ق ر دەنساۋلىق ساقتاۋ مينيسترلىگى باسپا ءسوز قىزمەتىنىڭ حابارلاۋىنشا، ىنتىماقتاستىقتىڭ جاڭا فورماتتارى جاس مەديتسينا ماماندارىن دايارلاۋ مۇمكىندىكتەرىن كەڭەيتۋگە جانە ءوڭىر ەلدەرىندە زاماناۋي مەديتسينالىق كومەكتىڭ قولجەتىمدىلىگىن ارتتىرۋعا باعىتتالعان.
- قازاقستان تۇركى مەملەكەتتەرىنىڭ جەلىلىك ۋنيۆەرسيتەتىن قۇرۋدى ۇسىندى. ول ت م ۇ ەلدەرىنىڭ جەتەكشى مەديتسينالىق جوعارى وقۋ ورىندارىن بىرىكتىرەدى. قوعامدىق دەنساۋلىق ساقتاۋ، ەپيدەميولوگيا جانە بيوينفورماتيكا سالالارىن قوسا العاندا، ءبىلىم بەرۋ باعدارلامالارىن بىرلەسىپ ازىرلەۋ كوزدەلىپ وتىر، - دەدى ق ر دەنساۋلىق ساقتاۋ ءمينيسترى اقمارال ءالنازاروۆا.
وسى جۇمىستى ۇيلەستىرۋ ءۇشىن ت م ۇ حاتشىلىعىنىڭ جانىنان مەديتسينالىق ءبىلىم بەرۋ جونىندەگى ۇيلەستىرۋ كەڭەسىن قۇرۋ ۇسىنىلدى. اكادەميالىق الماسۋعا دا ەرەكشە نازار اۋدارىلدى. قازاقستان جاس عالىمدارعا، دوكتورانتتار مەن رەزيدەنت-دارىگەرلەرگە ارنالعان گرانتتىق باعدارلامانى ىسكە قوسۋدى، سونداي-اق سۇرانىسقا يە مەديتسينالىق ماماندىقتار بويىنشا بىرلەسكەن تاعىلىمدامالاردى دامىتۋدى ۇسىندى. باسىم باعىتتاردىڭ قاتارىندا بالالار كارديوحيرۋرگياسى، ترانسپلانتولوگيا، نەيروحيرۋرگيا جانە ونكوگەماتولوگيا بار.
قازاقستاننىڭ ۇلتتىق عىلىمي ورتالىقتارى مەن ۋنيۆەرسيتەتتىك كلينيكالارى ت م ۇ ەلدەرىنەن كەلگەن مامانداردى پراكتيكالىق دايارلاۋ الاڭدارى بولۋعا دايىن. ىنتىماقتاستىقتا مەديتسينالىق- سانيتاريالىق العاشقى كومەك پەن وتباسىلىق مەديتسينانى دامىتۋعا ەرەكشە ورىن بەرىلەدى.
قازاقستان اۋىلدىق جانە شەكارا ماڭىنداعى اۋدانداردا جۇمىس ىستەيتىن دارىگەرلەر ءۇشىن بىرلەسكەن ءبىلىم بەرۋ باعدارلامالارىن، كوشپەلى مەكتەپتەر مەن قىسقا مەرزىمدى تاعىلىمدامالار ۇيىمداستىرۋدى ۇسىنادى. ءونىمدى ارىپتەستىكتىڭ پراكتيكالىق مىسالى رەتىندە وزبەكستان، تاجىكستان جانە قىرعىزستاندا وتكەن قازاقستان مەديتسيناسى كۇندەرىن اتاپ وتۋگە بولادى.
مەملەكەتارالىق ىنتىماقتاستىق شەڭبەرىندە دارىگەرلەر بىرلەسكەن وپەراتسيالار جاساپ، پاتسيەنتتەرگە كونسۋلتاتسيالار بەردى، زاماناۋي مەديتسينالىق تەحنولوگيالاردى قولدانۋ تاجىريبەسىمەن الماستى. مۇنداي ءوزارا ءىس- قيمىل كاسىبي بايلانىستاردى نىعايتۋعا، دەنساۋلىق ساقتاۋ سالاسىنداعى مامانداردىڭ پراكتيكالىق جانە عىلىمي الەۋەتىن ارتتىرۋعا، سونداي-اق مەديتسينالىق كومەك كورسەتۋدىڭ ۇزدىك پراكتيكالارىن بىرلەسىپ ەنگىزۋگە مۇمكىندىك بەرەدى. قازاقستان وسىنداي باعدارلامالاردى تۇراقتى نەگىزدە وتكىزۋدى جانە بىرلەسكەن مەديتسينالىق ميسسيالار پراكتيكاسىن ت م ۇ- نىڭ باسقا دا مەملەكەتتەرىنە تاراتۋدى ۇسىندى.