بەلگيالىق بيزنەس وكىلدەرىمەن كەزدەسۋدە ۆيتسە-مينيستر قازاقستان ونەركاسىبىن دامىتۋدىڭ ءتورت باسىم باعىتىن اتادى. ولار - اككۋمۋلياتور وندىرىسىنە قاجەتتى ماتەريالدار، ىستىققا ءتوزىمدى ارنايى قورىتپالار، جارتىلاي وتكىزگىش ماتەريالدار جانە تۇراقتى ماگنيتتەر ءوندىرىسى.
سونىمەن بىرگە، دايىن ءونىمدى ەۋروپا نارىعىنا جەتكىزۋ ماسەلەسىنە ەرەكشە نازار اۋدارىلدى. بۇل رەتتە قازاقستان بەلگيانىڭ لوگيستيكالىق مۇمكىندىكتەرىن پايدالانۋدى كوزدەلگەن.
- انتۆەرپەن پورتى دايىن ءونىمدى ەۋروپا نارىعىنا جەتكىزەتىن نەگىزگى قاقپالاردىڭ ءبىرى بولىپ قالا بەرەدى. جوبالاردى قارجىلاندىرۋ ءۇشىن ەۋروپالىق كوميسسيانىڭ DG INTPA باعدارلامالارى مەن ەۋروپالىق ينۆەستيتسيالىق بانك سياقتى ەۋروپالىق قارجى قۇرالدارىن قازاقستاننىڭ مەملەكەتتىك قولداۋ شارالارىمەن ۇشتاستىرۋعا بولادى، - دەدى ولجاس ساپاربەكوۆ.
ال قازاقستاندا ەۋروپالىق كومپانيالاردىڭ ءوندىرىسىن جەرسىندىرۋ جوسپارلانىپ وتىر.
- قازاقستان كاسىپورىندارىندا پوليمەتالل كەندەرى، كونتسەنتراتتار، ارالىق ونىمدەر مەن ءوندىرىس قالدىقتارى كوپ. ولاردىڭ قۇرامىندا باسقا مەتالدارمەن بىرگە كەزدەسەتىن ىلەسپە مەتالدار دا بار. ءقازىر ولاردىڭ ءبىر بولىگى وندىرىلگەنىمەن، بارلىعى تولىق يگەرىلىپ جاتقان جوق. وسى ورايدا قازاقستان Aurubis, Campine جانە Nyrstar سياقتى كومپانيالارمەن ىنتىماقتاستىق ورناتۋعا مۇددەلى. ءبىز تەحنولوگيالار مەن مامانداردىڭ تاجىريبەسىن قازاقستانعا كەزەڭ- كەزەڭىمەن ەنگىزىپ، وڭدەۋ جۇمىستارىن ەلىمىزدە جۇرگىزۋ جولدارىن تالقىلاۋعا دايىنبىز، - دەدى ول.
تاعى ءبىر باسىم باعىت - مەتالداردى ءبولىپ الۋ جانە تازارتۋ. بۇل سيرەك مەتالدارى بار شيكىزات پەن قايتالاما شيكىزاتتى وڭدەۋدى قامتيدى. مۇنداي تەحنولوگيالار مەتالداردى جوعارى تازالىق دەڭگەيىنە جەتكىزىپ، دايىن ءونىمنىڭ قوسىلعان قۇنىن ارتتىرۋعا مۇمكىندىك بەرەدى.
قازاقستان وسى باعىتتا گيدرومەتاللۋرگيا، سيرەك جەر ەلەمەنتتەرىن ءبولۋ جانە مەتالداردى قايتا وڭدەۋ تەحنولوگيالارىن مەڭگەرگەن كومپانيالاردىڭ تاجىريبەسىنە سۇيەنبەك.
ونەركاسىپتىك جوبالاۋ مەن جابدىق جەتكىزۋ دە - ىنتىماقتاستىقتىڭ ماڭىزدى باعىتى سانالادى. ولجاس ساپاربەكوۆ الەۋەتتى سەرىكتەستەر قاتارىندا John Cockerill ينجەنەرلىك كومپانياسىن اتادى.
- قولدانىستاعى ءوندىرىس ورىندارىن جاڭعىرتۋ جانە جاڭا قۋاتتاردى جوبالاۋ ءۇشىن زاماناۋي شەشىمدەر قاجەت. سونىمەن بىرگە جوبانى تەحنيكالىق-ەكونوميكالىق نەگىزدەمە ازىرلەۋدەن باستاپ، ءوندىرىستى ىسكە قوسۋعا دەيىن جەتكىزە الاتىن ينجەنەرلىك كوماندالار ماڭىزدى، - دەدى ول.
ايتا كەتەيىك، قازاقستان بەلگياعا موليبدەن كەندەرى مەن تيتان ەكسپورتتايدى. سونداي-اق ەكى ەل اراسىنداعى ساۋدادا زىعىر تۇقىمى مەن بيداي بار. اسىرەسە، بيداي جەتكىزىلىمى ءۇش ەسە ارتقان.
ەسكە سالا كەتسەك، بەلگيانىڭ 600 جىلدىق تاريحى بار ۋنيۆەرسيتەتى قازاقستاندا «سيرەك مەتالداردى بايىتۋ» ورتالىعىن اشادى.
بۇعان دەيىن بەلگيالىقتار كورولى فيليپپ قازاقستاننىڭ باي تاريحىمەن جانە مادەنيەتىمەن جاقىن تانىسۋعا نيەتتى ەكەنىن ايتقان ەدى.
ءوز كەزەگىندە مەملەكەت باسشىسى قاسىم-جومارت توقايەۆ قازاقستان مەن بەلگيا اراسىندا شەشىلمەگەن ماسەلە جوق ەكەنىن مالىمدەدى.