ال قازاقستاندىقتار ينتەرنەتتى الەمدىك ورتاشا دەڭگەيدەن ءبىر جارىم ەسە كوپ پايدالانادى.
موبيلدى بايلانىس تۋرالى اڭگىمە كوبىنە تاريف باعاسىنان باستالادى. ابونەنتتىك تولەم قانشاعا ءوستى، ينتەرنەت پاكەتى قانشا تۇرادى، باسقا ەلدەرمەن سالىستىرعاندا بىزدە بايلانىس ارزان با؟ الايدا ينتەرنەتتىڭ قولجەتىمدىلىگىن تەك باعاسىنا قاراپ باعالاۋ دۇرىس ەمەس. ونىڭ جىلدامدىعى مەن تاريفكە كىرەتىن ينتەرنەت كولەمىن دە ەسكەرگەن ءجون.
Broadband Genie زەرتتەۋىنە سۇيەنسەك، 2026-جىلى قازاقستاندا ءبىر گيگابايت موبيلدى ينتەرنەتتىڭ ورتاشا باعاسى 30 تسەنت شاماسىندا بولعان. بۇل - تاريفتىك پاكەتتەردەگى ورتاشا باعا ەمەس، مەديانالىق باعا. زەرتتەۋگە ەنگەن 234 ەل مەن اۋماقتىڭ اراسىندا قازاقستان 53-ورىنعا شىققان.
الەمدە ءبىر گيگابايت ينتەرنەتتىڭ ورتاشا قۇنى 1,23 دوللاردى قۇرايدى، ياعني قازاقستانداعى باعادان ءتورت ەسەدەن استام جوعارى. دەگەنمەن ينتەرنەتتىڭ ارزان بولۋى ونىڭ جىلدام ءارى ساپالى ەكەنىن بىلدىرمەيدى. سوندىقتان تاريف قۇنىمەن قاتار، ينتەرنەتتىڭ قانشالىقتى جىلدام جۇمىس ىستەيتىنىنە دە نازار اۋدارۋ قاجەت.
قازاقستان جىلدام ينتەرنەتى بار ەلدەردىڭ اراسىندا جەتىنشى ورىندا
Speedtest Global Index رەيتينگىندە موبيلدى ينتەرنەتى جىلدام 55 ەلدىڭ دەرەكتەرى سالىستىرىلعان. وسى ەلدەردىڭ اراسىندا قازاقستان ايلىق تاريفتىڭ ارزاندىعى بويىنشا جەتىنشى ورىنعا يە بولعان.
Broadband Genie مالىمەتىنشە، قازاقستاندا موبيلدى ينتەرنەتتىڭ ايلىق قۇنى ورتا ەسەپپەن 10,65 دوللار. ال اتالعان 55 ەلدەگى ورتاشا باعا 27 دوللاردان اسادى. دەمەك، ەلىمىزدە موبيلدى ينتەرنەت وسى توپتاعى مەملەكەتتەرمەن سالىستىرعاندا ەكى جارىم ەسەدەن استام ارزان.
2026-جىلعى قىركۇيەكتەگى مالىمەت بويىنشا، تىزىمدەگى ەڭ ارزان ينتەرنەت ۆەتنامدا. وندا ايلىق تاريف 5,14 دوللار تۇرادى، ال ينتەرنەت جىلدامدىعى سەكۋندىنا 230,31 مەگابيتكە جەتەدى. گرۋزيادا تاريف قۇنى 5,72 دوللار، جىلدامدىعى - 147,46 مبيت/س.
ۋكراينادا اي سايىنعى تولەم 7,64 دوللار بولعانىمەن، ينتەرنەت جىلدامدىعى 94,75 مبيت/س. ءۇندىستاندا تاريف 7,82 دوللار، جىلدامدىق - 126,92 مبيت/س. ازەربايجاندا ينتەرنەتتىڭ ايلىق قۇنى 9,93 دوللار بولسا، جىلدامدىعى 98,92 مبيت/س. ال كامبودجادا تاريف 9,98 دوللار، ينتەرنەت جىلدامدىعى 123,88 مبيت/س بولعان.
قازاقستاندا ايلىق تاريف 10,65 دوللار، ينتەرنەت جىلدامدىعى سەكۋندىنا 93 مەگابيتتى قۇرايدى، ياعني ەلىمىزدە ينتەرنەت اتالعان مەملەكەتتەردىڭ كەيبىرىمەن سالىستىرعاندا ءسال قىمباتىراق بولعانىمەن، جىلدامدىعى جاعىنان ولاردان قالىسپايدى.
ينتەرنەتى جىلدام ەلدەردىڭ بارىندە بايلانىس ارزان ەمەس. ماسەلەن، بىرىككەن اراب امىرلىكتەرى، قاتار جانە كۋۆەيت جىلدامدىق رەيتينگىسىندە الدىڭعى ورىنداردا تۇر. ءبىراق بۇل ەلدەردە موبيلدى ينتەرنەتتىڭ ايلىق قۇنى 58,8 دوللاردان باستالىپ، 80 دوللاردان اسادى. كانادادا دا ينتەرنەت قازاقستانعا قاراعاندا باياۋ بولعانىمەن، ابونەنتتەر ودان بەس جارىم ەسە كوپ تولەيدى.
قازاقستاندىقتار ينتەرنەتتى كوپ پايدالانادى
بايلانىستىڭ قانشالىقتى قولجەتىمدى ەكەنىن ونىڭ باعاسى مەن جىلدامدىعىنان بولەك، حالىقتىڭ قانشا ينتەرنەت پايدالاناتىنىنان دا بايقاۋعا بولادى.
حالىقارالىق ەلەكتر بايلانىسى وداعىنىڭ (ITU) دەرەگىنشە، 2025-جىلى قازاقستاندا ءبىر موبيلدى ينتەرنەت ابونەنتى جىلىنا ورتا ەسەپپەن 283 گيگابايت دەرەك پايدالانعان. الەم بويىنشا بۇل كولەم 184 گيگابايتقا تەڭ، ياعني قازاقستاندىقتار ينتەرنەتتى الەمدىك ورتاشا دەڭگەيدەن شامامەن ءبىر جارىم ەسە كوپ تۇتىنادى.
اي سايىنعى ەسەپپەن العاندا، قازاقستاندا ءبىر ابونەنتكە 23,6 گيگابايتتان كەلەدى. الەمدىك ورتاشا مولشەر - 15,3 گيگابايت، ال ت م د ەلدەرىندە - 22 گيگابايت. وسىلايشا، قازاقستاندىقتاردىڭ ينتەرنەت پايدالانۋ كولەمى وڭىردەگى ورتاشا دەڭگەيدەن دە جوعارى.
بۇل ءۇردىس سوڭعى جىلدارى كۇشەيگەن. 2019-جىلى ءبىر ابونەنت جىلىنا 120 گيگابايت ينتەرنەت پايدالانسا، 2025-جىلى بۇل كولەم 283 گيگابايتقا جەتكەن. ال الەمدە وسى كەزەڭدە جىلدىق تۇتىنۋ 72 گيگابايتتان 184 گيگابايتقا دەيىن وسكەن.
ينتەرنەتتى كوپ پايدالانۋ كۇندەلىكتى ومىردە سيفرلىق قىزمەتتەردىڭ كەڭ تارالعانىن كورسەتەدى. بانك قوسىمشالارى، ەلەكتروندى مەملەكەتتىك قىزمەتتەر، بەينەقوڭىراۋ، ونلاين وقۋ، قاشىقتان جۇمىس ىستەۋ مەن الەۋمەتتىك جەلىلەر قازىر كوپشىلىك ءۇشىن ۇيرەنشىكتى نارسەگە اينالدى. مۇنىڭ ءبارى ەلەكتروندى ساۋدا مەن سيفرلىق تولەمدەردىڭ دە دامۋىنا جول اشادى.
ينتەرنەتتى پايدالانۋ ارتقان سايىن جەلىگە تۇسەتىن سالماق تا كوبەيەدى
ابونەنتتەر ينتەرنەتتى نەعۇرلىم كوپ پايدالانسا، بايلانىس جەلىسىنە تۇسەتىن سالماق تا سوعۇرلىم ارتادى. اسىرەسە حالىق تىعىز ورنالاسقان اۋدانداردا جانە كەشكى ۋاقىتتا ينتەرنەت جىلدامدىعىن ءبىرقالىپتى ۇستاۋ وڭاي ەمەس.
مىسالى، Tele2 جەلىسىندە بيىل ءبىر ابونەنت ايىنا ورتا ەسەپپەن 40 گيگابايت ينتەرنەت پايدالانعان. Kcell جانە Activ جەلىلەرىندە 2026-جىلدىڭ العاشقى جارتىجىلدىعىندا بۇل كولەم 30,4 گيگابايتقا جەتىپ، ءبىر جىلدا 63,4 پايىزعا ارتقان. ال beeline جەلىسىندە بيىلعى ەكىنشى توقساندا ءبىر ابونەنتكە ايىنا 22,9 گيگابايتتان كەلگەن. بۇل وتكەن جىلدىڭ وسى كەزەڭىمەن سالىستىرعاندا 13,4 پايىزعا كوپ.
سۇرانىس ارتقان سايىن وپەراتورلارعا قوسىمشا بازالىق ستانتسيالار ورناتىپ، جابدىقتارىن جاڭارتۋعا، 4G جانە 5G جەلىلەرىن كەڭەيتۋگە تۋرا كەلەدى. مۇنىڭ ءبارى قوماقتى قارجىنى قاجەت ەتەدى.
كومپانيالاردىڭ قارجىلىق ەسەپتەرىنە قاراعاندا، 2023-جىلدان 2026-جىلدىڭ العاشقى جارتىجىلدىعىنا دەيىن «كسەل» ا ق- نىڭ نەگىزگى قورلارعا جۇمساعان قارجىسى 411,8 ميلليارد تەڭگەگە جەتكەن. «كار-تەل» ج ش س وسى كەزەڭدە 288,6 ميلليارد تەڭگە جۇمساعان. ال «موبايل تەلەكوم-سەرۆيس» ج ش س 2030-جىلعا دەيىن بايلانىس جەلىسىن دامىتۋعا 400 ميلليارد تەڭگەدەن استام قارجى سالۋدى جوسپارلاپ وتىر.
اقپارات جانە بايلانىس سالاسىنا سالىنعان ينۆەستيتسيا دا كوبەيگەن. 2023-2025-جىلدارى ونىڭ جالپى كولەمى شامامەن 1,2 تريلليون تەڭگەگە جەتتى. ال 2026-جىلدىڭ قاڭتار-قىركۇيەگىندە سالاعا 344,7 ميلليارد تەڭگە ينۆەستيتسيا قۇيىلعان. بۇل بىلتىرعى وسى كەزەڭمەن سالىستىرعاندا 47 پايىزعا كوپ.
بايلانىس تاريفى ينفلياتسيادان باياۋ قىمباتتاعان
جەلىگە قوماقتى قارجى جۇمسالىپ، ينتەرنەتتى پايدالانۋ كولەمى ارتقانىمەن، بايلانىس تاريفتەرى باسقا تاۋارلار مەن قىزمەتتەرگە قاراعاندا باياۋ قىمباتتاعان.
2020-جىلعى جەلتوقساننان 2026-جىلعى قىركۇيەككە دەيىن قوڭىراۋ، ينتەرنەت جانە SMS كىرەتىن تاريفتىك جوسپارلاردىڭ ابونەنتتىك تولەمى 58,4 پايىزعا وسكەن. ال وسى ۋاقىتتاعى جالپى ينفلياتسيا 86,8 پايىز بولعان. ازىق-تۇلىك باعاسى 88 پايىزعا، ازىق-تۇلىككە جاتپايتىن تاۋارلار 83,4 پايىزعا، اقىلى قىزمەتتەر 88,5 پايىزعا قىمباتتاعان.
حالىقتىڭ تابىسى دا وسكەن. 2026-جىلدىڭ ەكىنشى توقسانىندا ورتاشا تابىس 410 مىڭ تەڭگەگە جەتىپ، 2020-جىلمەن سالىستىرعاندا اتاۋلى ماندە ەكى ەسەدەن استام ارتقان.
ۇلتتىق ستاتيستيكا بيۋروسىنىڭ دەرەگىنە سۇيەنسەك، حالىقتىڭ جالپى شىعىنىنىڭ 3,4 پايىزى بايلانىس قىزمەتىنە جۇمسالادى. بۇل ۇلەس كەيىنگى جىلدارى ايتارلىقتاي وزگەرمەگەن.
تاعى ءبىر ماڭىزدى جايت: 2020-2025-جىلدارى ءبىر ابونەنتتىڭ جىلدىق ينتەرنەت پايدالانۋى 160 گيگابايتتان 283 گيگابايتقا دەيىن وسكەن. بۇل - 77 پايىزدىق ءوسىم. ال وسى كەزەڭدە ابونەنتتىك تولەم 58 پايىزعا ارتقان، ياعني تولەم كوبەيگەنىمەن، تاريفكە كىرەتىن ينتەرنەت كولەمى دە ۇلعايعان. سونىڭ ارقاسىندا ءبىر گيگابايت ينتەرنەتتىڭ ابونەنتكە تۇسەتىن قۇنى تومەندەگەن.
جالپى، دەرەكتەر قازاقستاندا موبيلدى ينتەرنەتتىڭ باعاسى قولجەتىمدى ەكەنىن، جىلدامدىعى جوعارى ءارى ونى پايدالانۋشىلار سانى مەن تۇتىنۋ كولەمى ارتىپ كەلە جاتقانىن كورسەتەدى. ەندىگى مىندەت - وسى قارقىندى ساقتاپ، ينتەرنەت ساپاسىن تومەندەتپەۋ. ءول ۇشىن بايلانىس جەلىلەرىن جاڭارتىپ، ينفراقۇرىلىمدى ودان ءارى دامىتۋ قاجەت.
بۇعان دەيىن قازاقستاندا سپۋتنيكتىك ينتەرنەتتىڭ جاڭا وپەراتورلارى پايدا بولاتىنى تۋرالى جازعان ەدىك.