قازاق جىلقىسىن ساقتاۋ تۋرالى ارنايى زاڭ قابىلداۋ كەرەك - مەملەكەت باسشىسى

استانا. KAZINFORM - اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا پرەزيدەنت قازاق جىلقىسىن ساقتاۋ تۋرالى ارنايى زاڭ قابىلداۋ كەرەك دەدى.

بۇعان دەيىن حابارلاعانىمىزداي، ەلورداداعى تاۋەلسىزدىك سارايىندا مەملەكەت باسشىسى قاسىم-جومارت توقايەۆتىڭ قاتىسۋىمەن اۋىل شارۋاشىلىعى قىزمەتكەرلەرىنىڭ ءبىرىنشى فورۋمى باستالدى. شاراعا مەملەكەتتىك ورگان وكىلدەرىنەن بولەك ەلدىڭ تۇكپىر-تۇكپىرىنەن جينالعان 2 مىڭنان استام اۋىل شارۋاشىلىعى سالاسىنىڭ ماماندارى قاتىسىپ وتىر.

«بارشاڭىزدى اۋىل شارۋاشىلىعى ەڭبەككەرلەرىنىڭ ءبىرىنشى فورۋمىنىڭ اشىلۋىمەن قۇتتىقتايمىن! القالى جيىن اۋىل شارۋاشىلىعى، تاماق جانە وڭدەۋ ونەركاسىبى قىزمەتكەرلەرى كۇنى قارساڭىندا ءوتىپ جاتىر. كاسىبي مەرەكەلەرىڭىز قۇتتى بولسىن! سونداي-اق بۇل فورۋم ەلىمىزدە تىڭ يگەرۋ ناۋقانى باستالعانىنا 70 جىل تولۋىنا تۇسپا-تۇس كەلىپ وتىر. سول ناۋقاننىڭ ءتۇرلى سالدارى بولعانىن بىلەسىزدەر. سوعان قاراماستان اۋىل شارۋاشىلىعىندا كوپتەگەن وڭ وزگەرىس جاسالدى. قازاقستان از ۋاقىت ىشىندە الەمدەگى ەڭ استىقتى ەلدىڭ بىرىنە اينالدى. الەۋمەتتىك ينفراقۇرىلىم جاقساردى، ەلدى مەكەندەر سالىندى. مەن بۇگىن العاشقى تىڭگەرلەردىڭ جانە ولاردىڭ ءىزىن باسقان ديقاندارىمىزدىڭ ەڭبەگىن ەرەكشە اتاپ وتكىم كەلەدى»، - دەدى پرەزيدەنت.

مەملەكەت باسشىسى اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا جىلقى شارۋاشىلعىنىڭ پروبلەمالارىنا توقتالدى.

«جۋىردا موڭعولياعا مەملەكەتتىك ساپارمەن بارعانىمدى بىلەسىزدەر. موڭعوليا باسشىسىمەن بىرگە كوپتەگەن ماسەلەنى تالقىلادىق. ەكى كوشپەندى حالىقتىڭ ۇرپاعى رەتىندە جىلقى تۋرالى دا ايتتىق. موڭعول جىلقىلارى الاسا بولعانىمەن وتە ءتوزىمدى ءارى ۇزاققا شابادى ەكەن. ءبىز «تەگىمىز - تۇركى، تۇلىگىمىز - جىلقى» دەپ ارعىماقتى ايرىقشا قادىرلەگەن ەلمىز. تۇتاس تاريحىمىز تۇلپارلاردىڭ تۇياعىمەن جازىلدى. جالپى قازاقتىڭ مىنەر كولىگى دە، ىشەر اسى دا جىلقىمەن تىعىز بايلانىستى. ساۋمال مەن قىمىزدىڭ سان ءتۇرلى دەرتكە شيپا ەكەنى بارشاعا ءمالىم. قازىر ەلىمىزدە جىلقى سانى ۇزدىكسىز ءوسىپ كەلەدى. بۇل - جاقسى كورسەتكىش»، - دەدى مەملەكەت باسشىسى.

پرەزيدەنت سالانىڭ پروبلەمالارىنا دا توقتالدى.

«دەگەنمەن، اسىل تۇقىمدى جىلقىنىڭ ۇلەسى 1 پايىزعا دا جەتپەيدى. ياعني، 4,2 ميلليون جىلقىنىڭ 40 مىڭى عانا اسىل تۇقىمدى. سوندىقتان مال تۇقىمىن اسىلداندىرۋ جۇمىسىنا باسا ءمان بەرگەن ءجون»، - دەدى مەملەكەت باسشىسى.

اۆتور

ەسىمجان ناقتىباي