مەملەكەت باسشىسى قاسىم-جومارت توقايەۆتىڭ باستاماسىمەن قازاقستاندا ءبىلىم ساپاسى مەن قولجەتىمدىلىگىن ارتتىرۋعا، زاماناۋي مەكتەپ ينفراقۇرىلىمىن دامىتۋعا جانە پەداگوگتەردىڭ الەۋەتىن نىعايتۋعا باعىتتالعان اۋقىمدى رەفورمالار جۇيەلى تۇردە جۇزەگە اسىرىلۋدا. بۇل باعىتتار ادامي كاپيتالدى دامىتۋ جونىندەگى مەملەكەتتىك ساياساتتىڭ ماڭىزدى بولىگى بولىپ سانالادى.
2025-جىلعى جاھاندىق يننوۆاتسيالار يندەكسىنىڭ (Global Innovation Index) ناتيجەسى بويىنشا قازاقستان ورتالىق جانە وڭتۇستىك ازيا ەلدەرى اراسىندا «ءبىلىم بەرۋ» كورسەتكىشى بويىنشا ءبىرىنشى ورىنعا يە بولدى. الەمدىك رەيتينگتە ەلىمىز 68-ورىنعا شىقتى.
حالىقارالىق مەنەدجمەنتتى دامىتۋ ينستيتۋتىنىڭ (IMD) الەمدىك باسەكەگە قابىلەتتىلىك رەيتينگىندە دە وڭ ديناميكا بايقالدى. «ءبىلىم بەرۋ» كورسەتكىشى بويىنشا قازاقستان 69 ەلدىڭ اراسىندا 2021-جىلعى 45-ورىننان 2025-جىلى 38-ورىنعا كوتەرىلىپ، سوڭعى بەس جىلداعى ەڭ جوعارى ناتيجەگە قول جەتكىزدى.
تاعى ءبىر ماڭىزدى جەتىستىك - قازاقستاننىڭ ورتا ءبىلىم بەرۋ جۇيەسىندەگى وقۋشىلار مەن پەداگوگتەر سانىنىڭ اراقاتىناسى بويىنشا 69 ەلدىڭ اراسىندا ەكىنشى ورىن الۋى. IMD- نىڭ الەمدىك تالانتتار رەيتينگىنىڭ مالىمەتىنە سايكەس، ەلىمىزدە ءبىر پەداگوگكە 8,34 وقۋشىدان كەلەدى.
مەملەكەتتىك ساياسات اياسىندا ءبىلىم بەرۋ ينفراقۇرىلىمىن دامىتۋ جۇمىستارى جالعاسۋدا. مەملەكەت باسشىسىنىڭ باستاماسىمەن جۇزەگە اسىرىلعان «كەلەشەك مەكتەپتەرى» ۇلتتىق جوباسى اياسىندا 460 مىڭ وقۋشى ورنىنا ارنالعان 217 زاماناۋي مەكتەپ سالىندى. سونىمەن قاتار پەداگوگتەردى قولداۋ شارالارى جەتىلدىرىلىپ، ءبىلىم ساپاسىن ارتتىرۋعا قاجەتتى جاعدايلار جاسالۋدا.
حالىقارالىق رەيتينگتەردىڭ كورسەتكىشتەرى قازاقستاننىڭ ءبىلىم بەرۋ سالاسىنداعى ورنىن ايقىنداپ، ادامي كاپيتالدى نىعايتۋداعى ءبىلىم بەرۋ جۇيەسىن جۇيەلى دامىتۋدىڭ ماڭىزىن كورسەتەدى.
ايتا كەتەلىك قازاقستاندىق جاس روبوتوتەحنيكتەر الەمنىڭ ۇزدىك تورتتىگىنە ەنگەن ەدى.