قازاقستاننىڭ ب ۇ ۇ جانىنداعى تۇراقتى وكىلى قايرات وماروۆ پەن ناوەرو رەسپۋبليكاسىنىڭ ب ۇ ۇ جانىنداعى تۇراقتى وكىلى لارا ەراب دانيەل ەكى ەل اراسىندا ديپلوماتيالىق قاتىناستار ورناتۋ تۋرالى بىرلەسكەن كومميۋنيكەگە قول قويدى.
ناوەرو قازاقستان ديپلوماتيالىق قاتىناس ورناتقان الەمدەگى 195-مەملەكەت اتاندى. وسىلايشا ەلىمىز ب ۇ ۇ- عا مۇشە بارلىق مەملەكەتپەن ديپلوماتيالىق بايلانىس ورناتىپ، وتاندىق ديپلوماتيا تاريحىنداعى ماڭىزدى كەزەڭدى اياقتادى.
- قۇجاتقا قول قويۋ ب ۇ ۇ جارعىسى مەن حالىقارالىق قۇقىق قاعيداتتارىنا، ونىڭ ىشىندە مەملەكەتتەردىڭ ەگەمەندىگى مەن اۋماقتىق تۇتاستىعىن ءوزارا قۇرمەتتەۋ، مەملەكەتتەردىڭ تەڭدىگى جانە ءبىر-ءبىرىنىڭ ىشكى ىستەرىنە ارالاسپاۋ قاعيداتتارىنا نەگىزدەلگەن ەكىجاقتى ىنتىماقتاستىقتى دامىتۋعا نەگىز قالادى، - دەپ حابارلادى مينيسترلىك.
كەزدەسۋ بارىسىندا تاراپتار ساياسي ديالوگتى، ساۋدا-ەكونوميكالىق جانە گۋمانيتارلىق بايلانىستاردى دامىتۋ مۇمكىندىكتەرىن تالقىلادى.
ساۋدا، ورنىقتى دامۋ، تسيفرلاندىرۋ جانە ادامي كاپيتالدى دامىتۋ ەكىجاقتى ىنتىماقتاستىقتىڭ پەرسپەكتيۆالى باعىتتارى رەتىندە اتالدى.
سونداي-اق ب ۇ ۇ جانە باسقا دا حالىقارالىق ۇيىمدار اياسىنداعى ارىپتەستىكتى نىعايتۋعا ەرەكشە نازار اۋدارىلدى.
تاراپتار حالىقارالىق كۇن تارتىبىندەگى وزەكتى ماسەلەلەر بويىنشا تۇراقتى ديالوگ جۇرگىزۋدىڭ جانە قازاقستان مەن تىنىق مۇحيتى ءوڭىرى مەملەكەتتەرى اراسىنداعى ىنتىماقتاستىقتى كەڭەيتۋدىڭ ماڭىزدىلىعىن اتاپ ءوتتى.
سىرتقى ىستەر مينيسترلىگىنىڭ مالىمەتىنشە، ناوەرومەن ديپلوماتيالىق قاتىناستىڭ ورناتىلۋى قازاقستاننىڭ حالىقارالىق بايلانىستاردى كەڭەيتۋ جانە الەم ەلدەرىمەن سىندارلى ديالوگتى دامىتۋ ساياساتىنىڭ جالعاسى سانالادى.
ايتا كەتەيىك، بۇعان دەيىن قازاقستان مەن وڭتۇستىك سۋدان ديپلوماتيالىق قاتىناستار ورناتقان ەدى. 2025-جىلعى 15-جەلتوقساندا ەكى ەلدىڭ ب ۇ ۇ جانىنداعى تۇراقتى وكىلدەرى بىرلەسكەن كومميۋنيكەگە قول قويعان. وڭتۇستىك سۋدان قازاقستان ديپلوماتيالىق بايلانىس ورناتقان 191-مەملەكەت بولعان.