قازاق ونەرپازدارى وزبەكستانداعى ءىرى ءان فەستيۆالىندە جۇلدە ەنشىلەدى
تاشكەنت. قازاقپارات - 26-30-تامىز ارالىعىندا وزبەكستاننىڭ سامارقان قالاسىندا «شارك تارونالاري» («شىعىس اۋەندەرى») حالىقارالىق مۋزىكا فەستيۆالى ءوتتى.
بايقاۋ 5 جىلدىق ۇزىلىستەن كەيىن ونەرپازداردىڭ باسىن قايتا قوستى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
بيىل 13- رەت ۇيىمداستىرىلعان مۋزىكا فەستيۆالىنە الەمنىڭ 80-گە جۋىق مەملەكەتىنەن 400 ونەرپاز قاتىسىپ، رەگيستان الاڭىن اۋەزدى ءان مەن سيقىرلى سازعا بولەدى.
«بۇل فەستيۆال اياسىندا ۇيىمداستىرىلعان ءاربىر ءىس-شارا مەيماندارعا ەرەكشە اسەر قالدىرادى دەگەن ويدامىن. ونىڭ اۋقىمى ۋاقىت وتكەن سايىن كەڭەيىپ، دۇنيەجۇزى حالىقتارىن رۋحاني تۇرعىدا بىرىكتىرەتىن ءىرى ءان مەرەكەسى رەتىندە تانىلا باستادى. ءبىز وسى ارقىلى قوناقجايلىق قاسيەتىمىزدى دە كورسەتكىمىز كەلەدى»، - دەدى وزبەكستان مادەنيەت مينيسترلىگىنىڭ باسپا ءسوز حاتشىسى سيروجيددين ۋساروۆ.
العاش رەت 1997 -جىلى وتكەن «شارك تارونالاري» بايقاۋىنا 31 ەلدىڭ وكىلى قاتىسقان. سول جولى قازاقستان اتىنان فەستيۆالدە ونەر كورسەتكەن تانىمال ءانشى رامازان ستامعازيەۆ جۇلدە ەنشىلەگەن ەدى. كەيىن ونىڭ جولىن 2015 -جىلى ءبىرجان ءبازىلجانوۆ جالعادى.
بيىل دا فەستيۆالگە قاتىسقان قازاقستاندىق ونەرپازدار ولجاسىز قالمادى. ورالدىق «اتامەكەن» ەتنو- فولكلورلىق ءانسامبلى «شارك تارونالاري» بايقاۋىندا 2-ورىن يەلەندى.
«اتامەكەن» ەتنو-فولكلورلىق ءانسامبلىنىڭ قۇرىلعانىنا كوپ بولعان جوق. بۇعان دەيىن ەۋروپانىڭ ءبىراز ەلىن شارلاپ كەلدىك. ال بۇل - ءبىزدىڭ العاشقى بايقاۋىمىز. جاقسى ونەر كورسەتەۋ ءۇشىن بارىمىزدى سالدىق. قازاقستان كومپوزيتورلارىنىڭ شىعارمالارىن ورىندادىق جانە اندەرىمىز دە بولدى»، - دەپ ءمالىم ەتتى «اتامەكەن» ەتنو-فولكلورلىق ءانسامبلىنىڭ مۇشەسى ەرنار ءومىرالى.
جوعارى دەڭگەيدەگى ءىس-شارا وزبەكستاننىڭ مادەني مۇرا ەسكەرتكىشتەرىن تانىتۋعا دا ىقپال ەتەرى ءسوزسىز. وسى ارقىلى كورشىمىز تۋريستىك الەۋەتىن جاڭا قىرىنان تانىتپاق نيەتتە.
اۆتور
ءاليحان اسقار