ونىڭ ايتۋىنشا، فورۋمعا قازاقستاننىڭ 80 گە جۋىق كاسىپكەرى قاتىسىپ، قىرعىزستان نارىعىنا ەكسپورتتاۋعا الەۋەتى جوعارى وتاندىق ونىمدەرىن تانىستىرىپ جاتىر.
سپيكەردىڭ سوزىنشە، وسى جىلدىڭ سەگىز ايىندا ەكى ەل اراسىنداعى تاۋار اينالىمى 19,2 پايىز ءوسىپ، 1,7 ميلليارد دوللارعا جەتكەن. ونىڭ ىشىندە قازاقستان ەكسپورتى 1,1 ميلليارد دوللار بولىپ، 15 پايىزعا ارتقان.
- قازاقستاننىڭ قىرعىزستانعا ەكسپورتتايتىن ونىمدەرىنىڭ نەگىزگى ۇلەسى بەس وڭىرگە تيەسىلى. ءوڭىرارالىق فورۋم وڭىرلەر اراسىنداعى بايلانىستى نىعايتىپ، ءتۋريزمدى دامىتۋ، ينۆەستيتسيا تارتۋ جانە وندىرىستىك ىنتىماقتاستىقتى جولعا قويۋ ماسەلەلەرىن تالقىلاۋعا مۇمكىندىك بەرەدى، - دەدى ول.
سونداي-اق سپيكەر ەكى ەل ەكونوميكاسىنىڭ ءبىرىن-ءبىرى تولىقتىراتىنىن اتاپ ءوتتى.
- قازاقستان قىرعىزستانعا بيداي، ۇن جانە ازىق-تۇلىك تاۋارلارىن ەكسپورتتايدى. ال قىرعىزستاننان ەلىمىزگە ءسۇت ونىمدەرى جەتكىزىلەدى. ەكى ەلدىڭ دە ەۋرازيالىق ەكونوميكالىق وداققا مۇشە بولۋى ساۋدا بايلانىسىن جەڭىلدەتىپ، ورتالىق ازيا اياسىنداعى ەكونوميكالىق ىنتىماقتاستىقتى دامىتۋعا مۇمكىندىك بەرەدى، - دەدى ول.
نۇرلان قۇلباتىروۆتىڭ ايتۋىنشا، قازىرگى تاۋار اينالىمى ەكى ەلدىڭ ساۋدا الەۋەتىن تولىق قامتىمايدى. سوندىقتان قازاقستان مەن قىرعىزستان كاسىپكەرلەرىنىڭ تىكەلەي ارالاسىپ، ىسكەرلىك بايلانىس ورناتۋى ماڭىزدى. ول مۇنداي فورۋمدار ەكىجاقتى ىنتىماقتاستىقتى دامىتۋعا تىڭ سەرپىن بەرەتىنىن ايتتى.
- كەشە جانە بۇگىن B2B فورماتىندا كەزدەسۋلەر ءوتىپ جاتىر. الدىن الا مالىمەت بويىنشا، جالپى سوماسى 100 ميلليون دوللارعا جۋىق كەلىسىمشارتقا قول قويىلادى دەپ جوسپارلانعان. كەزدەسۋ قورىتىندىسىندا بۇل سوما ودان ءارى ارتۋى مۇمكىن، - دەپ تۇيىندەدى ول.
بۇعان دەيىن قازاقستان مەن قىرعىزستان فورۋم اياسىندا قانداي قۇجاتتارعا قول قويعانىن حابارلاعان بولاتىنبىز.
سونداي-اق قازاقستان مەن قىرعىزستان ساۋدا كولەمىن 3 ميلليارد دوللارعا جەتكىزۋدى كوزدەيتىنىن جازعان ەدىك.