قازاق قولىنداعىسىنىڭ بارىن بەرەدى: گەرمانياعا كوشىپ كەتكەن نەمىس ازاماتى قازاق حالقى تۋرالى ايتتى

قازاقستان تاۋەلسىزدىك العان جىلدارى تاريحي وتانىنا كوشكەن جەرلەستەرىمىزدىڭ كوپ شوعىرلانعان ەلى - گەرمانيا. 96 جاستاعى ياكوۆ نۋسس تا 30 جىل بۇرىن تاريحي وتانىنا ورالعانداردىڭ ءبىرى. اقساقال قازاق دالاسىندا وتكەن كۇندەرىن ساعىنىشپەن ەسكە الدى، دەپ حابارلايدى 24KZ.

تەلەارنانىڭ حابارلاۋىنشا، اناسى جانە اپكەلەرىمەن بىرگە جۇك پويىزىمەن بىرنەشە اپتا جول ءجۇرىپ، قازاق دالاسىنا جەتكەندە ياكوۆ نەبارى 12 جاستا ەدى. سول جىلدارى ەلىمىزگە كۇشتەپ جەر اۋدارىلعان مىڭداعان نەمىس وتباسىنىڭ باسپانا تۇگىلى، ىشەرگە اسى، كيەرگە كيىمى جوق بولاتىن. ءبىراق سول كەزدە قول ۇشىن سوزعان قازاق حالقى ولاردىڭ ءۇمىتىن قايتا وياتتى.

«قازاقتار بولماعاندا، ءبىز اشتان ولەر ەدىك. ولار سوڭعى نانى بولسا دا، بىزگە ءبولىپ بەرەتىن. مەن مۇنى ەشقاشان ۇمىتقان ەمەسپىن جانە ۇمىتپايمىن. قازاق ەشتەڭەسىن ايامادى، قولىنداعىسىنىڭ بارىن بەردى. قازاقتاردىڭ جان جىلۋىنىڭ ارقاسىندا كوپتەگەن نەمىس امان قالدى»، - دەيدى گەرمانيا تۇرعىنى ياكوۆ نۋسس.

گەرمانياعا ورالعانىنا 30 جىل وتسە دە، قاريانىڭ قازاقشاسى ءالى كۇنگە دەيىن سۋداي. 96 جاستاعى ياكوۆ نۋسس قازاقتىڭ كەڭ دالاسىن ساعىنعاندا قازاقستاندىق دوستارى سىيعا تارتقان سۇيىكتى شاپانىن كيەدى.

ءبىر عاسىرعا جۋىق عۇمىر كەشكەن قاريا كوپتى كورگەنىن، ءبىراق ءدال قازاقتار كورسەتكەن مەيىرىم مەن قوناقجايلىلىقتى ەش جەردەن كەزدەستىرمەگەنىن ايتتى.

«مەن قازاقتارمەن تۋعانىمداي جاقىن ارالاستىم. قازىر قوستانايعا بارسام، ءوزىمدى ۇيدەگىدەي سەزىنەتىنىمدى بىلەمىن. ءار وتباسى قىستىڭ سۋىعى، جازدىڭ اپتاپ ىستىعى بولسىن، وعان قارامايدى. بارلىعى: «ياشكا، ۇيگە كىر»، - دەپ قۇشاق جايىپ قارسى الادى. مۇنداي قارىم-قاتىناستى قالاي ۇمىتۋعا بولادى؟ قازاق ەلىنە شىن جۇرەكتەن بەيبىت اسپان تىلەيمىن»، - دەدى اقساقال.

تەلەارنا مالىمەتىنشە، قازىر گەرمانيادا 1 ميلليونعا جۋىق قازاقستاندىق نەمىس تۇرادى. ولار قازاق تىلىندە سويلەپ، قازاق ءداستۇرىن قۇرمەتتەپ، ۇلتتىق تاعامداردى ازىرلەيدى. بۇل قيىن-قىستاۋ زاماندا قامقورلىق تانىتىپ، بارىمەن بولىسكەن قازاق حالقىنا دەگەن شىنايى العىسى ىسپەتتى.