2025 -جىلى ەكى ەل اراسىنداعى تاۋار اينالىمى 7,7 پايىزعا ءوسىپ، 133,5 ميلليون ا ق ش دوللارىن قۇرادى. قازاقستاننىڭ موڭعولياعا ەكسپورتى 123 ميلليون دوللارعا جەتتى. ال يمپورت كولەمى 10,5 ميلليون دوللار بولدى.
اسىرەسە، ەلدەگى اۋىل شارۋاشىلىعى ونىمدەرىنە سۇرانىس جوعارى. 2025 -جىلى اگروونەركاسىپتىك ونىمدەردىڭ تاۋار اينالىمى 32 پايىزعا ءوسىپ، 29,9 ميلليون ا ق ش دوللارىن قۇراعان. ونىڭ 28 ميلليون دوللارى قازاقستان ەكسپورتى. ءوسىم بيىل دا جالعاستى. العاشقى جەتى ايدا اگروونەركاسىپتىك كەشەن ونىمدەرىنىڭ تاۋار اينالىمى تاعى 11 پايىزعا ارتىپ، 15,3 ميلليون ا ق ش دوللارىنا جەتتى.
- جەڭىل ونەركاسىپ سالاسىندا دا موڭعوليانىڭ ماڭىزدى سەرىكتەس رەتىندە قاراستىرامىز. ەندى جاي عانا تاۋار ساتۋمەن شەكتەلمەي، بىرلەسكەن ءوندىرىستى دامىتۋ قاجەت. موڭعوليانىڭ ساپالى شيكىزاتى مەن قازاقستاننىڭ وندىرىستىك مۇمكىندىگىن بىرىكتىرىپ، دايىن ءارى قۇنى جوعارى ءونىم شىعارۋعا دايىنبىز، - دەدى ق ر اۋىل شارۋاشىلىعى ءمينيسترى ايداربەك ساپاروۆ.
تاراپتار ساۋدا قارقىنىن ساقتاپ، ءوزارا جەتكىزىلەتىن تاۋار تۇرلەرىن كوبەيتۋدى كوزدەيدى. بۇعان قوسا، تاۋ- كەن ونەركاسىبى مەن لوگيستيكا سالالارىنداعى بىرلەسكەن جوبالاردى دامىتۋ ماسەلەلەرى تالقىلاندى.
- موڭعوليا قازاقستانمەن قارىم-قاتىناستى دامىتۋعا ۇلكەن ءمان بەرەدى. ساۋدا، كولىك، ينۆەستيتسيا جانە ونەركاسىپ سالالارىندا الەۋەت جوعارى. ەڭ باستىسى - ۇكىمەتارالىق كوميسسيا جۇمىسى ناقتى ناتيجەگە باعىتتالىپ، ەكى ەلدىڭ بيزنەسىنە جاڭا مۇمكىندىكتەر اشۋى كەرەك، - دەدى موڭعوليا پرەمەر-ءمينيسترىنىڭ ورىنباسارى نيامتايشير نومتويبايار.
ەكى ەل اراسىنداعى ساۋدا-ەكونوميكالىق بايلانىستاردىڭ دامۋىنا 2026 -جىلعى 22-شىلدەدە كۇشىنە ەنگەن ەۋرازيالىق ەكونوميكالىق وداق پەن موڭعوليا اراسىنداعى ۋاقىتشا ساۋدا كەلىسىمى دە ىقپال ەتپەك.
ايتا كەتەيىك، جاقىندا موڭعوليادا قازاقستاندىق ەكسپورتتى قولدايتىن سەرىكتەستىك كەڭسەسى اشىلادى.