قازاق فيلمنىڭ ءوزى دە، ينفراقۇرىلىمى دا وتە قيىن جاعدايدا - ايدا بالايەۆا
استانا. KAZINFORM - «قازاق فيلم» كينوستۋدياسى تىكەلەي مەملەكەتتىك بيۋدجەتتەن قارجىلاندىرۋ جاعى قارالىپ جاتىر. بۇل تۋرالى مادەنيەت جانە اقپارات ءمينيسترى ايدا بالايەۆا ءمالىم ەتتى.
ءماجىلىستىڭ جالپى وتىرىسىنان كەيىن ب ا ق وكىلدەرى ۆەدومستۆو باسشىسىنان «قازاق فيلم» داۋ-دامايعا بايلانىستى كينوستۋديا جابىلا ما دەپ سۇرادى.
«ارينە، جابىلمايدى، مۇنى مينيستر رەتىندە رەسمي تۇردە جاريالايمىن. بۇل - ءبىزدىڭ تاريحىمىز. كينو مەن كينەماتوگرافيانىڭ دامۋى «قازاق فيلم» تاريحىمەن تىكەلەي بايلانىستى. سوندىقتان بۇل كاسىپورىندى ساقتاپ، ونى دامىتۋ - ۇرپاق الدىنداعى پارىزىمىز»، - دەپ جاۋاپ بەردى ايدا بالايەۆا.
ونىڭ ايتۋىنشا، بۇگىندە مادەنيەت جانە اقپارات مينيسترلىگىنىڭ كينوستۋديانى تىكەلەي قارجىلاندىرۋعا قۇزىرەتى جوق.
«سوندىقتان قازىر ءبىز ناقتى شارالاردى قاراستىرىپ جاتىرمىز. بىرىنشىدەن، بۇل ماسەلەنى زاڭنامالىق دەڭگەيدە رەتتەۋ، ياعني «قازاق فيلم» كينوستۋدياسىن مەملەكەتتىك تاپسىرىس ارقىلى جانە جەكەلەگەن تەتىكتەر ارقىلى تىكەلەي قارجىلاندىرۋ كەرەك. وسى ورايدا مەنەدجەرلىك ءتاسىلدى قايتا قاراۋدامىز. بۇگىندە قازاق فيلمنىڭ ءوزى دە ينفراقۇرىلىمى دا وتە قيىن جاعدايدا ەكەنىن ايتقىم كەلەدى. جالپى، قارجىلاندىرۋ جوق جەردە دامۋ تۋرالى ايتۋدىڭ قاجەتى جوق»، - دەپ تولىقتىردى ايدا بالايەۆا.
اۆتور
داۋلەت ىزتىلەۋ