مينيستر 2027- 2029 -جىلدارعا ارنالعان رەسپۋبليكالىق بيۋدجەت جوباسىن تالقىلاۋ كەزىندە دەپۋتاتتاردىڭ مەملەكەتتىك بورىشتىڭ ءوسۋى مەن وعان قىزمەت كورسەتۋ شىعىندارى تۋرالى سۇراقتارىنا جاۋاپ بەردى.
تاكيەۆتىڭ ايتۋىنشا، ۇكىمەت قارىزدى باسقارۋ كەزىندە قاراجاتتى ءتيىمدى شارتتارمەن قايتا تارتۋعا باسىمدىق بەرەدى. وسى ماقساتتا مەملەكەتتىك بورىشتى باسقارۋ جونىندەگى كەڭەس قۇرىلىپ، باستاپقى ديلەرلەر ينستيتۋتى ىسكە قوسىلعان. سونىمەن قاتار قازاقستاننىڭ مەملەكەتتىك باعالى قاعازدارى حالىقارالىق يندەكستەرگە ەنگىزىلگەن.
ءمينيستردىڭ سوزىنشە، مەملەكەتتىك بورىشتىڭ بەلگىلەنگەن شەكتى دەڭگەيى جالپى ىشكى ءونىمنىڭ 32 پايىزىنا تەڭ. ونىڭ ايتۋىنشا، قازاقستان زاڭناماداعى شەكتەۋلەر مەن تالاپتاردى ساقتاپ وتىر، ال حالىقارالىق ساراپشىلار ەلدىڭ بورىش دەڭگەيىن سالىستىرمالى تۇردە تومەن دەپ باعالايدى.
قىتايدان قارىز الۋ بيۋدجەتكە قانشا ۇنەم بەرەدى؟
ءمادي تاكيەۆ قازاقستان بيىل قىتايدان 1,5 ميلليارد دوللاردى جىلدىق 1,82 پايىزدىق مولشەرلەمەمەن العانىن ايتتى. ءمينيستردىڭ مالىمەتىنشە، وسى قارىزدى وتەۋگە جىل سايىن 12,7 ميلليارد تەڭگە جۇمسالادى.
«بيىل قىتايدان 1,5 ميلليارد دوللاردى ەڭ تومەنگى مولشەرلەمەمەن - 1,82 پايىزبەن تارتتىق. بۇل قارىزعا قىزمەت كورسەتۋگە جىلىنا 12,7 ميلليارد تەڭگە جۇمسالادى. ەگەر ءدال وسى 1,5 ميلليارد دوللاردى ىشكى نارىقتان تارتساق، وعان قىزمەت كورسەتۋ شىعىنى 113 ميلليارد تەڭگەدەن اسار ەدى»، - دەدى مينيستر.
ونىڭ ايتۋىنشا، ەكى نۇسقانىڭ ايىرماشىلىعى جىلىنا شامامەن 100 ميلليارد تەڭگەنى قۇرايدى. ال بەس جىل ىشىندە بيۋدجەت 500 ميلليارد تەڭگە ۇنەمدەۋى مۇمكىن.
قازاقستان سىرتقى نارىقتان قانداي شارتتارمەن قارىز الادى؟
مينيستر قازاقستاننىڭ ەۋرووبليگاتسيالار ارقىلى دا قاراجات تارتاتىنىن اتاپ ءوتتى. ونىڭ ايتۋىنشا، 2015 -جىلى مۇنداي قارىزدار جىلدىق 5,5 پايىزدىق مولشەرلەمەمەن، ال وتكەن جىلى 4,4 پايىزبەن تارتىلعان.
تاكيەۆتىڭ باعالاۋىنشا، پايىزدىق مولشەرلەمەلەردەگى ايىرماشىلىق جىلىنا 60 ميلليون دوللار ۇنەمدەۋگە مۇمكىندىك بەرەدى.
ايتا كەتەيىك، بۇعان دەيىن قازاقستاننىڭ 2027- 2029 -جىلدارعا ارنالعان رەسپۋبليكالىق بيۋدجەت جوباسىندا مەملەكەتتىك بورىشقا قىزمەت كورسەتۋگە 2027 -جىلى 3,5 تريلليون تەڭگە ءبولۋ جوسپارلانعانى تۋرالى جازعان ەدىك. بۇل سوما جالپى بيۋدجەت شىعىستارىنىڭ شامامەن 12 پايىزىنا تەڭ.
ايتا كەتەيىك، بۇعان دەيىن قازاقستاننىڭ 2027- 2029 -جىلدارعا ارنالعان رەسپۋبليكالىق بيۋدجەت جوباسىندا قانشا قاراجات قايدا بولىنەتىنى تۋرالى جازعان ەدىك.