ۇسىنىلعان دەرەككە سايكەس، بۇعان دەيىن ەرلەر اراسىنداعى ساپىمەن سەمسەرلەسۋدەن بىردە- ءبىر قۇراما ءبىر جىل ىشىندە قۇرلىق چەمپيوناتىن، الەم چەمپيوناتىن جانە قۇرلىقتىق ويىنداردى قاتارىنان جەڭىپ كورمەگەن.
بۇل قازاقستان سپورتى ءۇشىن دە بۇرىن-سوڭدى بولماعان جەتىستىك. بۇعان دەيىن ەلىمىزدىڭ بىردە-ءبىر كومانداسى ءبىر ماۋسىمدا حالىقارالىق كۇنتىزبەدەگى بارلىق باستى جارىستا توپ جارماعان.
الەمدىك سپورتتا وسىنداي اۋقىمدى جەتىستىكتەرگە ارنايى اتاۋ بەرۋ قالىپتاسقان. ماسەلەن، تەننيستە «ۇلكەن دۋلىعا»، فۋتبولدا «ترەبل» ۇعىمى قولدانىلادى. سەمسەرلەسۋدە مۇنداي جەڭىستەر سەرياسىن سيپاتتايتىن رەسمي تەرمين جوق. دەگەنمەن جەتىستىكتىڭ اۋقىمىنا قاراي قازاقستان قۇراماسى ءبىر ماۋسىمدا وزىندىك «ۇلكەن دۋلىعاسىن» جينادى دەۋگە بولادى.
قازاقستان قۇراماسىنىڭ جەڭىستى جولى ماۋسىم ايىندا دەليدە وتكەن ازيا چەمپيوناتىنان باستالدى. ۇلتتىق قۇراما قۇرلىق بىرىنشىلىگىندە توپ جارىپ، ماۋسىمداعى العاشقى ءىرى جەڭىسىنە قول جەتكىزدى.
ارادا ءبىر اي وتكەندە گونكونگتا وتكەن الەم چەمپيوناتىندا قازاقستاندىق سەمسەرلەسۋشىلەر كوماندالىق سايىستا العاش رەت الەم چەمپيونى اتاندى.
جەڭىستى سەريا ناگوياداعى ازيا ويىندارىندا جالعاستى. فينالدا رۋسلان قۇربانوۆ، كيريلل پروحودوۆ، ۆاديم شارلايموۆ جانە ەرلىك سەرتاي وڭتۇستىك كورەيا قۇراماسىمەن كەزدەستى.
شەشۋشى باسەكەدە قازاقستان قۇراماسى توعىز ۇپاي ايىرماسىمەن جەڭىلىپ جاتقانىمەن، ەسەپتى وزگەرتىپ، 43:42 ەسەبىمەن جەڭىسكە جەتتى.
وسىلايشا، قازاقستان ەرلەر قۇراماسى اراعا 24 جىل سالىپ ازيا ويىندارىنىڭ جەڭىمپازى اتاندى. بۇعان دەيىن قازاقستاندىق سەمسەرلەسۋشىلەر 2002 -جىلى پۋساندا وتكەن ازيا ويىندارىندا التىن مەدال يەلەنگەن ەدى.
قازاقستان قۇراماسىنىڭ جەتىستىگى الەمدىك سەمسەرلەسۋدەگى باسەكەنىڭ جوعارى دەڭگەيىمەن دە ەرەكشەلەنەدى. فرانتسيا، يتاليا، جاپونيا جانە وڭتۇستىك كورەيا سەكىلدى ەلدەردە سەمسەرلەسۋدىڭ عاسىرلىق ءداستۇرى، قۋاتتى سپورت رەزەرۆى جانە وليمپيادا چەمپيوندارىنىڭ بىرنەشە بۋىنى قالىپتاسقان.
- مەملەكەت باسشىسىنىڭ تاپسىرماسى بويىنشا ءبىز وليمپيادالىق سپورت تۇرلەرىن جۇيەلى تۇردە دامىتىپ، سپورتشىلارىمىزدىڭ الەمدىك دەڭگەيدە باسەكەگە قابىلەتتى بولۋى ءۇشىن قاجەتتى جاعداي جاساپ كەلەمىز. بۇل ناتيجە - مەملەكەتتىڭ زور قولداۋىمەن فەدەراتسيانىڭ، جاتتىقتىرۋشىلار شتابى مەن سپورتشىلاردىڭ جۇيەلى جۇمىسىنىڭ جەمىسى. فەدەراتسيا زاماناۋي ادىستەمەلەر مەن عىلىمي تاسىلدەردى ەنگىزىپ كەلەدى. ال تاجىريبە الماسۋ ماقساتىندا مەملەكەت تاراپىنان تارتىلعان شەتەلدىك ماماندار وتاندىق جاتتىقتىرۋشىلارىمىزدىڭ جۇمىسىن كۇشەيتۋگە ۇلەس قوسۋدا، - دەدى تۋريزم جانە سپورت ءمينيسترى ەربول مىرزابوسىنوۆ.
قازاقستان سەمسەرلەسۋ فەدەراتسياسىنىڭ پرەزيدەنتى ميربولات ءابۋوۆ قازىرگى قۇرامانىڭ جەتىستىگى ەل سپورتى تاريحىندا ايرىقشا ورىن الاتىنىن اتاپ ءوتتى.
- مەنىڭشە، بۇگىندە بۇل كوماندا اڭىزعا اينالعان قۇراما دەگەن اتقا ابدەن لايىق. ناتيجە وسكەن سايىن بىزگە ارتىلاتىن ءۇمىت پەن جاۋاپكەرشىلىكتىڭ دە ارتا تۇسەتىنىن تۇسىنەمىز. ءبىز بۇل جەتىستىكتى سوڭعى مەجە ەمەس، ەندى ساقتاپ قالۋىمىز قاجەت جاڭا دەڭگەي دەپ قابىلدايمىز. الدا وليمپياداعا ىرىكتەۋ كەزەڭى تۇر. كەلەسى مىندەتىمىز - جوعارى دەڭگەيىمىزدى ۇزاق مەرزىمدە دالەلدەۋ، - دەدى ول.
ۇلتتىق قۇرامانىڭ تاريحي ناتيجەسى تۋريزم جانە سپورت مينيسترلىگى، قازاقستان سەمسەرلەسۋ فەدەراتسياسى، جاتتىقتىرۋشىلار شتابى مەن سپورتشىلاردىڭ بىرلەسكەن جۇمىسىنىڭ ناتيجەسى رەتىندە باعالانىپ وتىر.
ايتا كەتەيىك، بۇعان دەيىن قازاقستاننىڭ ەرلەر قۇراماسى سەمسەرلەسۋدەن الەم چەمپيوناتىندا تۇڭعىش رەت كوماندالىق سىندا التىن مەدال جەڭىپ العان بولاتىن.