرىن اتاپ وتۋگە بولادى. بۇل ەلىمىزدىڭ كەن يگەرۋ سالاسىندا الەۋەتى جوعارى ەكەنىن كورسەتەدى.
مامانداردىڭ ايتۋىنشا، بولجامدى قور مەن ناقتىلانعان قوردىڭ اراسىنداعى ايىرما ايتارلىقتاي بولۋى مۇمكىن. بارلىعى كەننىڭ قۇرامى، تەرەڭدىگى مەن ەكونوميكالىق تيىمدىلىگىنە بايلانىستى.
تەلمان شۋريەۆ، تاۋ-كەن سالاسىنىڭ تاۋەلسىز ساراپشىسى:
- قورعا ۇلتتىق بانك اففيناج زاۋىتتارىنان ساتىپ الاتىن التىن قۇيمالاردى عانا جاتقىزۋعا بولادى. ولار ءوز كەزەگىندە ۆاليۋتا رەزەرۆىنە قوسىلادى. قازاقستان الەمدەگى التىن قۇيمالارىن ەڭ كوپ ساتىپ الاتىن ەلدەر قاتارىنا كىرەدى. ياعني رەسۋرستار قورعا اينالۋى ءۇشىن ينۆەستيتسيا مەن تەحنولوگيا كەرەك.
ونەركاسىپ جانە قۇرىلىس مينيسترلىگىنىڭ مالىمەتىنشە، ۇلكەن قاراشوقى مەن مايلىقارا كەن ورىندارى قازىردىڭ وزىندە التىن وندىرۋگە كوشكەن. ال قالعان كەنىشتەردىڭ ءتيىستى قۇجاتتارى راسىمدەلىپ جاتىر. سونىمەن قاتار مەملەكەت بارلاۋ جۇمىستارىن جانداندىرۋعا دەن قويعان. قازىر مەملەكەتتىك رەەستردە تىركەلگەن كەنىشتەر سانى ون مىڭ شاماسىندا.