ق ر عىلىم جانە جوعارى ءبىلىم مينيسترلىگى لوندوندا وتكەن London FWD ءىس-شاراسى اياسىندا Coursera Learning Excellence Award حالىقارالىق سىيلىعىنا يە بولدى. ءىس-شارا Coursera جانە Udemy جەتەكشى ءبىلىم بەرۋ تەحنولوگيالىق پلاتفورمالارىن، سونداي-اق ەۋروپا، تاياۋ شىعىس جانە افريكا (EMEA) ەلدەرىندەگى نەگىزگى سەرىكتەستەردى بىرىكتىردى.
شارا بارىسىندا سونداي-اق حالىقارالىق EY كونسالتينگتىك كومپانياسى، ۇلى بريتانيانىڭ Nationwide بانكى جانە يتاليانىڭ bIP تەحنولوگيالىق كونسالتينگتىك كومپانياسى ماراپاتتالدى. Coursera كومپانياسىنىڭ باس ديرەكتورى گرەگ حارتتىڭ (Greg Hart) جەتەكشىلىگىمەن وتكەن ءىس-شاراعا سيفرلىق ءبىلىم بەرۋدى دامىتۋ جانە بىلىكتى كادرلار دايارلاۋ باعىتىندا جۇمىس ىستەيتىن جەتەكشى حالىقارالىق ۇيىمداردىڭ باسشىلارى قاتىستى.
- قازاقستان بۇل ماراپاتقا حالىقارالىق ونلاين وقىتۋدى جوعارى ءبىلىم بەرۋ جۇيەسىنە ينتەگراتسيالاۋ، سونداي-اق قازىرگى ەكونوميكادا سۇرانىسقا يە سيفرلىق قۇزىرەتتەر مەن جاساندى ينتەللەكت سالاسىنداعى داعدىلاردى دامىتۋ باعىتىنداعى جەتىستىكتەرى ءۇشىن يە بولدى. قازاقستان مەن Coursera اراسىنداعى ىنتىماقتاستىق 2022-جىلى باستالعاننان بەرى بىرلەسكەن باستاما ۇلتتىق جوعارى ءبىلىم بەرۋ جۇيەسىن جاڭعىرتۋدىڭ ستراتەگيالىق ماڭىزدى باعىتتارىنىڭ بىرىنە اينالدى، - دەلىنگەن حابارلامادا.
سيفرلىق ءبىلىم بەرۋدى دامىتۋ – ق ر عىلىم جانە جوعارى ءبىلىم مينيسترلىگى قىزمەتىنىڭ باسىم باعىتتارىنىڭ ءبىرى. ۆەدومستۆودا زاماناۋي ءبىلىم بەرۋ تەحنولوگيالارىن ەنگىزۋ، حالىقارالىق ونلاين وقىتۋ پلاتفورمالارىمەن ىنتىماقتاستىقتى كەڭەيتۋ، سونداي-اق ستۋدەنتتەردىڭ قازىرگى ەڭبەك نارىعىندا سۇرانىسقا يە سيفرلىق جانە يكەمدى داعدىلارىن قالىپتاستىرۋ باعىتىندا جۇيەلى جۇمىس جۇرگىزىلىپ كەلەدى.
مينيسترلىكتىڭ جوعارى ءبىلىم بەرۋدى سيفرلىق ترانسفورماتسيالاۋ باعىتىنداعى جۇمىسى بۇعان دەيىن دە حالىقارالىق دەڭگەيدە مويىندالعان بولاتىن. اتاپ ايتقاندا، 2025-جىلى عىلىم جانە جوعارى ءبىلىم ءمينيسترى ساياسات نۇربەك Coursera Learning Hero Award سىيلىعىنا يە بولدى. ال 2026-جىلى Coursera Learning Excellence Award سىيلىعىنىڭ بەرىلۋى وسى جەتىستىكتىڭ زاڭدى جالعاسى بولىپ، ەلىمىزدىڭ سيفرلىق ءبىلىم بەرۋ مەن جاساندى ينتەللەكت سالاسىنداعى ۇلتتىق ستراتەگياسىنىڭ جۇيەلى تۇردە جۇزەگە اسىرىلىپ جاتقانىن كورسەتتى. سونىمەن قاتار بۇل جەتىستىك ستۋدەنتتەردىڭ العان بىلىمدەرى مەن داعدىلارىن ءىس جۇزىندە قولدانۋىنا، كاسىپكەرلەردىڭ جاڭا بۋىنىن قالىپتاستىرۋعا جانە ستارتاپ ەكوجۇيەسىن دامىتۋعا مۇمكىندىك بەرەتىن باستامالاردىڭ اۋقىمى كەڭەيىپ كەلە جاتقانىن ايعاقتايدى.
قازاقستاننىڭ 100 ۋنيۆەرسيتەتى Coursera پلاتفورماسىن پايدالانادى
باستامانى ىسكە اسىرۋ ناتيجەسىندە قازاقستاندىق جوعارى وقۋ ورىندارىنىڭ ستۋدەنتتەرى مىڭداعان حالىقارالىق ونلاين كۋرسقا، الەمنىڭ جەتەكشى ۋنيۆەرسيتەتتەرى مەن سالالىق سەرىكتەستەرىنىڭ كاسىبي سەرتيفيكاتتاۋ باعدارلامالارىنا قول جەتكىزىپ، تاجىريبەلىك داعدىلارىن جەتىلدىرۋگە مۇمكىندىك الدى.
بۇگىن Coursera پلاتفورماسىندا 292 مىڭنان استام ءبىلىم الۋشى سەرتيفيكات يەلەنىپ، بەرىلگەن سەرتيفيكاتتاردىڭ جالپى سانى 682 مىڭنان استى. وقۋعا جۇمسالعان ۋاقىتتىڭ جيىنتىق كولەمى 5,35 ميلليون ساعاتتان اسىپ، قازاقستاندىق جوعارى وقۋ ورىندارىنىڭ ءبىلىم بەرۋ باعدارلامالارى اياسىندا 163098 اكادەميالىق كرەديت ەسەپكە الىندى.
2026-جىلى ق ر عىلىم جانە جوعارى ءبىلىم مينيسترلىگى ەلىمىزدىڭ 100 جوعارى وقۋ ورنىنا Coursera پلاتفورماسىن پايدالانۋعا 38184 ليسەنزيا ءبولدى.
قازىر ەلىمىزدىڭ 100 دەن استام ۋنيۆەرسيتەتى Coursera كۋرستارىن ءبىلىم بەرۋ باعدارلامالارىنا جۇيەلى تۇردە ەنگىزىپ، ونلاين وقىتۋ ناتيجەلەرىن رەسمي جوعارى ءبىلىم بەرۋ جۇيەسى اياسىندا تانۋ تاجىريبەسىن جۇزەگە اسىرادى.
وسىدان بۇرىن «دارىن» جاستار سىيلىعىنىڭ ۇمىتكەرلەرى بەلگىلى بولدى.