قازاقمىس بالقاشتىڭ تۇراقتى ەكوجۇيەسىن ساقتاۋ ءۇشىن 5 ميلليون دوللار بولەدى
استانا. KAZINFORM - «قازاقمىس» كورپوراتسياسى بالقاش كولىنىڭ ەكوجۇيەسىن ساقتاۋ ءۇشىن 5 ملن دوللار بولەتىنىن جاريالادى. بۇل تۋرالى «قازاقمىس» كورپوراتسياسىنىڭ تۇراقتى دامۋ جونىندەگى ديرەكتورى ساكەن شاياحمەتوۆ باكۋدە وتكەن COP29 حالىقارالىق كونفەرەنتسياسىندا ايتتى.
حالىقارالىق كونفەرەنتسيادا قازاقستان رەسپۋبليكاسى ەكولوگيا جانە تابيعي رەسۋرستار مينيسترلىگىنىڭ قولداۋىمەن قازاقمىس «بالقاش كولىنىڭ سۋ رەسۋرستارىن باسقارۋ: حالىقارالىق ىنتىماقتاستىق، زەرتتەۋلەر جانە قارجىلاندىرۋ» تاقىرىبىندا ديالوگتىق سەسسيا وتكىزدى. سەسسياعا ق ر ەكولوگيا جانە تابيعي رەسۋرستار ءمينيسترى ەرلان نىسانبايەۆ، ق ر سۋ رەسۋرستارى جانە يرريگاتسيا مينيسترلىگى سۋ شارۋاشىلىعى كوميتەتىنىڭ ءتوراعاسى ارسەن جاقابايەۆ، ErnstYoung كومپانياسىنىڭ ورتالىق ازياداعى كليماتتىڭ وزگەرۋى جانە تۇراقتى دامۋ ماسەلەلەرى جونىندەگى ايماقتىق ديرەكتورى ۆيكتور كوۆالەنكو، سونداي- اق ا ق ش، فينليانديا، يران مەملەكەتتەرىنەن حالىقارالىق ساراپشىلار مەن ازيا دامۋ بانكى (ا د ب) سىندى ۇيىمداردىڭ وكىلدەرى قاتىستى.
سەسسيانى جۇرگىزگەن ساكەن شاياحمەتوۆ بالقاش كولىن ساقتاۋدىڭ ستراتەگيالىق ماڭىزىن اتاپ ءوتتى. ونىڭ ايتۋىنشا، بۇل ماسەلە ۇلتتىق ءارى حالىقارالىق دەڭگەيدە ەرەكشە نازاردا بولۋى ءتيىس.
«بالقاشتىڭ ارال تەڭىزىنىڭ قايعىلى تاعدىرىن قايتالاۋىنا جول بەرمەۋىمىز كەرەك. بۇل كول ميلليونداعان ادامنىڭ ءومىرى، ايماقتىڭ ەكونوميكاسىن جانە ەل بولاشاعىن ايقىندايتىن ماڭىزدى جوبالار ءۇشىن شەشۋشى مانگە يە. ءبىز وسى ماقساتقا جەتۋ ءۇشىن الەمدىك قاۋىمداستىقپەن كۇش- جىگەرىمىزدى بىرىكتىرۋگە دايىنبىز»، - دەدى س. شاياحمەتوۆ.
بۇعان دەيىن مامىر ايىندا بالقاش قالاسىندا ءوڭىردىڭ ەكولوگيالىق ماسەلەلەرىن شەشۋدە ماڭىزدى قادام بولعان سۋ-كليماتتىق فورۋمى وتكەن بولاتىن. بۇل ماسەلە COP29 كونفەرەنتسياسىندا حالىقارالىق دەڭگەيدە تالقىلاندى. كەلەسى كەزەڭدە جەتەكشى ساراپشىلاردىڭ قاتىسۋىمەن ناقتى باعدارلامالار مەن جوبالاردى جۇزەگە اسىرۋ جوسپارلانىپ وتىر.
جوسپارلانعان باستامالار اياسىندا قازاقمىس بالقاش كولىنىڭ ەكوجۇيەسىن زەرتتەۋگە ارنالعان عىلىمي جوبالاردى دامىتۋ جانە ايماقتىڭ سۋ رەسۋرستارىن تۇراقتى باسقارۋ تاسىلدەرىن ەنگىزۋگە نيەت ءبىلدىردى. بيوالۋاندىق پەن سۋدىڭ ساپاسىن باقىلاۋعا ەرەكشە نازار اۋدارىلىپ، ەكوجۇيەدەگى وزگەرىستەرگە دەر كەزىندە جاۋاپ بەرۋ كۇن تارتىبىنە قويىلادى. سونداي- اق جەرگىلىكتى حالىقتى ەكولوگيالىق تۇرعىدا اعارتۋ باعدارلامالارىن جۇزەگە اسىرۋ جانە سۋ رەسۋرستارىن ساقتاۋ سالاسىنداعى ۇزدىك تاجىريبەلەردى ەنگىزۋ ءۇشىن حالىقارالىق ساراپشىلارمەن جانە سەرىكتەستەرمەن ىنتىماقتاستىقتى دامىتۋ جوسپارلانۋدا.
الداعى 5-10 جىلدا جۇزەگە اسىرىلاتىن باستامالار بالقاش ەكوجۇيەسىنىڭ جاعدايىن جاقسارتۋعا، انتروپوگەندىك اسەردى ازايتۋعا، جەرگىلىكتى حالىق پەن بيزنەس اراسىندا ەكولوگيالىق جاۋاپكەرشىلىكتى ارتتىرۋعا جانە بالقاش- الاكول باسسەيىنىنىڭ تابيعي رەسۋرستارىن تۇراقتى باسقارۋدىڭ ءتيىمدى مودەلىن قۇرۋعا مۇمكىندىك بەرەدى.
قازاقمىس ارال تەڭىزىنىڭ قۇرعاۋى نەمەسە كاسپي تەڭىزىنىڭ قازىرگى ەكولوگيالىق قيىندىقتارى سياقتى اپاتتاردىڭ الدىن الۋ ءۇشىن بالقاشتى ساقتاۋ اسا ماڭىزدى ەكەنىن ەرەكشە اتاپ ءوتتى. ۇلتتىق جانە حالىقارالىق سەرىكتەستەردىڭ بىرلەسكەن كۇش- جىگەرى كولدى بولاشاق ۇرپاق ءۇشىن ومىرلىك ماڭىزى بار تابيعي ءارى ەكونوميكالىق رەسۋرس رەتىندە ساقتاپ قالۋعا كومەكتەسەدى.
اۆتور
ساياگۇل جارىلقاسىن