قازاق-قىرعىز ۇكىمەتتەرىنىڭ وكىلدەرى 65 ميلليون دوللاردىڭ كەلىسىمدەرىنە قول قويدى

جامبىل وبلىسىندا ءوتىپ جاتقان قازاقستان مەن قىرعىزستاننىڭ ءوڭىرارالىق ىنتىماقتاستىق فورۋمى قازاق- قىرعىز ىسكەرلىك ديالوگىنان باستالدى.

وندا تاراپتار وڭىرلەردىڭ ينۆەستيتسيالىق جانە ەكسپورتتىق مۇمكىندىكتەرىن، اۋىل شارۋاشىلىعى سالاسىنداعى ىنتىماقتاستىق ماسەلەلەرىن تالقىلادى، دەپ حابارلايدى قازاقپارات.

ق ر ساۋدا جانە ينتەگراتسيا ۆيتسە-ءمينيسترى قايرات تورەبايەۆ قاتىسۋشىلارعا جولداعان قۇتتىقتاۋ سوزىندە قازاقستان مەن قىرعىزستان - جاقىن باۋىرلاس ەلدەر، ورتالىق ازيا ءوڭىرىنىڭ دامۋىنا اسەرى زور ساۋدا-ەكونوميكالىق باعىتىنداعى نەگىزىگى ارىپتەستەر ەكەندىگىن اتاپ ءوتتى.

"بۇگىندە ەكىجاقتى ساۋدانىڭ دامۋىنداعى سەرپىندى ديناميكا بايقالادى. اعىمداعى جىلدىڭ جەتى ايىندا ەكى ەل اراسىنداعى ساۋدا 12,7 پايىزعا ءوسىپ، 755,4 ميلليون دوللاردى قۇرادى. قازاقستاننان قىرعىزستانعا ەكسپورت 2023 -جىلعى قاڭتار- شىلدەدە 17,5 پايىزعا ءوسىپ، 469,7 ميلليون دوللارعا جەتتى. يمپورت ءوز كەزەگىندە 5,6 پايىزعا ارتىپ، 285,6 ميلليون دوللاردى قۇرادى. ءقازىر ەكى ەلدىڭ الدىندا ءوزارا ساۋدا دەڭگەيىن 2 ميلليارد دوللارعا جەتكىزۋ مىندەتى تۇر"، - دەدى ۆيتسە-مينيستر.

ول كورسەتكىشكە قول جەتكىزۋ ءۇشىن ەكى ەلدىڭ ۇكىمەتتەرى بيزنەس وكىلدەرىمەن تىعىز ىنتىماقتاستىق ورناتۋعا، قاجەتتى قولداۋلاردى كورسەتۋگە، كەلىسسوزدەر جۇرگىزۋگە دايىن.

قايرات تورەبايەۆ قىرعىز كاسىپكەرلەرىن قازاقستاندا ءوندىرىس اشۋعا شاقىردى، ول ءۇشىن ەل وڭىرلەرىندە بارلىق جاعداي جاسالۋدا.

"قازاقستان اۋماعىندا ەكسپورتقا باعىتتالعان بىرلەسكەن وندىرىستەردى جۇزەگە اسىرۋ ءۇشىن ارنايى ەكونوميكالىق ايماقتارمەن قاتار بارلىق قاجەتتى بازالار مەن پرەفەرەنتسيالار جۇيەسى جاسالعان. ءار ءوڭىردىڭ وزىندىك ماماندانۋى بار جانە ءوز پرەفەرەنتسيالارىن ۇسىنۋعا دايىن"، - دەپ اتاپ ءوتتى ۆيتسە-مينيستر.

بۇدان ءارى قىرعىز رەسپۋبليكاسى ەكونوميكا جانە كوممەرتسيا ءمينيسترىنىڭ ورىنباسارى قاناتبەك ءابدىراحمانوۆ ءسوز الىپ، ءوز ويىن ورتاعا سالدى.

ەكىنشى سەسسيانى قازاقستان رەسپۋبليكاسىنىڭ اۋىل شارۋاشىلىعى ۆيتسە- ءمينيسترى ەربول تاسجۇرەكوۆ پەن قىرعىز رەسپۋبليكاسى اۋىل شارۋاشىلىعى مينيسترلىگىنىڭ ناقتى سەكتور باسقارماسىنىڭ باسشىسى بەكتۇر مىرزابەكوۆ اشتى.

"قازاقستان- قىرعىزستان قارىم-قاتىناستارى سەنىم مەن ءوزارا تۇسىنىستىكتىڭ جوعارى دەڭگەيىمەن ەرەكشەلەنەدى. ەكىجاقتى قارىم-قاتىناستار تۇراقتى، پروگرەسسيۆتى جانە سىندارلى، ءوزارا ءتيىمدى ىنتىماقتاستىقتى دامىتۋعا باعىتتالعان. وتكەن جىلى اۋىل شارۋاشىلىعى سالاسىنداعى ىنتىماقتاستىق تۋرالى ۆەدومستۆوارالىق مەموراندۋمعا قول قويىلعان دەسەك، بۇل مەملەكەتتەردىڭ كوپقىرلى بايلانىستارىنا قوسىمشا سەرپىن بەرۋدە. نەگىزگى باسىمدىقتاردىڭ قاتارىندا اۋىل شارۋاشىلىعى ونىمدەرىنىڭ ءوزارا ساۋداسىنىڭ كولەمىن ارتتىرۋعا باسا كوڭىل بولىنۋدە. اعىمداعى جىلدىڭ 7-ايىنىڭ قورىتىندىسى بويىنشا، بۇل كورسەتكىش 23 پايىزعا ءوستى"، - دەدى ەربول تاسجۇرەكوۆ.

ءوزارا ىسكەرلىك ديالوگتار قورىتىندىسى بويىنشا قازاقستان رەسپۋبليكاسى مەن قىرعىز رەسپۋبليكاسىنىڭ كاسىپورىندارى اراسىندا 65 ميلليون ا ق ش دوللارى كولەمىندەگى 10 كەلىسىمشارتقا قول قويىلدى.

بۇل كۇنى تاراز قالاسىنداعى دوستىق ۇيىندە ەكى ەلدىڭ ىسكەر توپ وكىلدەرى B2B فورماتىندا كەلىسسوزدەر جۇرگىزدى.

سونداي-اق، قوناقتار قولونەرشىلەر مەن جەرگىلىكتى تاۋار وندىرۋشىلەردىڭ كورمەلەرىن تاماشالادى.

ايتا كەتەيىك، فورۋم اياسىنداعى شارالار ەكى كۇنگە جوسپارلانعان.