گەرات قالاسىندا قازاقستان مەن اۋعانستان كاسىپكەرلەرىنىڭ قاتىسۋىمەن بيزنەس-فورۋم ءوتتى. قازاقستاندىق بيزنەس- دەلەگاتسيانى ق ر ساۋدا جانە ينتەگراتسيا ۆيتسە-ءمينيسترى اسەت ءنۇسىپوۆ باسقاردى. فورۋمعا اۋعانستان نارىعىنا شىعۋعا جانە ەكى ەل اراسىنداعى ىنتىماقتاستىقتى كەڭەيتۋگە مۇددەلى 12 گە جۋىق قازاقستاندىق كومپانيا قاتىستى.
فورۋم بارىسىندا ەكى ەلدىڭ كاسىپكەرلەرى B2B فورماتىندا كەزدەسىپ، ءوزارا ساۋدانى كەڭەيتۋ، قازاقستاندىق ءونىم ەكسپورتىن ارتتىرۋ جانە بىرلەسكەن جوبالاردى ىسكە اسىرۋ مۇمكىندىكتەرىن تالقىلادى.
- كەزدەسۋلەردىڭ قورىتىندىسى بويىنشا قازاقستاندىق WAYSTAR جانە Kim Rail International كومپانيالارى اۋعاندىق OSMAN KHALID كومپانياسىمەن بيداي جەتكىزۋگە قاتىستى جالپى قۇنى $11 ميلليون بولاتىن ەكى كەلىسىمشارتقا قول قويدى. سونىمەن قاتار قازاقستاننىڭ مايلى داقىلداردى وڭدەۋشىلەر ۇلتتىق قاۋىمداستىعىنىڭ قاتىسۋىمەن قۇنى شامامەن $10 ميلليون بولاتىن كۇنباعىس مايىن جەتكىزۋ تۋرالى كەلىسىم جاسالدى، - دەلىنگەن مينيسترلىك تاراتقان اقپاراتتا.
ساپار اياسىندا «حاف-گەرات» تەمىرجولىنىڭ ءۇشىنشى ۋچاسكەسىنىڭ اشىلۋ ءراسىمى دە ءوتتى. ونىڭ قۇرىلىسىنا قازاقستاندىق «Integra Construction KZ» ج ش س قاتىستى.
تاراپتار ءوزارا ساۋدانىڭ باسقا دا باعىتتارىنداعى ىنتىماقتاستىقتى جالعاستىرۋعا جانە ەكى ەلدىڭ بيزنەس وكىلدەرى اراسىنداعى تىكەلەي بايلانىستى ودان ءارى دامىتۋعا كەلىستى.
قازاقستاندىق دەلەگاتسيا گەرات پروۆينتسياسىنداعى يندۋستريالىق ايماقتىڭ وندىرىستىك الەۋەتىمەن دە تانىستى. ءىرى كاسىپورىنداردىڭ وكىلدەرى ءمارمار ءوندىرۋ جانە وڭدەۋ، مەتالل پروكاتىن شىعارۋ، فارماتسيەۆتيكا جانە الكوگولسىز سۋسىندار وندىرىسىندەگى كاسىپورىنداردىڭ جۇمىسىمەن تانىستىردى.
ايتا كەتەيىك، قازاقستان مەن اۋعانستان اراسىنداعى ساۋدا كولەمى دە ءوسىپ كەلەدى. 2026 -جىلدىڭ قاڭتار- شىلدە ايلارىندا ەكى ەل اراسىنداعى تاۋار اينالىمى $581,1 ميلليون بولدى. بۇل 2025 -جىلدىڭ بۇكىل قورىتىندىسىنداعى $541,6 ميلليون كورسەتكىشتەن جوعارى.
قازاقستاننىڭ اۋعانستانعا ەكسپورتىندا ۇن، بيداي، كۇنباعىس مايى، مەتال ونىمدەرى جانە مينەرالدى تىڭايتقىشتار نەگىزگى ورىن الادى. ساۋدا كولەمىنىڭ وسۋىنە ەكى ەل كاسىپكەرلەرى اراسىنداعى تىكەلەي ىسكەرلىك بايلانىستىڭ نىعايۋى دا ىقپال ەتىپ وتىر.
قازاقستان ەكى ەل اراسىنداعى ىسكەرلىك بايلانىستاردى دامىتۋ ءۇشىن تۇراقتى تۇردە ساۋدا- ەكونوميكالىق ميسسيالار، بيزنەس-فورۋمدار جانە B2B كەزدەسۋلەر وتكىزەدى. ال كابۋل مەن گەراتتاعى قازاقستاننىڭ ساۋدا ۇيلەرى وتاندىق ونىمدەردى اۋعانستان نارىعىندا ىلگەرىلەتۋگە جانە قازاقستاندىق كاسىپكەرلەردىڭ اۋعاندىق سەرىكتەستەرمەن تىكەلەي بايلانىس ورناتۋىنا مۇمكىندىك بەرەدى.
گەراتتاعى بيزنەس-فورۋم ناتيجەسىندە جاسالعان كەلىسىمدەر قازاقستان مەن اۋعانستان اراسىنداعى ساۋدانى كەڭەيتىپ، قازاقستاندىق ءونىم ەكسپورتىن ارتتىرۋعا جانە ەكى ەل كاسىپكەرلەرى اراسىنداعى تىكەلەي بايلانىستى نىعايتۋعا جاڭا مۇمكىندىك بەرەدى.