«قازاقمىس» قىزمەتكەرلەرى قىمبات مەتالداردى ۇرلاعان

جەزقازعان. KAZINFORM - ىشكى ىستەر مينيسترلىگى قالا قۇراۋشى كاسىپورىندارداعى جەدەل جاعدايدى تۇراقتى تۇردە باقىلاۋدا ۇستايدى جانە ولاردىڭ قىزمەتىنە كەدەرگى كەلتىرەتىن ادامداردىڭ زاڭسىز ارەكەتىنىڭ جولىن كەسۋ بويىنشا شارالار قابىلدايدى.

سوڭعى ايدا ۇلىتاۋ وبلىسىندا وسىنداي بىرنەشە توپتاردى ۇستاۋ جۇزەگە اسىرىلدى.

«ۇيىمداسقان قىلمىسقا قارسى كۇرەس ءبولىنىسىنىڭ قىزمەتكەرلەرى «قازاقمىس كورپوراتسياسى» ج ش س قاۋىپسىزدىك قىزمەتىمەن بىرلەسىپ، قىمبات مەتالل قورىتپالارىن ۇرلاۋدى جولعا قويعان قىلمىستىق توپ ارەكەتىنىڭ جولىن كەستى. توپقا اتالعان كاسىپورىننىڭ قىزمەتكەرلەرى دە كىرگەن. كۇدىكتىلەر كاسىپورىننان 6,5 ميلليون تەڭگە ءونىمىن ۇرلاۋ كەزىندە ۇستالدى. قازىرگى ۋاقىتتا ولاردىڭ باسقا قىلمىستارعا قاتىسى بار- جوعى تەكسەرىلىپ جاتىر. سونداي-اق پوليتسيا 2022 -جىلدىڭ ناۋرىز ايىندا جەرگىلىكتى كاسىپكەردەن 20 ميلليون تەڭگە بوپسالاعان تاعى ءبىر توپ مۇشەلەرىن قۇىرقتادى. جابىرلەنۋشىنى جالدامالى پاتەرگە الداپ الىپ كەلىپ، فيزيكالىق كۇش قولدانىپ، قارۋ-جاراقپەن قورقىتۋ ارقىلى اقشا تالاپ ەتكەن. سونىمەن قاتار 2018-جىلى ورىن العان جەرگىلىكتى تۇرعىندى ولتىرۋگە وقتالۋ ارەكەتى اشكەرەلەندى. جەرگىلىكتى كريميناليتەتتەن قۇرالعان قىلمىستىق توپ انىقتالدى. وعان قاتىسۋشىلار قازىرگى ۋاقىتتا باسقا قىلمىستار جاساعانى ءۇشىن جازاسىن وتەپ جاتىر. كىسى ولتىرۋگە وقتالۋ ارەكەتى جاسالعان تاپانشا تاركىلەندى. كورسەتىلگەن فاكتىلەر بويىنشا بارلىعى 17 ادام ۇستالىپ، ىشكى ىستەر ورگاندارىنا جەتكىزىلدى. 20 دان استام ءتىنتۋ شارالارى وتكىزىلدى، ناتيجەسىندە 5 اتىس قارۋى، وق-دارىلەر، پىشاقتار جانە ەكسترەميستىك سيپاتتاعى ءدىني ادەبيەتتەر تاركىلەندى. بارلىق فاكتى بويىنشا سوتقا دەيىنگى تەرگەۋ جۇرگىزىلىپ جاتىر. وڭىرلەردە قىلمىستىق توپتاردىڭ قىزمەتىنە جول بەرمەۋ جۇمىستارى جالعاسىپ جاتىر»، - دەدى ءى ءى م ۇيىمداسقان قىلمىسقا قارسى كۇرەس دەپارتامەنتىنىڭ باسقارما باستىعى قۋاندىق الپىس.

ۇلىتاۋ وبلىسىندا الەۋمەتتىك ماڭىزى بار ازىق-تۇلىك تاۋارىنا ساۋدا ۇستەمەسىنىڭ مولشەرىن نەگىزسىز ارتتىرعان 205 كاسىپكەر جازالانعانىن جازعان بولاتىنبىز.