جيىنعا حالىقارالىق ۇيىمنىڭ باسشىلىعى مەن ۇلتتىق فەدەراتسيالاردىڭ دەلەگاتتارى قاتىستى. مينيستر قازاقستاندا كونگرەستىڭ ءوتۋى حالىقارالىق سپورت قوعامداستىعىنىڭ ەلگە دەگەن سەنىمىنىڭ بەلگىسى ەكەنىن اتاپ ءوتىپ، الداعى الەم چەمپيوناتىن جوعارى دەڭگەيدە وتكىزۋگە كۇش سالىناتىنىن ايتتى.
ەربول مىرزابوسىنوۆ ءوز سوزىندە كۇرەستىڭ قازاق حالقى ءۇشىن ايرىقشا ماڭىزىنا جانە وسكەلەڭ ۇرپاقتى تاربيەلەۋدەگى رولىنە توقتالدى.
- كۇرەس - حالقىمىزدىڭ مادەنيەتىندە تامىرى تەرەڭ ءارى باي ءداستۇرى بار سپورت ءتۇرى. ول توزىمدىلىكتى، سابىرلىقتى جانە قارسىلاسقا دەگەن قۇرمەتكە تاربيەلەيدى. قازاق پالۋاندارىنىڭ جەتىستىكتەرى - ەلىمىزدىڭ ماقتانىشى ءارى جاس سپورتشىلارعا ۇلگى. ءبىز كۇرەستى دامىتۋعا جانە حالىقارالىق ىنتىماقتاستىقتى نىعايتۋعا ەرەكشە نازار اۋدارامىز، - دەدى ەربول مىرزابوسىنوۆ.
مينيستر الداعى الەم چەمپيوناتىن وتكىزۋ ماسەلەسىنە دە توقتالىپ، UWW پرەزيدەنتى نەناد لالوۆيچكە، ۇيىم باسشىلىعى مەن ۇلتتىق فەدەراتسيالارعا كورسەتكەن سەنىمى مەن قولداۋى ءۇشىن العىسىن ءبىلدىردى.
- ەرتەڭ استانادا كۇرەس تۇرلەرىنەن الەم چەمپيوناتى باستالادى. قازاقستان ءۇشىن بۇل - ۇلكەن جاۋاپكەرشىلىك. ءبىز الەمنىڭ ەڭ مىقتى پالۋاندارىن لايىقتى قارسى الىپ، جارىستى جوعارى دەڭگەيدە وتكىزۋ ءۇشىن بار كۇشىمىزدى سالامىز، - دەدى مينيستر.
كونگرەستىڭ كۇن تارتىبىنە UWW پرەزيدەنتى مەن بيۋرو مۇشەلەرىن سايلاۋ، ۇيىمنىڭ 2024- 2026-جىلدارداعى قىزمەتىنىڭ قورىتىندىسىن شىعارۋ، قارجى ەسەبى، تورەشىلەر ماسەلەسى، 2028-جىلعى لوس-اندجەلەس وليمپياداسىنا دايىندىق جانە ىرىكتەۋ جۇيەسى ەنگىزىلگەن.
كونگرەستىڭ باستى تاقىرىپتارىنىڭ ءبىرى - حالىقارالىق كۇرەس فەدەراتسياسىنىڭ 2026-2032-جىلدارعا ارنالعان جاڭا ستراتەگياسى. وندا جاستار مەن مەكتەپ سپورتىن دامىتۋ، ايەلدەر كۇرەسىنىڭ مۇمكىندىكتەرىن كەڭەيتۋ، ءبىلىم بەرۋ باعدارلامالارىن جەتىلدىرۋ، ماركەتينگ پەن كوممەرتسيا باعىتىن كۇشەيتۋ، سونداي-اق باسقارۋ تيىمدىلىگىن ارتتىرۋ قاراستىرىلعان.
ايتا كەتەيىك، ەرەسەكتەر اراسىنداعى گرەك-ريم، ەركىن جانە ايەلدەر كۇرەسىنەن الەم چەمپيوناتى 24-قازان مەن 1-قاراشا ارالىعىندا وتەدى.
وسىعان دەيىن كۇرەستەن استاناداعى الەم چەمپيوناتىندا ەل نامىسىن قورعايتىن سپورتشىلاردىڭ ءتىزىمى جاريالاندى.