قازايەروناۆيگاتسيا تاۋلىگىنە 1 مىڭ 300-دەي ۇشاققا قىزمەت كورسەتەدى، دەپ حابارلايدى 24KZ.
مۇنىڭ بارلىعىن اتقارىپ، ۇشىپ-قونعانىن رەتتەپ وتىرعان - اۋە ديسپەتچەرلەرى. ءبىر عانا مامان بىرنەشە ۇشاقتى قاداعالايدى. ءار سەكۋند، ءار مەزەت ماڭىزدى. مىڭداعان ادام الىسقا اتتانىپ، مىڭداعان ادام ورالىپ جاتىر.
ءبىز قازىر اۋە ايلاقتىق ديسپەتچەرلىك ورتالىقتا تۇرمىز. ءدال وسى جەردەن ماماندار اۋە كولىگىنىڭ ۇشۋ-قونۋىن جانە اۋەجاي اۋماعىنداعى قوزعالىسىن باقىلايدى. ديسپەتچەرلەر ەكرانداعى جاعدايدى قاداعالاپ قانا قويماي، ۇشاقتاردىڭ باعىتى مەن قوزعالىس اراقاشىقتىعىن دا ەسكەرەدى. اسىرەسە اۋە كەمەلەرى قاتار ۇشىپ، اۋەجايعا قونۋعا بەت العان ساتتە دالدىك پەن جەدەل شەشىمنىڭ ماڭىزى ارتا تۇسەدى. اۋە قوزعالىسىن باسقارۋدا ءار سەكۋندتىڭ ماڭىزى زور. كەز كەلگەن جاعدايدا ديسپەتچەردىڭ كاسىبيلىگى مەن شاپشاڭ ارەكەتى شەشۋشى ءرول اتقارادى.
مەيىربەك ابدۋللين، «قازايەرو ناۆيگاتسيا» ر م ك ديسپەتچەرى:
- كوكتەمدە وسىنداي ءبىر جاعداي بولدى. راديوبايلانىس ءۇزىلىپ قالدى. الايدا قونۋعا ءالى بەس مينۋتتاي ۋاقىت بار ەدى. سول ۋاقىت ىشىندە ءبىز بايلانىستى قالپىنا كەلتىرۋ ءۇشىن بار كۇشىمىزدى سالىپ، ارەكەت جاساپ جاتتىق. ۇشاق قونۋعا ەكى ميلدەي، ياعني شامامەن ءتورت شاقىرىمداي قالعاندا عانا پيلوت بايلانىسقا شىقتى. سويتسەك، ول ءبىزدىڭ جۇمىس جيىلىگىمىزدى شاتاستىرىپ، راديوقۇرىلعىسىن باسقا جيىلىككە باپتاپ قويعان ەكەن. ول شەتەلدىك پيلوت بولعاندىقتان جانە بۇل اۋەجايدا كۇندەلىكتى ۇشىپ-قونبايتىندىقتان، مۇنداي جاعداي وعان تاڭسىق بولعان.
بىلتىر «قازايەروناۆيگاتسيا» كاسىپورنى 466 مىڭنان استام رەيسكە قىزمەت كورسەتتى. بيىل دا اۋە قوزعالىسىنىڭ قارقىنى جوعارى. جىل باسىنان بەرى 382 مىڭنان استام ۇشاق ۇشىپ-قونعان. تاۋلىگىنە 1300-گە تارتا اۋە كەمەسى كەلەدى مۇندا. وتكەن جىلى قازاقستاننىڭ اۋە كەڭىستىگى ارقىلى 290 مىڭنان استام ۇشاق ۇشىپ وتكەن.
يسلام جەتپىسباي، «قازايەرو ناۆيگاتسيا» ر م ك ديسپەتچەرى:
- ترانزيتتىك ۇشاقتاردىڭ كولەمى شامامەن 50 پايىزدى قۇرايدى. 2021-جىلدان بەرى بۇل باعىت قارقىندى دامىپ كەلەدى. قازاقستان ەۋروپا مەن ازيانىڭ ورتاسىندا ورنالاسقاندىقتان، ترانزيتتىك الەۋەتى جوعارى. ورتالىقتا 750-گە جۋىق اۋە ديسپەتچەرى بار. ولار ەكى جىل سايىن مەديتسينالىق تەكسەرۋدەن ءوتىپ، كاسىبي بىلىكتىلىگىن راستايدى. ال اعىلشىن ءتىلىن مەڭگەرۋ دەڭگەيى ءۇش جىلدا ءبىر رەت تەكسەرىلەدى.
اۋە قوزعالىسى جيىلەگەن سايىن ديسپەتچەردىڭ جۇمىسى دا كۇردەلەنە تۇسەدى. اسىرەسە اۋە كەمەلەرى بىرىنەن سوڭ ءبىرى قونۋعا جاقىنداعاندا، ديسپەتچەرلەر ءار ۇشاقتىڭ ۇشۋ مەن قونۋ كەزەگىن رەتتەيدى.
مەيىربەك ابدۋللين، اۋەايلاقتىق ديسپەتچەرلىك ورتالىعىنىڭ اۋە كەمەلەرى قوزعالىسىن تىكەلەي باسقارۋدى جۇزەگە اسىراتىن ديسپەتچەرى:
- قاراپايىم تىلمەن ايتقاندا، ۇشۋ-قونۋ جولاعىنا ءۇش، ءتورت نەمەسە بەس ۇشاق بىرىنەن سوڭ ءبىرى جاقىنداپ كەلە جاتادى. ولاردىڭ اراسىنداعى ەڭ از اراقاشىقتىق، مىسالى، ون ميل بولۋى مۇمكىن. وسىنداي كەزدە ديسپەتچەر قونۋعا كەلە جاتقان ۇشاقتاردىڭ اراسىنا ۇشاتىن ۇشاقتى كىرىستىرىپ، ءبىر ۇشاقتى قوندىرىپ، ەكىنشىسىن ۇشىرىپ، كەلەسىسىن قايتا قوندىرۋى كەرەك. مۇنىڭ ءبارىن ديسپەتچەر ناقتى ەسەپتەپ، ۇيلەستىرىپ وتىرادى. ويتكەنى مۇنداي جاعدايدا مينۋتتار ەمەس، سەكۋندتار شەشۋشى ءرول اتقارادى.
«قازايەرو ناۆيگاتسيا» باقىلايتىن اۋە كەڭىستىگىنىڭ جالپى اۋدانى 2,7 ميلليون شارشى شاقىرىم. قازاقستان كورشى ەلدەرمەن 76 حالىقارالىق اۋە ءدالىزى ارقىلى بايلانىس ورناتقان. جۇكتەمە جوعارى كەزەڭدەردە ەل اۋماعى ارقىلى ءبىر مەزەتتە 250-گە جۋىق ۇشاق ۇشىپ وتەدى.