قازىردىڭ وزىندە اينالىمعا 339 ميلليارد تەڭگەگە جۋىق سيفرلىق تەڭگە شىعارىلىپ، ءتۇرلى باعىتتار بويىنشا 20 دان استام پيلوتتىق جوبا جۇزەگە اسىرىلعان. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە قارجى ۆيتسە-ءمينيسترى اسەت تۇرىسوۆ مالىمدەدى.
ۆيتسە-ءمينيستردىڭ ايتۋىنشا، سيفرلىق تەڭگە - قولما-قول جانە قولما-قول اقشاسىز اقشامەن قاتار ۇلتتىق ۆاليۋتانىڭ ءۇشىنشى نىسانى.
سيفرلىق تەڭگە پلاتفورماسىنىڭ قۇقىقتىق مارتەبەسى مەن ونىڭ جۇمىس ىستەۋ ءتارتىبى زاڭنامالىق تۇرعىدان بەكىتىلگەن.
قازىر اينالىمعا شامامەن 339 ميلليارد سيفرلىق تەڭگە شىعارىلدى. مەملەكەتتىك ساتىپ الۋ، ينفراقۇرىلىمدىق جوبالار، سۋبسيديالاۋ جانە سالىقتىق اكىمشىلەندىرۋدى قوسا العاندا، ءتۇرلى باعىتتار بويىنشا 20 دان استام پيلوتتىق جوبا ىسكە اسىرىلدى، - دەدى اسەت تۇرىسوۆ.
قازىرگى ۋاقىتتا سيفرلىق تەڭگەنى قولدانۋ اياسىن كەڭەيتۋ جانە پلاتفورماعا جاڭا قاتىسۋشىلاردى قوسۋ جۇمىستارى جۇرگىزىلىپ جاتىر.
جوبانى اۋقىمدى تۇردە ەنگىزۋ ءۇشىن بيۋجەتتىڭ 8 ەرەكشەلىگى ايقىندالعان.
قارجى ۆيتسە-ءمينيسترىنىڭ ايتۋىنشا، سيفرلىق تەڭگەنى پايدالانۋ بيۋجەت قاراجاتىنىڭ قوزعالىسىن اشىق باقىلاۋعا جانە ونىڭ ماقساتتى جۇمسالۋىن قامتاماسىز ەتۋگە مۇمكىندىك بەرەدى.
ەسكە سالايىق، بۇعان دەيىن سيفرلىق تەڭگە قارجى جۇيەسىن قالاي وزگەرتەتىنى حابارلاندى.