قازاق قىزى فرانسيا سەناتىنا سايلاۋعا ءتۇسىپ جاتىر

  كەيبىرەۋلەر ءوزىنىڭ قازاق ەكەنىن دالەلدەي المايدى. استانادا ءوتىپ جاتقان «وتانداستار» فورۋمىندا ءسوز سويلەگەن ەتنيكالىق قازاق، فرانسيانىڭ كرەي قالاسى مەرىنىڭ ورىنباسارى ەسيم ساۆاش وسىلاي ءمالىم ەتتى، دەپ حابارلايدى Kazinform. 

«فرانسيادا شامامەن 13 جىلدان بەرى جۇمىس ىستەپ كەلەمىن. 2014 -جىلى مەن قالالىق باسقارۋ ورگاندارىندا قىزمەتكە ارالاستىم. سودان كەيىن قالا اكىمىنىڭ ورىنباسارى بولىپ سايلاندىم. بيىل مەن كرەي قالاسى جاستارىنىڭ ماسەلەسىن جەتكىزۋ ءۇشىن بار كۇشىمدى سالدىم، ەندى ونى سەناتقا جەتكىزگىم كەلەدى. جاستار ءوز كوزقاراسىن جاقسى جاققا وزگەرتىپ، ساياساتقا ارالاسىپ، الەمنىڭ دامۋىنا ۇلەس قوسۋعا مۇمكىندىگى بار. قازاقستاندا ەۋروپاداعى قازاقستاندىق جاستار ءۇشىن جاڭا جوبالار قولعا الىنعانىن بىلەمىن»، - دەدى ەسيم ساۆاش فورۋمدا سويلەگەن سوزىندە.

بۇل رەتتە ەسيم ساۆاش «اتا جولى» كارتاسىن جانە قازاقستان ازاماتتىعىن الۋ تارتىبىندە كۇردەلى ماسەلەلەر بار ەكەنىن اتاپ ءوتتى.

«باستى ماسەلەنىڭ ءبىرى - كەيبىرەۋلەر ءوزىنىڭ قازاق ەكەنىن دالەلدەي المايدى. وسىنداي ماسەلە كوپ قازاقتىڭ باسىندا بار. سوندىقتان قازاقستاندىق تاراپ بۇل پروبلەمانى جۇيەلى تۇردە شەشسە ەكەن»، - دەيدى كرەي قالاسى ءمەرىنىڭ مادەنيەت ماسەلەلەرى بويىنشا ورىنباسارى ەسيم ساۆاش.

توقتالا كەتسەك، قازىرگى ۋاقىتتا ەسيم ساۆاش فرانسيا سەناتىنا سايلاناتىن ۇمىتكەرلەردىڭ قاتارىندا.

اۆتور

ءاليحان اسقار