قازاقستان مەن جاپونيا اراسىندا تىكەلەي اۋە رەيسى ىسكە قوسىلادى

استانا. KAZINFORM - قازاقستان مەن جاپونيا اراسىنداعى تىكەلەي اۋە قاتىناسى قايتا جاندانادى. 30-قاراشادان باستاپ Air Astana الماتى - توكيو باعىتى بويىنشا اپتاسىنا ەكى رەت تۇراقتى رەيس ورىنداۋدى جوسپارلاپ وتىر.

Фото: Kazinform\ЖИ

بۇل تۋرالى كولىك مينيسترلىگى ءمالىم ەتتى.

ي ك ا و- نىڭ اۋە كولىگى جونىندەگى جەتىنشى دۇنيەجۇزىلىك كونفەرەنسياسى (ATConf/7) اياسىندا ق ر كولىك ۆيتسە-ءمينيسترى تالعات لاستايەۆ پەن جاپونيانىڭ جەر، ينفراقۇرىلىم، كولىك جانە تۋريزم مينيسترلىگى مينيستر حاتشىلىعىنىڭ حالىقارالىق اۆياتسيا جونىندەگى ۆيتسە-ءمينيسترىنىڭ كومەكشىسى سەيتي تادزيما مىرزانىڭ كەزدەسۋى ءوتتى.

كەزدەسۋ بارىسىندا تاراپتار ازاماتتىق اۆياتسيا سالاسىنداعى ەكىجاقتى ىنتىماقتاستىقتى ودان ءارى دامىتۋ، قازاقستان مەن جاپونيا اراسىنداعى اۋە قاتىناسىن كەڭەيتۋ پەرسپەكتيۆالارىن تالقىلادى، اتاپ ايتقاندا، الماتى - توكيو باعىتى بويىنشا تىكەلەي اۋە قاتىناسىن ىسكە قوسۋ تۋرالى ايتتى.

تالعات لاستايەۆ تىكەلەي اۋە قاتىناسىنىڭ اشىلۋى ۇزاق ۇزىلىستەن كەيىن ەكى ەل اراسىنداعى كولىكتىك بايلانىستى نىعايتۋدىڭ ماڭىزدى كەزەڭىنە اينالاتىنىن جانە ىسكەرلىك، تۋريستىك، ينۆەستيتسيالىق ءارى گۋمانيتارلىق بايلانىستاردى دامىتۋعا قوسىمشا سەرپىن بەرەتىنىن اتاپ ءوتتى.

2026-جىلعى 30-قاراشادان باستاپ «Air Astana» اۋە كومپانياسى الماتى - توكيو (ناريتا اۋەجايى) باعىتى بويىنشا اپتاسىنا ەكى رەت جيىلىكپەن تۇراقتى تىكەلەي رەيستەردى ورىنداۋعا كىرىسۋدى جوسپارلاپ وتىر. اۋە بيلەتتەرىن ساتۋ اعىمداعى جىلدىڭ 2-قازانىنان باستاپ اشىلدى.

ۇشۋلار Airbus A321LR اۋە كەمەلەرىمەن ورىندالادى. اۋە كومپانياسىنىڭ كەستەسىنە سايكەس ۇشۋ ۇزاقتىعى الماتى - توكيو باعىتى بويىنشا شامامەن 7 ساعات 30 مينۋتتى جانە كەرى باعىتتا 9 ساعات 25 مينۋتتى قۇرايدى.

رەيستەردى ىسكە قوسۋ ەكى ەل اراسىنداعى اۋە تاسىمالىنىڭ قولجەتىمدىلىگىن ارتتىرۋعا، تۋريستىك ساپارلار مەن ىسكەرلىك بايلانىستار ءۇشىن قوسىمشا مۇمكىندىكتەر جاساۋعا، سونداي-اق قازاقستاننىڭ ورتالىق ازياداعى ماڭىزدى اۆياتسيالىق جانە ترانزيتتىك حاب رەتىندەگى ءرولىن نىعايتۋعا باعىتتالعان.

اڭگىمە بارىسىندا قازاقستاندىق تاراپ اۋە قاتىناسىن ودان ءارى كەڭەيتۋگە جانە ەكى ەلدىڭ ۇلتتىق اۋە تاسىمالداۋشىلارى اراسىنداعى ءوزارا ءىس-قيمىلدى دامىتۋعا مۇددەلىلىك ءبىلدىردى.

كەزدەسۋدىڭ جەكە تاقىرىبى يكاو شەڭبەرىندەگى ىنتىماقتاستىق بولدى. تالعات لاستايەۆ جاپون تاراپىن توسيۋكي ونۋما مىرزانىڭ يكاو كەڭەسىنىڭ پرەزيدەنتى لاۋازىمىنا سايلانۋىمەن قۇتتىقتاپ، بۇل وقيعانىڭ جاپونيا مەن بۇكىل ازيا-تىنىق مۇحيتى ءوڭىرى ءۇشىن ماڭىزدىلىعىن اتاپ ءوتتى. ۇيىم تاريحىندا العاش رەت اتالعان ءوڭىردىڭ وكىلى يكاو كەڭەسىنە باسشىلىق ەتىپ وتىر.

ۆيتسە-مينيستر الەمدىك ازاماتتىق اۆياتسيانىڭ قاۋىپسىزدىگىن، ورنىقتى دامۋىن قامتاماسىز ەتۋ جانە تيىمدىلىگىن ارتتىرۋ ماقساتىندا قازاقستان مەن جاپونيانىڭ اۆياتسيالىق ۆەدومستۆولارى اراسىنداعى بەلسەندى ديالوگتى قولداۋدىڭ، سونداي-اق حالىقارالىق الاڭدارداعى ءوزارا ءىس-قيمىلدى ودان ءارى نىعايتۋدىڭ ماڭىزدىلىعىنا توقتالدى.

ايتا كەتەيىك، بۇعان دەيىن قىتايدىڭ تاعى ەكى قالاسىنا قازاقستاننان تىكەلەي ۇشۋعا بولاتىنىن جازدىق.