12-قاراشادا نيۋ-يورك قالاسىندا The Explorers Club حالىقارالىق زەرتتەۋشىلەر ۇيىمىنىڭ ورتالىق ازيا بولىمشەسىنىڭ (Central Asia Chapter) رەسمي اشىلۋ ءراسىمى ءوتتى.
ءىس-شارا بارىسىندا قازاقستاننىڭ بيوالۋانتۇرلىلىكتى ساقتاۋ قاۋىمداستىعىنىڭ (ا س ب ك) وكىلى البەرت سالەمگارەيەۆ ەلىمىزدىڭ تابيعي مۇراسى، سونىڭ ىشىندە كيىكتەردى ساقتاۋ جانە ولاردىڭ پوپۋلياتسياسىن قالپىنا كەلتىرۋ باعىتىندا اتقارىلعان جۇمىستار تۋرالى باياندادى.
ءبىر كەزدەرى سانى كۇرت ازايىپ، جويىلىپ كەتۋ قاۋپىنە تاپ بولعان كيىكتەردىڭ پوپۋلياتسياسىن قالپىنا كەلتىرۋ قازاقستانداعى تابيعاتتى قورعاۋ جۇمىستارىنىڭ ماڭىزدى ناتيجەلەرىنىڭ بىرىنە اينالدى.
- بۇل ناتيجەگە كوپجىلدىق قورعاۋ شارالارى، عىلىمي زەرتتەۋلەر، تۇراقتى مونيتورينگ جانە تابيعات قورعاۋ ۇيىمدارىنىڭ بىرلەسكەن جۇمىسى ىقپال ەتتى. The Explorers Club ۇيىمىنىڭ ورتالىق ازيا بولىمشەسىنىڭ اشىلۋى حالىقارالىق عىلىمي ىنتىماقتاستىقتى كەڭەيتۋگە، بىرلەسكەن ەكسپەديتسيالار ۇيىمداستىرۋعا جانە ءوڭىردىڭ تابيعي مۇراسىن زەرتتەۋگە جاڭا مۇمكىندىكتەر بەرەدى،-دەلىنگەن ءىس-شارا تۋرالى اقپاراتتا.
وسىلايشا، قازاقستاننىڭ جابايى تابيعاتتى قورعاۋ سالاسىنداعى تاجىريبەسى حالىقارالىق عىلىمي قاۋىمداستىققا ۇسىنىلىپ، كيىكتەردى ساقتاپ قالۋ جانە ولاردىڭ سانىن قالپىنا كەلتىرۋ ماسەلەلەرى حالىقارالىق دەڭگەيدە تالقىلاندى.
ايتا كەتەيىك، بۇعان دەيىن ۇلى بريتانيا حانزاداسى ۋيليام BBC ەفيرىندە قازاقستاننىڭ كيىك پوپۋلياتسياسىن قالپىنا كەلتىرۋدەگى جەتىستىگىن جوعارى باعالاعان ەدى. ول كيىكتەر سانىنىڭ قايتا كوبەيۋىنە قازاقستانداعى تابيعاتتى قورعاۋ شارالارى ىقپال ەتكەنىن اتاپ ءوتتى.