بۇل ماسەلە قازاقستان رەسپۋبليكاسىنىڭ كۋۆەيت مەملەكەتىندەگى ەلشىسى ەرجان ەلەكەيەۆ پەن كۋۆەيت ازاماتتىق اۆياتسيا باس باسقارماسىنىڭ پرەزيدەنتى شەيح حامۋد مۋباراك اس-ساباحتىڭ كەزدەسۋىندە قارالدى، دەپ حابارلايدى ق ر سىرتقى ىستەر مينيسترلىگىنىڭ باسپا ءسوز قىزمەتى.
تاراپتار ازاماتتىق اۆياتسيا سالاسىنداعى قازاق-كۋۆەيت ىنتىماقتاستىعىن ودان ءارى دامىتۋ جانە ەكى ەل اراسىنداعى تىكەلەي اۋە قاتىناسىن كەڭەيتۋ پەرسپەكتيۆالارىن تالقىلادى.
قازاقستان مەن كۋۆەيت اراسىنداعى تىكەلەي جولاۋشىلار رەيستەرىنىڭ جيىلىگىن ارتتىرۋ مۇمكىندىكتەرىنە ەرەكشە نازار اۋدارىلدى. بۇل ەكى مەملەكەت اراسىنداعى ىسكەرلىك جانە تۋريستىك بايلانىستاردى ودان ءارى دامىتۋعا ىقپال ەتەتىنى اتاپ ءوتىلدى.
سونداي-اق قازاقستاندىق ونىمدەردى كۋۆەيت نارىعىنا تاسىمالداۋ مۇمكىندىكتەرىن كەڭەيتۋدى جانە قازاقستان مەن كۋۆەيت اراسىنداعى كولىك-لوگيستيكالىق بايلانىستاردى نىعايتۋدى قوسا العاندا، اۋە جۇك تاسىمالدارىن دامىتۋ پەرسپەكتيۆالارى قاراستىرىلدى.
قازاقستان مەن كۋۆەيت اراسىنداعى اۋە قاتىناسى تۋرالى ۇكىمەتارالىق كەلىسىمدى جاساسۋ ماسەلەسى جەكە قارالدى. اتالعان كەلىسىمنىڭ جوباسى بۇعان دەيىن قازاقستاندىق تاراپپەن كۋۆەيت تاراپىنىڭ قاراۋىنا ۇسىنىلعان بولاتىن. وسىعان بايلانىستى قۇجاتتى كەيىننەن قول قويۋ ماقساتىندا ودان ءارى پىسىقتاۋدىڭ ماڭىزدىلىعى اتالدى.
ءوز كەزەگىندە شەيح حامۋد اس-ساباح كۋۆەيت تاراپىنىڭ قازاقستانمەن ازاماتتىق اۆياتسيا سالاسىنداعى ىنتىماقتاستىقتى دامىتۋعا مۇددەلىلىگىن ءبىلدىرىپ، ەكىجاقتى ءوزارا ءىس-قيمىلدى تەرەڭدەتۋ، اۋە قاتىناسىن كەڭەيتۋ جانە بىرلەسكەن باستامالاردى ىسكە اسىرۋ ءۇشىن قاجەتتى كۇش-جىگەر جۇمساۋعا دايىن ەكەنىن راستادى.
كەزدەسۋ قورىتىندىسى بويىنشا تاراپتار ازاماتتىق اۆياتسيا سالاسىنداعى ىنتىماقتاستىقتى نىعايتۋعا جانە قازاقستان مەن كۋۆەيت اراسىنداعى تىكەلەي اۋە قاتىناسىن ودان ءارى دامىتۋعا ءوزارا مۇددەلىلىگىن راستادى.
وسىعان دەيىن كۋۆەيتتىڭ قازاقستاننىڭ مۇناي-گاز جوبالارىنا كوز تىگىپ وتىرعانى تۋرالى جازدىق.