قۇرىلىستىڭ باستالۋىنا ارنالعان راسىمدە قىرعىزستان مەملەكەتتىك شەكارا قىزمەتىنىڭ ءتوراعاسى دانيار ساتيموۆ جاڭا كەشەن ازاماتتاردىڭ يگىلىگى مەن قازاقستان مەن قىرعىزستان اراسىنداعى كولىك قاتىناسىن دامىتۋعا باعىتتالعانىن اتاپ ءوتتى.
- بۇل وتكىزۋ پۋنكتىنىڭ قۇرىلىسى ەلىمىزدەگى ەڭ ءىرى ينفراقۇرىلىمدىق جوبالاردىڭ ءبىرى دەۋگە بولادى. باستى ماقساتىمىز - مەملەكەتتىك شەكارادان وتەتىن ازاماتتارعا زاماناۋي ءارى قولايلى جاعداي جاساۋ، كولىك قوزعالىسى مەن جۇك تاسىمالىن ءتيىمدى ۇيىمداستىرۋ. جاڭا كەشەن شەكارادان ءوتۋ ۋاقىتىن قىسقارتىپ، بۇل ۇدەرىستى بارىنشا ىڭعايلى ءارى قاۋىپسىز ەتەدى. سونداي-اق شەكاراشىلاردىڭ قىزمەت اتقارۋىنا قولايلى جاعداي جاسايدى، - دەدى شەكارا قىزمەتىنىڭ باسشىسى.
اتالعان جوبا ازاماتتاردىڭ مەملەكەتتىك شەكارادان بارىنشا قولايلى، جىلدام ءارى قاۋىپسىز وتۋىنە، كولىك قوزعالىسى مەن جۇك تاسىمالىنىڭ كەدەرگىسىز جۇرۋىنە، سونداي-اق كۇتۋ جانە شەكارالىق باقىلاۋدان ءوتۋ ۋاقىتىن قىسقارتۋعا باعىتتالعان.
ۆەدومستۆونىڭ حابارلاۋىنشا، جاڭا وتكىزۋ پۋنكتى 33,06 گەكتار اۋماقتى الىپ جاتىر. كەشەن تاۋلىك بويى جۇمىس ىستەپ، ەكى باعىتتا دا ازاماتتار مەن كولىك قۇرالدارىنىڭ، سونداي-اق جۇكتەردىڭ ءوتۋىن قامتاماسىز ەتەدى.
جوبا اياسىندا اۆتوكولىكتەرگە ارنالعان سەگىز قوزعالىس جولاعى مەن پاسپورتتىق باقىلاۋدان وتەتىن 12 كابينا سالۋ كوزدەلگەن. سونىمەن قاتار پاسپورتتىق باقىلاۋ ءراسىمىن جەڭىلدەتىپ، جەدەلدەتۋ ءۇشىن E-gate اۆتوماتتاندىرىلعان ەلەكتروندى قاقپالارىن ورناتۋ جوسپارلانعان.
جاڭا وتكىزۋ پۋنكتىنىڭ اۋماعىندا اكىمشىلىك جانە قىزمەتتىك عيماراتتار، كولىكتەردى تەكسەرۋ ورىندارى، اۆتوكولىكتەر جينالاتىن الاڭدار، ينجەنەرلىك- تەحنيكالىق قۇرىلىستار مەن جەكە قۇرامنىڭ تىنىس-تىرشىلىگىن قامتاماسىز ەتەتىن نىساندار بوي كوتەرەدى. ال قۇرىلىس ەكى جىلعا سوزىلادى.
ەسكە سالا كەتەيىك، 2025-جىلعى 25-تامىزدان باستاپ قازاقستان مەن قىرعىزستان شەكاراسىنداعى «قارقارا» اۆتوموبيل وتكىزۋ پۋنكتى تاۋلىك بويى جۇمىس ىستەۋ رەجيمىنە كوشتى.
بۇعان دەيىن قازاقستان-قىرعىزستان شەكاراسىنداعى جامبىل وبلىسىندا ورنالاسقان «قاراسۋ» اۆتوموبيل وتكىزۋ پۋنكتىنىڭ ەلەكتروندى كەزەك جۇيەسىنە قوسىلعانى حابارلانعان بولاتىن.
سونىمەن قاتار قىرعىزستاندا باقىلاۋ بەكەتىنىڭ قىزمەتكەرلەرى جۇك كولىكتەرىن وتكىزۋ ءۇشىن پارا العانىن جازعان ەدىك.