مينيسترلىكتىڭ دەرەگىنشە، قازاقستاندا فارماتسيەۆتيكالىق ءونىم ەكسپورتىنىڭ كولەمى ارتىپ، سالاداعى ينۆەستيتسيالىق ىنتىماقتاستىق كەڭەيىپ كەلەدى. وتاندىق فارماتسيەۆتيكالىق ونىمدەردىڭ باسىم بولىگى كورشىلەس مەملەكەتتەرگە جەتكىزىلەدى.
سونىمەن قاتار ەكسپورت گەوگرافياسىن ودان ءارى كەڭەيتۋگە، ونىڭ ىشىندە اۋعانستان نارىعىنا شىعۋعا الەۋەتى بار. بۇل تۋرالى قر دەنساۋلىق ساقتاۋ ۆيتسە-ءمينيسترى تيمۋر مۇراتوۆ «Kazakhstan- Afghanistan: Partnership for Health 2026» اتتى العاشقى قازاقستان- اۋعانستان مەديتسينالىق بيزنەس-فورۋمىندا مالىمدەدى.
ەكسپورت كورسەتكىشتەرىنىڭ وسۋىمەن قاتار، سالاعا ينۆەستيتسيا تارتۋ جۇمىستارى دا جالعاسىپ وتىر. 2025 -جىلعى جەلتوقساننان بەرى جالپى سوماسى 391,3 ميلليارد تەڭگەنى قۇرايتىن سەگىز ينۆەستيتسيالىق كەلىسىم جاسالدى.
كەلىسىمدەر «Khan Tengri»، «حيمفارم»، «نوبەل»، «التينفارم»، «رومفارم»، «ابدي يبراگيم گلوبال فارم»، «قاراعاندى فارماتسيەۆتيكالىق كەشەنى» جانە «ستەپپە» كومپانيالارىمەن جاسالعان. ينۆەستيتسيالىق ىنتىماقتاستىقتى دامىتۋ جانە ەكسپورتتىق مۇمكىندىكتەردى كەڭەيتۋ وتاندىق فارماتسيەۆتيكا سالاسىن نىعايتىپ، ونىڭ باسەكەگە قابىلەتتىلىگىن ارتتىرۋعا جول اشادى.
فورۋم شەڭبەرىندە 28-29-قازاندا اۋعانستان دەلەگاتسياسى قازاقستاننىڭ ءىرى وتاندىق وندىرۋشىلەرىنىڭ وندىرىستىك الاڭدارىن ارالاپ، كاسىپورىنداردىڭ وندىرىستىك قۋاتىمەن، تەحنولوگيالارىمەن جانە ساپانى باقىلاۋ جۇيەسىمەن تانىستى.
بۇگىندە قازاقستاندا 209 ءوندىرۋشى جۇمىس ىستەيدى. ونىڭ 43 ى دارىلىك زاتتار وندىرىسىنە، قالعانى مەديتسينالىق بۇيىمدار شىعارۋعا ماماندانعان.
دەنساۋلىق ساقتاۋ مينيسترلىگى وتاندىق جانە شەتەلدىك وندىرۋشىلەرمەن تۇراقتى ديالوگ جۇرگىزىپ، پاتسيەنتتەردىڭ مۇددەلەرى مەن فارماتسيەۆتيكا سالاسىنىڭ دامۋى اراسىنداعى تەپە- تەڭدىكتى قامتاماسىز ەتۋگە باسىمدىق بەرەدى.