سپيكەردىڭ ايتۋىنشا، ەلىمىزدە قولما-قول اقشاسىز تولەمدەردىڭ ۇلەسى جوعارى. ازاماتتار مەملەكەتتىك قىزمەتتەرگە eGov پورتالى، سونداي-اق بانك قوسىمشالارى ارقىلى تولەم جاساي الادى. كەيبىر قىزمەت كورسەتۋ ورىندارىندا QR- كود ارقىلى تولەۋ مۇمكىندىگى دە قاراستىرىلعان.
قازاقستاندا قولما-قول اقشاسىز تولەمدەردىڭ دەڭگەيى باسقا ەلدەرمەن سالىستىرعاندا جوعارى. ۇلتتىق بانكپەن بىرلەسىپ، قولما-قول اقشاسىز تولەمدەردى ىنتالاندىرۋ ءۇشىن قاجەتتى شارالار قابىلدانىپ جاتىر، - دەدى اسەت تۇرىسوۆ.
ۆيتسە-ءمينيستردىڭ سوزىنشە، مەملەكەتتىك قىزمەتتەر ءۇشىن تولەمدەر بيۋجەتكە ەلەكتروندى تۇردە تۇسەدى. ازاماتتار eGov پورتالى ارقىلى بانك كارتاسىمەن نەمەسە بانك قوسىمشالارىنىڭ كومەگىمەن تولەي الادى. سونىمەن قاتار Kaspi جانە Halyk قوسىمشالارى ارقىلى سالىقتاردى تولەۋگە دە مۇمكىندىك بار.
الايدا مەملەكەتتىك قىزمەتتەر ءۇشىن قولما-قول اقشامەن ەسەپ ايىرىسۋدان تولىق باس تارتۋ ماسەلەسىنە قاتىستى ناقتى جوسپار جوق.
ازاماتتاردىڭ قولما-قول اقشانى پايدالانۋ قۇقىعى ساقتالۋى كەرەك. ماسەلەن، كەيبىر اۋىلدىق جەرلەردە تۇرعىنداردىڭ بارلىعىندا بىردەي بانك كارتاسى بولماۋى نەمەسە ەلەكتروندى تولەم جاساۋ مۇمكىندىگى شەكتەۋلى بولۋى ىقتيمال. سوندىقتان ولاردا قولما-قول اقشامەن تولەۋ مۇمكىندىگى قالۋى ءتيىس، - دەدى ول.
اسەت تۇرىسوۆ بۇل ماسەلە تولەم جۇيەلەرى مەن بانكارالىق ەسەپ ايىرىسۋدى ۇيلەستىرەتىن ۇلتتىق بانكتىڭ قۇزىرەتىنە دە قاتىستى ەكەنىن اتاپ ءوتتى.
بۇعان دەيىن قارجى ۆيتسە-ءمينيسترى قازاقستاندا مەملەكەتتىك اۋديت جۇيەسىن سيفرلاندىرۋعا باعىتتالعان Smart Audit Qazaqstan (SAQ) اناليتيكالىق پلاتفورماسى ازىرلەنىپ جاتقانىن مالىمدەدى.