قازاق سپورتشىلارى كانۆونداعى وليمپيادا قالاشىعىندا قالاي تۇرىپ جاتىر
كانۆون. KAZINFORM - تۋريزم جانە سپورت ءمينيسترى ەرمەك مارجىقپايەۆ پەن ۇلتتىق وليمپيادا كوميتەتىنىڭ باسشىلىعى كانۆون پروۆينتسياسىنىڭ كاننىن قالاسىنداعى وليمپيادا قالاشىعىنا بارىپ، سپورتشىلار جانە باپكەرلەرمەن كەزدەستى.
اتالعان ۆەدموستۆونىڭ باسپا ءسوز قىزمەتىنەن ءمالىم ەتكەندەي، ەرمەك مارجىقپايەۆ IV قىسقى جاس وسپىرىمدەر وليمپياداسىنا قاتىسۋعا كەلگەن اتلەتتەرىمىز ورنالاسقان بولمەلەردى ارالاپ، جالپى جينالىس وتكىزگەن.
«ءبارىڭىزدى وسىندا، جارىس وتەتىن جەردە كورگەنىمە قۋانىشتىمىن. قانشاما قوناق پەن سپورتشىلاردىڭ كەلگەنىن وزدەرىڭىز كورىپ جاتىرسىزدار. بارلىعى 70 تەن استام ەلدەن 1800 گە جۋىق سپورتشى بار. سىزدەرگە كۇندەلىكتى تىنىمسىز ەڭبەكتىڭ ارقاسىندا وسىندا كەلۋدىڭ ءساتى ءتۇستى. وتباسىلارىڭىز، جانكۇيەرلەر مەن بۇكىل قازاقستان سىزدەرگە كوز تىگىپ، قولداۋ كورسەتىپ وتىر. ايتارىم، تەك قانا العا!»، - دەدى ەرمەك مارجىقپايەۆ.
وسىدان كەيىن وليمپياداعا دايىندىق شتابىنىڭ باسشىسى مينيسترگە دەلەگاتسيانىڭ جۇمىسى جايىندا باياندادى.
دەلەگاتسيا وكىلدەرى قازىرگى تاڭدا قازاقستاننان كەلەتىن سپورتشىلاردىڭ ەكىنشى كەزەگىن قالاشىققا ورنالاستىرۋ، جاتتىعۋ كەستەسىن ۇيلەستىرۋ بويىنشا جۇمىس ىستەپ جاتىر.
جيىننان كەيىن ەرمەك مارجىقپايەۆ دەلەگاتسيانىڭ جاۋاپتى وكىلدەرىنە كومانداعا بارلىق جاعدايدى جاساۋعا اتسالىسۋدى تاپسىردى.
ايتا كەتەيىك، IV قىسقى جاس وسپىرىمدەر وليمپياداسىنىڭ سالتاناتتى اشىلۋ ءراسىمى ەرتەڭ، 19- قاڭتاردا كاننىن قالاسىنداعى كونكيمەن جۇگىرۋ سپورت كەشەنىندە (Gangneung Oval) وتەدى.
ال جابىلۋ سالتاناتىن 1- اقپاندا Gangneung Olympic Park سپورت كەشەنى قابىلدايدى.
كانۆون-2024 ويىندارىنا الەمنىڭ 80 گە جۋىق ەلىنەن كەلگەن 14 پەن 17 جاس ارالىعىنداعى 1800 سپورتشى قاتىسادى.
مۇندا 7 سپورت ءتۇرىنىڭ 15 باعدارلاماسى بويىنشا 81 مەدال جيىنتىعى ساراپقا سالىنادى.
قازاقستان نامىسىن 5 سپورت تۇرىنەن 41 اتلەت قورعايدى.
اۆتور كۇنسۇلتان وتارباي