قازاق سپورتشىلارى وليمپياداعا دەيىن دوپينگكە قارسى قانشا رەت سىناما تاپسىرادى

استانا. KAZINFORM - بۇگىنگى تاڭدا قازاق سپورتشىلارى پاريجدە وتەتىن XXXIII جازعى وليمپيادا ويىندارىنا دايىندىق جولىندا ايانباي تەر توگۋدە. ءبىرى - جولداما ءۇشىن تالاسىپ جاتسا، ەندى ءبىرى - جولدامانى جەڭىپ الىپ، ءتورتجىلدىق باستى دوداعا دايىندىقتى باستاپ كەتكەن.

قازىرگى تاڭدا سپورتشىلارىمىز فيزيكالىق دەنە دايىندىعىمەن قاتار دوپينگكە قارسى تالاپتاردى دا ەستەن ءبىر ءسات شىعارۋعا قۇقىسى جوق. سەبەبى، وسىعان دەيىن قانشاما سپورتشىلارىمىز وليمپيادانىڭ جەڭىس تۇعىرىنا شىعىپ، ارتىنان جۇلدەلەرىنەن دە، اتاق-ابىرويىنان دا ايىرىلىپ قالدى.

وسى ورايدا، اگەنتتىك ءتىلشىسى ق ر دوپينگكە قارسى ۇلتتىق ورتالىعىنىڭ باسشىسى مايرا باقاشيەۆامەن تىلدەسىپ، وليمپيادا الدىندا سپورتشىلارىمىز جارىسقا دوپينگسىز بارۋى ءۇشىن قانداي جۇمىستار اتقارىلىپ جاتقانىن سۇراپ، ءبىلدى.

«ءبىز سپورتشىلارىمىزدىڭ پاريجدە وتەتىن وليمپيادا جانە پاراليمپيادا ويىندارىنا دوپينگسىز قاتىسۋىنا بار كۇشىمىزدى سالىپ جاتىرمىز. باستى دوداعا دايىندىق اياسىندا قازاقستاننىڭ دوپينگكە قارسى ۇلتتىق ورتالىعى (قاز د ق ۇ و) سپورتشىلاردى دوپينگكە قارسى وقىتۋعا جانە ولاردى تەستىلەۋگە باعىتتالعان ءىس-شارالاردى وتكىزۋدە. دوپينگكە قارسى اعارتۋ سەمينارلارى سپورتشىلارعا، جاتتىقتىرۋشىلارعا، سپورت دارىگەرلەرىنە جانە قوسىمشا سپورت قىزمەتكەرلەرىنە جارىس جانە جارىستان تىس كەزەڭدەردە ۇيىمداستىرىلادى. وليمپياداعا، پاراليمپياداعا باراتىن سپورتشىلارمەن ءبىز جەكە-جەكە كەزدەسۋلەردى مىندەتتى تۇردە وتكىزىپ جاتىرمىز. سپورتشىلار ورتالىقتىڭ رەسمي سايتىندا تەگىن ءبىلىم الۋ كۋرستانتارىنان وتۋگە مىندەتتى. ونى اياقتاعان سوڭ، راستاۋ سەرتيفيكاتى بەرىلەدى. سونداي-اق، دۇنيەجۇزىلىك دوپينگكە قارسى اگەنتتىگى (د د ق ا) وليمپيادا ويىندارىنا دايىندالۋ ءۇشىن ADEL ءبىلىم بەرۋ كۋرسىن ازىرلەدى. وسى بويىنشا بارلىق جۇمىستار اتقارىلۋدا»، - دەپ اتاپ ءوتتى ق ر دوپينگكە قارسى ۇلتتىق ورتالىعىنىڭ باسشىسى.

سونىمەن قاتار، وليمپياداعا جولداما جەڭىپ العان قازاق سپورتشىلارى جارىسقا دەيىن مىندەتتى تۇردە ءۇش رەت دوپينگ باقىلاۋدان وتەتىنىن ايتتى.

«قاز د ق ۇ و جىل سايىن تەستىلەۋ جوسپارىن جۇزەگە اسىرادى جانە ونى جاساعان كەزدە قازاقستاندىق سپورتشىلاردىڭ حالىقارالىق جارىستارعا، سونىڭ ىشىندە ازيا ويىندارى مەن وليمپيادالارعا دايىندىعى مەن قاتىسۋىن ەسكەرەدى. دوپينگكە قارسى ۇلتتىق ورتالىق كۇنتىزبەلىك جىلدىڭ باسىنان باستاپ ماڭىزدى جارىستاردىڭ ءاربىر قاتىسۋشىسىن كەمىندە 3 رەت دوپينگ باقىلاۋدان وتكىزەدى. بۇل - حالىقارالىق وليمپيادا كوميتەتىنىڭ، د د ق ا جانە ق ر تۋريزم جانە سپورت مينيسترلىگىنىڭ تالابى. سپورتشىلاردى حالىقارالىق فەدەراتسيا دا تەكسەرە الادى. ولار دا ءوز تاۋەلسىز تەستىلەۋىن جۇرگىزەدى»، - دەدى ق ر دوپينگكە قارسى ۇلتتىق ورتالىق باسشىسى مايرا باقاشيەۆا.

ەستەرىڭىزگە سالا كەتەيىك، XXXIII جازعى وليمپيادا ويىندارى 2024-جىلدىڭ 26-شىلدەسى مەن 11-تامىزى ارالىعىندا وتەدى.

اۆتور كۇنسۇلتان وتارباي