قازاق-قىتاي شەكاراسىنداعى جەمەنەي اۋدانىندا جاڭا ساۋدا ايماعى اشىلدى

استانا. قازاقپارات - قازاق-قىتاي شەگارالاس اۋماعىندا جاڭا پيلوتتىق جوبا - «ساۋدا ايماعى» ىسكە قوسىلدى. قىتاي نارىعىندا قازاقستاندىق شارۋالاردىڭ ەكولوگيالىق تازا ونىمدەرىنە سۇرانىس جوعارى. ەندى وتاندىق فەرمەرلەر اۋىل شارۋاشىلىعى ونىمدەرىن حالىقارالىق الاڭدا ساۋدالاۋعا مۇمكىندىك بار.

قاناتقاقتى جوباعا تەك قازاقستان عانا ەمەس، ورتالىق ازيا ەلدەرى دە قاتىسا الادى.

جاڭا جوبا شىنجاڭ ۇيعىر اۆتونومدىق ولكەسىنىڭ جەمەنەي اۋدانىندا اشىلدى. بۇل قازاقستانعا ءتيىپ تۇرعان ولكە. پيلوتتىق ايماق اۋىل شارۋاشىلىعى ونىمدەرىن وڭدەۋگە باعىتتالعان. سونىمەن قاتار حالىقارالىق ساۋدا مەن تەحنولوگيا الماسۋعا مۇمكىندىك بەرەتىن الاڭ. ءدال مۇنداي جوبا قازاقستانمەن شەگارالاس اۋماقتا العاش رەت ىسكە قوسىلىپ وتىر. بۇل ايماق تەك قانا ساۋدا عانا ەمەس، عىلىم مەن تەحنولوگيا الماساتىن ورىن بولادى. سونىمەن قاتار ينۆەستيتسيالىق ىنتىماقتاستىق پەن كەلىسىم جاسالادى.

ساۋدا ايماعىنىڭ اۋماعى 14 شارشى شاقىرىمنان اسادى. وسى ارقىلى قىتاي كورشى ەلدەرمەن ساۋدا- ساتتىقتى دامىتۋدى كوزدەيدى. نەگىزىنەن شەگارالاس ساۋدا-ساتتىقتى دامىتۋعا كۇش سالىنادى. سونىمەن قاتار اۋىل شارۋاشىلىعى ونىمدەرىن وڭدەۋ ونىڭ لوگيستيكاسى جانە قويما كىرەدى. يمپورت پەن ەكسپورت شيكىزات تاۋارلارىن قايتا وڭدەۋگە دە باسىمدىق بەرىلمەك.

بۇل جوبا قازاقستان ءۇشىن دە ەرەكشە ءتيىمدى بولىپ وتىر. بىرنەشە مەملەكەتارالىق بايلانىس، ترانزيت، لوگيستيكانىڭ باسىم بولىگى قازاقستان ارقىلى جۇرگىزىلەدى. بىلايشا ايتقاندا قازاقستان بۇل جۇيەدە التىن كوپىر ءرولىن اتقارادى. قازىردىڭ وزىندە 11 كومپانيا 5 باعىت بويىنشا كەلىسىم- شارت جاسادى. ونىڭ ىشىندە قازاقستاندىق كومپانيا وكىلدەرى دە بار.

دۋ حۋنتاۋ، پيلوتتىق ايماق باسقارماسىنىڭ ديرەكتورى:

- جەمەنەي بارلىق جاعىنان وتە ىڭعايلى شەگارالىق وكرۋگ. قازاقستان ارقىلى ورتالىق ازياعا يمپورت پەن ەكسپورت كولەمىن ۇلعايتۋ جوسپاردا بار. مۇنداي جوبا شىڭجاڭدا العاش رەت قولعا الىنىپ وتىر. وعان ىشكى جانە سىرتقى رەسۋرستاردىڭ مۇمكىندىكتەرىن بارىنشا پايدالانامىز. 2025-جىلعا دەيىن اۋىل شارۋاشىلىعى ونىمدەرىنىڭ يمپورتى پەن ەكسپورتىن 139 ميلليارد ا ق ش دوللارىنا جەتكىزەمىز. ءدال مىناداي پوتەنتسيالمەن ساۋدا-ساتتىق سوماسى بۇدان دا جوعارى بولۋى مۇمكىن.

قىتاي قازاقستاننان اۋىل شارۋاشىلىعى ونىمدەرىن نەعۇرلىم كوپ ساتىپ الۋعا مۇددەلى. سالالىق ۆەدومستۆو مالىمەتىنە ساي، بىلتىر قازاقستان قىتاي ەلىنە ەكسپورتتاعان اۋىل شارۋاشىلىعى ونىمدەرىنىڭ قۇنى 1 ميلليارد دوللارعا باعالانادى. بۇل الدىڭعى جىلدارمەن سالىستىرعاندا ەكى ەسە كوپ.

ساراپشىلاردىڭ پىكىرىنشە، قىتايلىقتار اراسىندا وتاندىق ەكولوگيالىق تازا ءارى تابيعي اۋىل شارۋاشىلىعى ونىمدەرى تانىمال بولعاندىقتان، سۇرانىس جىلدان-جىلعا ارتىپ كەلەدى. بۇل شارۋالار ءۇشىن شەكسىز نارىق.

جاڭا شەگارالىق پيلوتتىق جوباعا قازاقستانمەن قاتار رەسەي، موڭعوليا سياقتى تاعى بىرنەشە مەملەكەت قىزىعۋشىلىق ءبىلدىرىپ وتىر. بۇنىڭ قازاقستان ءۇشىن تاعى ءبىر ءتيىمدى تۇسى ءدال وسى الاڭدا حالىقارالىق عىلىمي-تەحنيكالىق الماسۋعا مۇمكىندىك تۋىندايدى. مال شارۋاشىلىعى مەن اگرو سالاعا قاتىستى قۇندى عىلىمي تاجىريبەلەرمەن الماسىپ، ۇيرەنۋگە بولادى.

اۆتورى: رۋسلان باقىتبەك ۇلى

www.24.kz