قازاق نەگە جاساۋ رەتىندە قازان مەن پىشاق بەرمەيدى؟ ەتنوگراف جاۋابى

استانا. قازاقپارات - ەتنوگراف بولات بوپاي ۇلى Baribar.kz تىلشىسىنە بەرگەن سۇحباتىندا قىز جاساۋى رەتىندە نەگە قازان مەن پىشاق بەرۋگە بولمايتىنىن ايتتى.

ەتنوگراف عالىمنىڭ سۇحباتىندا قىز جاساۋىنىڭ ءمانىن اشىپ بەردى. قىز جاساۋى - بويجەتكەننىڭ جاڭا وتباسىندا قولداناتىن زاتتارى. ۇزاتىلعان قىزبەن ونىڭ جاساۋى دا ەرىپ بارادى. ونىڭ ىشىنە كيىم- كەشەك، توسەك- ورىن كىرەدى.

ۇزاتىلعان قىز جاڭا ءومىر باستاپ جاتقاننان كەيىن قىز جاساۋىنداعى زاتتىڭ ءبارى جاڭا بولۋى كەرەك. ءبىراق قازاق جاساۋ رەتىندە قازان مەن پىشاق بەرمەيدى. سەبەبى پىشاق - قۇدالار قىرىقپىشاق بولادى، ال قازانمەن بىرگە باق كەتەدى دەگەن ۇعىم بار. قىرىقپىشاق تۇراقتى تىركەسىنىڭ ماعىناسى - ارازداسۋ.

«قىز كۇيەۋىنىڭ شاڭىراعىنا كەلىپ، سول جەردە بىردەن نەكە قيىلىپ، بەتاشار ءراسىمى بولادى. بەتاشاردا قىز قايىن جۇرتىنا سالەم سالىپ، ۇلكەن كىسىلەردەن باتا الادى»، - دەيدى ول.

بولات بوپاي ۇلى سالەم سالۋ قازاق كەلىندەرىنىڭ ۇلكەندەرگە سىي-قۇرمەتتىڭ، ادەپتىڭ، مادەنيەتتىڭ، تاربيەنىڭ بەلگىسىن بىلدىرەتىن ءداستۇر ەكەنىن ايتادى. سالەم تاڭەرتەڭ تۇرعاندا، داستارقانعا اس قويىلعان كەزدە ۇلكەندەرگە سالىنادى. كەلىنشەك جىگىتتىڭ وتباسىنا وزىنەن كەيىن جاڭا كەلىن تۇسكەنشە سالەم سالۋى كەرەك.

ەتنوگرافتىڭ سوزىنە قاراعاندا، جاڭا تۇسكەن كەلىن تاڭەرتەڭ شاڭىراقتىڭ تۇندىگىن اشادى. بۇل - دالانىڭ جارىعى ۇيگە تۇسەدى، ال كەلىننىڭ جۇرەگىندەگى نۇر ۇيگە كىرەدى دەگەن ۇعىمنىڭ بەلگىسى.

ونىڭ ايتۋىنشا، ودان سوڭ كەلىن وت جاعىپ، اتا-ەنەسىنە، كۇيەۋىنە شاي قۇيادى. وتباسىندا كەلىننىڭ بار ەكەنىنىڭ بەلگىسى رەتىندە وتىندى كەلىننەن باسقا ەشكىم ءبىرىنشى بولىپ جاقپايتىن.