قازاقمىس بالقاشتىڭ تۇراقتى ەكوجۇيەسىن ساقتاۋعا 5 ميلليون دوللار بولەدى

استانا. قازاقپارات - Qazaqstan ۇلتتىق پاۆيلونىندا ب ۇ ۇ-نىڭ كليماتتىڭ وزگەرۋى تۋرالى نەگىزدەمەلىك كونۆەنتسياسى (COP29) تاراپتارىنىڭ 29-شى كونفەرەنسياسىندا «بالقاش كولىنىڭ سۋ رەسۋرستارىن باسقارۋ: حالىقارالىق ىنتىماقتاستىق، زەرتتەۋلەر جانە قارجىلاندىرۋ» اتتى تاقىرىپتىق ءىس-شارا ءوتتى. ءىس-شارانى قازاقستان رەسپۋبليكاسىنىڭ ەكولوگيا جانە تابيعي رەسۋرستار مينيسترلىگى مەن «قازاقمىس كورپوراتسياسى» ج ش س ۇيىمداستىردى.

باسقوسۋدا قازاقستان رەسپۋبليكاسىنىڭ ەكولوگيا جانە تابيعي رەسۋرستار ءمينيسترى ە. نىسانبايەۆ، قازاقستان رەسپۋبليكاسى سۋ رەسۋرستارى جانە يرريگاتسيا مينيسترلىگى سۋ شارۋاشىلىعى كوميتەتىنىڭ ءتوراعاسى ا. جاقانبايەۆ، ورتالىق ازياداعى كليماتتىڭ وزگەرۋى جانە ورنىقتى دامۋ سالاسىنداعى قىزمەتتەر جونىندەگى ەو وڭىرلىك ديرەكتورى ۆيكتور كوۆالەنكو ءسوز سويلەدى.

قازاقمىس كورپوراتسياسى بار وڭىرلەردە قورشاعان ورتانى قورعاۋ ءۇشىن جاۋاپكەرشىلىكتى تۇسىنەدى جانە ولاردىڭ ورنىقتى دامۋى بويىنشا مىندەتتەمەلەردى وزىنە الادى. ESG قاعيداتتارىنا سۇيەنە وتىرىپ، كومپانيا ەكولوگيالىق باستامالاردى بەلسەندى قولدايدى. اتاپ ايتقاندا، بالقاش كولىنىڭ ەكوجۇيەسىن ساقتاۋعا ەرەكشە نازار اۋدارادى.

ەسكە سالا كەتەيىك، بۇعان دەيىن بالقاش كولىنىڭ سۋ دەڭگەيى بالتىق جۇيەسىمەن 341 مەترگە جەتكەنىن حابارلاعان ەدىك.

اۆتور
ابىلايحان جۇماشەۆ