قازاق قىزى تۇڭعىش رەت ەۆەرەست شىڭىنا شىقتى
الماتى. KAZINFORM - قۇرامىندا انار بۋراشەۆا مەن ماقسات جۇمايەۆ بار «Kazakh Everest Team» قازاقستاندىق كوماندا الەمنىڭ ەڭ بيىك شىڭى - ەۆەرەست شىڭىنا (8848 م) ءساتتى كوتەرىلدى. بۇل تۋرالى «Kazakh Everest Team» باسپا ءسوز قىزمەتى ءمالىم ەتتى.
«بۇگىن، 12-ساۋىردە انار مەن ماقسۇت IV لاگەردە (8000 م. ) كۇردەلى كوتەرىلۋدەن كەيىن تومەن ءتۇسۋ ءۇشىن كۇش-قۋاتىن قالپىنا كەلتىرىپ جاتىر. الپينيستەردىڭ جاعدايى قاناعاتتانارلىق، ءبىراق كۇشى سارقىلىپ، بازالىق لاگەرگە ءتۇسۋ ءۇشىن ءبىراز جيناقتالۋى كەرەك بولىپ تۇر»، - دەپ اتاپ ءوتتى «Kazakh Everest Team».
نەپالدىڭ گيمالايدا كوتەرىلۋگە ماماندانعان جانە قازاقستاندىق ەكسپەديتسيانىڭ رەسمي جولسەرىگى «Seven Summit Treks» كومپانياسىنىڭ حابارلاۋىنشا، قازاقستاندىق كوماندا 12-مامىر كۇنى نەپال ۋاقىتىمەن تاڭعى ساعات 07:25-تە ەۆەرەست شىڭىن باعىندىردى.
«8000 مەتردەن جوعارى بيىكتىكتەگى داۋىل مەن بوران تۇرىندەگى كۇردەلى اۋا رايى جاعدايلارىنا بايلانىستى شىڭدى باعىندىرۋعا نيەتتەنگەن ەكسپەديتسيالاردىڭ كوپشىلىگى باعىتىنان كەرى قايتتى، تەك بەس ەلدىڭ الپينيستەرى ەۆەرەستكە ءساتتى كوتەرىلە الدى. ولاردىڭ اراسىندا ءبىزدىڭ وتانداستارىمىز بار - تاريحتا الەمنىڭ ەڭ بيىك شىڭىنا شىققان تۇڭعىش قازاق قىزى انار بۋراشەۆا جانە ەڭبەگى سىڭگەن قازاقستاندىق الپينيست ماقسۇت جۇمايەۆ، بۇل ونىڭ ەۆەرەست شىڭىنا وسىمەن ءۇشىنشى رەت شىعۋى»، - «Kazakh Everest Team» باسپا ءسوز قىزمەتى.
جالپى، «Kazakh Everest Team» كومانداسىنىڭ شىڭعا كوتەرىلۋى بەس تاۋلىككە سوزىلدى: 7-مامىردا بازالىق لاگەردەن (5350 م. ) شىعۋدان باستالىپ، سودان كەيىن ءبىزدىڭ الپينيستەر I لاگەر (6100 م. ) ارقىلى ءوتىپ، ودان كەيىن II لاگەرگە (6400 م. )، III لاگەرگە (7100 م. ) كوتەرىلدى جانە IV لاگەرگە (8000 م. ) جەتكەن سوڭ ودان ءارى ەۆەرەست (8848 م.)
ەۆەرەست شىڭىنا انار بۋراشەۆا مەن ماقسات جۇمايەۆ قازاقستان رەسپۋبليكاسىنىڭ مەملەكەتتىك تۋىن ورناتتى.
بۇعان دەيىن قازاقستاندىق الپينيستەر 6186 مەتر بيىكتىكتە جاتتىعۋ جۇرگىزىپ جاتقانى تۋرالى جازعان ەدىك.
اۆتور
الما مۇقانوۆا